Жексенбіде Алматыда қайтыс болған екі науқас туралы
Денсаулық сақтау министрлігінің дүйсенбі, 20 сәуірде таратқан мәліметі бойынша, жексенбі күні Алматыда ауруханада қайтыс болған екі науқастың біреуі - 1958 жылы туған ер адам. Коронавирус жұқтырған науқастың панкреатит, ауыр дәрежелі қан аздығы, артериалды гипертония тәрізді аурулары болған. Ол жүрегі тоқтап қайтыс болған.
Екінші науқас - 1931 жылы туған әйел. Ол жүректің ишемиялық дерті, артериялды гипертензия, дисциркуляторлы энцефалопатия сияқты аурулармен ауырған.
Қазақстанда коронавирус жұқтырған 19 адам көз жұмды:
- Нұр-Сұлтан қаласы - 2
- Алматы қаласы - 5
- Шымкент қаласы - 3
- Ақмола облысы - 4
- Шығыс Қазақстан облысы - 1
- Қарағанды облысы - 1
- Қостанай облысы - 1
- Павлодар облысы - 1
- Түркістан облысы - 1.
Қазақстан бойынша 1735 адам коронавирус жұқтырған, 401 науқас дерттен айыққан.
Министр Нұрымбетов: 42500 теңгені қателесіп алғандар жауапқа тартылмайды
Қазақстанда үкімет бөлген 42500 теңге әлеуметтік көмекті қателесіп алған адам қылмыстық жазаға тартылмайды. Бұл туралы 20 сәуірде Нұр-Сұлтанда өткен баспасөз мәслихатында еңбек және халықты әлеуметтік қорғау министрі Біржан Нұрымбетов мәлімдеді.
Ол төтенше жағдай кезінде кірісінен айырылғандарға мемлекеттік әлеуметтік сақтандыру қорынан берілетін "42500 төңгені алғандардың кейбірі бұл қаржыны үкіметке қайтармаса қылмыстық жауапқа тартылады" деген түрлі ақпарат көбейгенін айтты.
- Ештеңені уайымдамаңыздар, халықтың басым бөлігінің табысы аз екені, жалақы, жәрдемақының көп еместігі түсінікті. Сондықтан біз ешкімді жаппай тексеріп жатпаймыз. Мәселе, жұмысын тоқтатпаған жұмыс берушілер мен жалақысын алып отырса да 42500 теңге алу жөнінде өтініш бергендерге байланысты туған болатын, - деді министр.
"42 500 теңге неге барлық азаматқа берілмейді" деген сұраққа Нұрымбетов "Төтенше жағдай кезінде мелекет халыққа әртүрлі әлеуметтік көмек ұсынған. 42500 теңге алмаған азаматтар басқа көмектерді ала алады" деп жауап берді.
Министрдің сөзінше, қазірге дейін 3 миллион 960 мың адамға 42500 теңге тағайындалып, оған 157 миллиард теңге бөлінген.
Қазақстанмен көрші елдердегі коронавирус ахуалы
Кейінгі мәлімет бойынша, Ресейде коронавирус жұқтырғандар саны 42853 адамға жетті. Жексенбі күні елде науқастар қатарына 6060 адам қосылды. Бұл дүниежүзі бойынша бір тәулік ішінде тіркелген көрсеткіш жағынан АҚШ-тан кейінгі (онда 25352 науқас танықталған) екінші орын. 3291 науқас жазылып, 361 адам көз жұмды.
Қырғызстанда коронавирус жұқтырғандар 568 адамның арасында 140 медицина қызметкері бар. 201 науқас дерттен айығып, жетеуі өлген.
Өзбекстанда 1565 адамға коронавирус жұққан. 225 науқас жазылып, бес адам вирустан қайтыс болды.
Коронавирус жұқтырғандардың 12-і дерттен айықты
Қазақстан денсаулық сақтау министрлігінің 20 сәуірде сағат 11:30-дағы мәліметінше, төрт облыста барлығы 12 науқас коронавирустан айығып шыққан.
- Солтүстік Қазақстан облысы - 7
- Шығыс Қазақстан облысы - 3
- Ақмола облысы - 1
- Маңғыстау облысы - 1.
Осылайша Қазақстан бойынша коронавирустан жазылғандар 413 адамға жетті. Бұған дейін елде барлығы 1735 адам вирус жұқтырған, 19 адам қайтыс болды.
