Ұлыбритания коронавирусқа байланысты енгізген карантин мерзімін тағы үш аптаға созды
Денсаулық сақтау министрі Мэтт Хэнкок шектеу шаралары ерте алынса, жағдай қиындап кетуі мүмкін деп қауіптенеді. Сыртқы істер министрі Доминик Рааб шектеу шараларын жұмсарту халық денсаулығына да, ел экономикасына да кері әсер етеді деп мәлімдеді.
Эпидемия басталғалы бері Ұлыбританияда 103 мың адамнан вирус табылған. 13 мыңнан астам адам қайтыс болған.
Премьер-министр Борис Джонсонға да коронавирус жұққаны анықталған еді. Ол бірнеше күн Әулие Фома ауруханасында емделіп, өткен апта соңында шықты.
Бұған дейін Австрия, Дания, Германия шектеу шараларын жұмсартатынын хабарлаған. Бірақ билік азаматтарды сақ болуға және дәрігерлер кеңесін орындауға шақырған.
Соңғы мәлімет бойынша, әлемде коронавирус жұқтырғандар 2 миллион 160 мыңнан асты. 144 мыңнан астам адам қайтыс болған. АҚШ, Испания, Италия, Франция, Германия вирустан қатты зардап шекті. Вирус жұқтырғандар саны жағынан Ұлыбритания әлемде алтыншы орында тұр.
Өзбекстанда 70 жастағы науқас коронавирустан жазылды
Өзбекстанда 70 жастағы науқас коронавирустан жазылып шықты. Ташкент тұрғыны эпидемиология, микробиология және жұқпалы аурулар ғылыми зерттеу институтының кликасында емделген. Оған науқастардан вирус жұққан. Емделгеннен кейін тест алынып, науқаста коронавирус жоқ екені анықталған.
16 сәуірде Бұхара қаласындағы инфекциялық ауруханада емделген тағы 20 науқастың (10 ер адам, 10 әйел) айыққаны белгілі болды. 11-і - Ташкенттен, төртеуі Самарқанд облысынан, екеуі - Жизақ облысынан және үшеуі - Қашқадария, Науаи, Ташкент облыстарынан. Ең үлкені - 57 жаста, ең кішісі - 21-де. Барлық науқастар Бұхараға Түркиядан ұшып келген. Коронавирус анықталғаннан кейін облыстық инфекциялық ауруханаға жатқызылған болатын.
Өзбекстанда коронавирустан 129 адам айыққан. 4 адам қайтыс болған. Барлығы 1349 адамнан коронавирус табылған.
Қазақстанда тағы 68 адамнан коронавирус табылды
Қазақстан денсаулық сақтау министрлігі 17 сәуір таңертеңгі сағат 10:05-те 68 адамнан коронавирус табылғанын хабарлады. Нұр-Сұлтанда - 2, Алматы қаласында - 44, Шымкентте - 1, Түркістан облысында - 2, Қызылорда облысында - 9, Атырау облысында - 1, Павлодар облысында - 2, Батыс Қазақстан облысында - 4, Қарағанды облысында 3 адамға вирус жұққан.
Қазақстанда вирус жұқтырғандар 1470 адамға жетті:
- Алматы қаласы – 461
- Нұр-Сұлтан қаласы – 328
- Қызылорда облысы – 143
- Қарағанды облысы – 87
- Ақмола облысы – 81
- Атырау облысы – 72
- Түркістан облысы – 55
- Жамбыл облысы – 53
- Шымкент қаласы – 46
- Солтүстік Қазақстан облысы – 29
- Алматы облысы – 29
- Батыс Қазақстан облысы – 30
- Ақтөбе облысы – 14
- Маңғыстау облысы – 12
- Павлодар облысы – 15
- Шығыс Қазақстан облысы – 8
- Қостанай облысы – 7
17 науқас қайтыс болған. 15 сәуірде Алматыда 1960 жылғы ер адам қайтыс болған. Дәрігерлердің айтуынша, науқаста жүрек-өкпе аурулары болған.
Барлығы 277 адам айыққан.
Қарағанды облысында алты айлық сәбиден коронавирус табылды
Денсаулық сақтау министрлігі 17 сәуірде таңертең Қызылорда облысында - 9, Павлодар облысында - 2, Қарағанды облысында 3 адамнан коронавирус табылғанын хабарлаған болатын.
Coronavirus2020.kz сайтының Telegram арнасындағы мәлімет бойынша, Қарағанды облысында алты айлық сәбиге коронавирус жұққан. Оның ата-анасынан бұған дейін вирус табылып, инфекциялық ауруханаға жатқызылған. Қазір нәресте провизорлық ауруханада жатыр.
Қарағанды облысында коронавирус анықталған екінші науқастың жасы - 41-де. Ол бұған дейін вирус жұққандармен араласқан. Үшінші науқас - 19 жастағы Теміртау қаласының тұрғыны да науқастармен байланыста болған. Екеуі де ауруханаға жатқызылған.
Павлодар облысында 1949 жылғы Екібастұз тұрғыны (ер адам) және 1978 жылғы әйел адамнан коронавирус табылып, провизорлық ауруханаға жеткізілген. Ер адам бес күннен бері ауру белгілері байқалғанын, бірақ медициналық көмекке жүгінбегенін айтқан. Ал әйел адам мамандарға ешқайда шықпағанын, коронавирус жұққандармен араласпағанын айтқан. Дәрігерлер оған қайдан вирус жұққанын анықтап жатыр.
Қызылорда облысында Жаңақорған ауданында 9 адамнан коронавирус табылған. Үшеуі - 30-53 жас аралығындағы әйел, алтауы - ер адам. Ең үлкені 83 жаста. Сегіз адам коронавирус жұққандармен байланыста болған. Бір адамға вирустан қайдан жұққаны әзірге белгісіз.
Қазақстанда жалпы 1470 адамнан коронавирус табылған. 277 адам жазылған. 17 адам қайтыс болған.