Қазақстандағы қазіргі жағдай. Қысқа-нұсқа
Азаттықтың коронавирус жағдайына байланысты жазбаша LIVE парақшасына енді ғана кірсеңіз, 2 маусымдағы басты оқиғаларды бір шолып шығыңыз.
Қазақстанда коронавирус жұқтырғандар аз болған сәтте қатаң карантин мен төтенше жағдай жарияланып, өскенде бұл шектеулер неге алынды? Бұл сауалға Қазақстанның бас санитарлық дәрігері Айжан Есмағамбетова онлайн-брифингте «Басқа елдерде қаңтар-ақпанда инфекция қатты өсті. Яғни, кейбір елдерде вирус өте жылдам тарап, көп адам ауыр жағдайда болды. Өлім де көп тіркелді. Денсаулық сақтау жүйесіне көп күш түсті. Біз уақытында карантин мен төтенше жағдай жариялап, вирустың жылдам тарауының алдын алдық және өсім темпін төмендеттік. Басында бір адам үш адамға жұқтырса, бұл көрсеткіш бір адам екі адамға, бір адам бір адамға жұқтыратындай деңгейге төмендеді» деді.
Есмағамбетованың сөзінше, наурызда елде күніне мың тест алынса, қазір анализ саны 20 мыңға дейін жеткен. Бас санитарлық дәрігер «елде эпидемиологиялық жағдай толық бақылауда» деп сендірді.
Денсаулық сақтау министрлігінің дерегінше, 11571 адамнан коронавирус табылды. 5941 адам дерттен айықты. 41 адам коронавирустан қайтыс болды.
Денсаулық сақтау министрлігінің мәліметінше, елде 7 журналиске вирус жұққан. Үшеуі дерттен айықты. Төртеуі емделіп жатыр. Жағдайлары бірқалыпты.
Алматыда жедел жәрдемнің 17 қызметкеріне коронавирус жұқты.
Теміртау қаласының әкімі Ғалым Әшімовтен коронавирус инфекциясы табылды.
Теміртау әкіміне де коронавирус жұқты. Бірақ ауруханаға жатқызылмады
Қарағанды облысы Теміртау қаласының әкімі Ғалым Әшімовтен коронавирус инфекциясы табылды. Тауар және қызмет сапасы мен қауіпсіздігін бақылау департаменті әкімді ауруханаға жатқызбай, үйінде емделуге рұқсат бергенін хабарлады.
- Ғалым Әшімов қазір үйінде. Дәрігерлер жағдайын тұрақты деп бағалап отыр. Ауырсыну туралы шағым жоқ. Әкім 14 күн оқшауда болады. Әкім аппараты қалыпты тәртіпте жұмыс істеп жатыр – деді облыстық департамент Азаттыққа.
Әкіммен байланыста болған қызметкерлердің коронавируске тесті теріс шықты деді эпидемиологтар.
Теміртау әкімі қызметін уақытша Әшімовтың орынбасары Мирас Құттыбай атқарады.
1 маусымда Теміртау қаласында карантин талаптары жеңілдетіліп, сауда және қызмет көрсету саласындағы объектілердің жұмыс істеуіне рұқсат берілді. Қалаға кіреберістегі блокпостар алынды. Блокпостар сәуірдің басында Теміртауда жұмыс істейтін Қарағанды тұрғыны коронавирустан қайтыс болғаннан кейін қойылған болатын.
Қарағанды облысында 20 наурыз бен 1 маусым аралығында 956 адамнан коронавирус табылды. Теміртауда 356 жағдай тіркелген.
Ресми мәлімет бойынша, Қазақстанда 11 мыңнан астам адамнан COVID-19 инфекциясы табылған.
Ресейде COVID-19 вирусына қарсы вакцинаны әскерилерге сынамақ
Ресей қорғаныс министрлігі COVID-19 коронавирусына қарсы вакцинаны клиникалық жағдайда сынақтан өткізуге әскерилер арасынан 50 еріктіні таңдап алған. Бұл туралы әскери ведомствоға сүйеніп, ресейлік ақпарат агенттіктер хабарлады. Вакцинаны Ресей қорғаныс министрлігіне қарасты 48-орталық ғылыми-зерттеу орталығы әзірлеген. Еріктілердің алғашқы тобын институт 3 маусымда қабылдамақ.
Ресей әскери министрлігі коронавирусқа қарсы вакцина әзірлеуге қатысып жатқаны сәуірдің басында белгілі болған. Ресей президентінің қатысуымен өткен кеңесте қорғаныс министрі Сергеу Шойгу вакцинаны клиникалық сынаққа дейін зерттеу жұмыстары 1 маусымға дейін аяқталуы тиіс деп мәлімдеген еді. Вакцина әзірлеу жұмысына Ресей денсаулық сақтау министрлігінің Гамалеи атындағы ұлттық эпидемиология және микробиология ғылыми зерттеу орталығы да қатысып жатыр. Вакцинаны клиникалық сынақтан өткізуді жыл соңына дейін аяқтау жоспарланған.
22 мамырда ресейлік академик Александр Гинцбург орталық қызметкерлері SARS-CoV-2 коронавирусына қарсы вакцина ретінде әзірлеп жатқан затты өздеріне сынап көргенін хабарлаған. Гинцбургтің сөзінше, қызметкерлердің "денсаулығына кері әсер етпеген". Академик сынаққа нақты қанша адам қатысқанын айтпады. Бұл вакцинаны жаңа коронавирус гені енгізілген аденовирус ДНК-сы негізінде әзірлеп жатыр.
Ресей премьер-министрінің орынбасары Татьяна Голикованың хабарлауынша, елде COVID-19 коронавирусына қарсы 47 түрлі вакцина әзірленіп жатыр. Ал Гамалеи атындағы ұлттық эпидемиология және микробиология ғылыми зерттеу орталығының директоры COVID-19 вирусына қарсы жаппай вакцина салу 2020 жылы күзде басталуы мүмкін деп топшылайды.
Өткен аптада Мәскеу мэрі Сергей Собянин коронавирус инфекциясының таралуына қарсы енгізілген санитарлық шектеу вакцина табылғанға дейін ішінара сақталатынын мәлімдеген.
Испанияда өткен тәулікте коронавирустан адам өлімі болған жоқ
Коронавирус пандемиясы басталғалы бері Испанияда алғаш рет тәулік ішінде COVID-19 салдарынан ешкім қайтыс болған жоқ. Бұл туралы Испания денсаулық сақтау министрлігі төтенше санитарлық жағдайлар бойынша үйлестіру орталығының басшысы Фернандо Симон хабарлады.
"Біз пандемия эволюциясында өте жақсы орында тұрмыз. Статистикада тренд бар және ол дұрыс бағытта", - деді Симон.
Испания - Еуропаның пандемиядан ең ауыр зардап шеккен мемлекеттердің бірі. Елде коронавирус 240 мың адамға жұғып, 27 мыңнан астам адам COVID-19 кесірінен қайтыс болған.
Испанияда COVID-19 себеп болған адам өлімі алғаш рет 3 наурызда тіркелген. Екі күннен кейін тағы бір адам қайтыс болған. Содан кейін вирусты жұқтырғандар мен қайтыс болғандар саны еселеніп көбейе берді. 2 cәуірде Испанияда бір тәулікте 950 адам коронавирустан қайтыс болды. Бұл вирустан қайтыс болғандардың шарықтау шегі еді. Одан кейін өлім көрсеткіші біртіндеп азая бастады.