Путин шектеу шараларын 12 мамырға дейін ұзартты
Ресейде жұмыссыз апта мерзімі 12 мамырға дейін созылады. Бұл туралы коронавирусқа байланысты үкімет және аймақ басшыларымен жиналыс өткізген Ресей президенті Владимир Путин мәлімдеді. Путин елде коронавирус ахуалы тұрақталды, бірақ қауіпті кезең әлі алда деп санайды.
Азаматтар ережелерді неғұрлым қатаң сақтаса, соғұрлым жылдам қалыпты өмірге оралады деді президент.
"Шарықтау шегі әлі болған жоқ. Эпидемияның ең күрделі кезеңіне таядық" деді Путин.
28 сәуір күнгі отырыста ол сонымен бірге 5 мамырға дейін үкімет оқшаулау режимінен біртіндеп шығу жоспарын дайындайды деп айтты. Бірақ кейбір аймақтарда қатаң шектеу шаралары 11 мамырдан кейін де күшінде қалуы мүмкін деді.
Путиннің сөзіне қарағанда коронавирус індеті кәсіпкерлерге ауыр тиген. Осыған орай президент үкіметке ел экономикасын қалыпқа келтіруге мүмкіндік беретін жаңа жоспар әзірлеуді тапсырды.
Сәуір айының басында президент халыққа мәлімдеме жасап, азаматтарды оқшаулау режимін сақтауға шақырған еді және алдағы екі-үш аптаның ең шешуші кезең болатынын айтқан.
"Бәрі өтеді және бұл да өтіп кетеді. Еліміз көптеген сынақты бастан кешірген: кезінде печенегтер де, "половецтер" де қысқан - Ресей бәрін жеңді. Бұл коронавирусты да жеңеміз" деген еді.
Соңғы мәлімет бойынша, Ресейде 93,5 мыңнан астам адамнан коронавирус табылған. 867 науқас қайтыс болған.
Қазақстанда вирус жұқтырғандар 36 адамға көбейді
Қазақстан денсаулық сақтау министрлігі 29 сәуір таңертеңгі сағат 9.10-да коронавирус инфекциясы тағы 36 адамнан табылғанын хабарлады. Нұр-Сұлтан қаласында - 7, Алматы қаласында - 5, Ақмола облысында - 3, Жамбыл облысында - 2, Батыс Қазақстан облысында - 1, Қостанай облысында - 2, Маңғыстау облысында - 2, Павлодар облысында - 2, Түркістан облысында - 3, Шымкент қаласында - 6, Атырау облысында 3 адамға вирус жұққаны анықталған.
Қазақстанда барлығы 3063 адамға вирус жұққан. 774 адам жазылған. 25 адам қайтыс болған.
Коронавирус жұқтырған 3063 адам мына аймақта:
- Алматы қаласы – 924
- Нұр-Сұлтан қаласы – 612
- Қызылорда облысы – 187
- Шымкент қаласы – 182
- Қарағанды облысы – 139
- Атырау облысы – 131
- Батыс Қазақстан облысы – 127
- Түркістан облысы – 124
- Павлодар облысы – 122
- Алматы облысы – 113
- Жамбыл облысы – 113
- Ақмола облысы – 98
- Ақтөбе облысы – 65
- Қостанай облысы – 45
- Маңғыстау облысы – 34
- Солтүстік Қазақстан облысы – 30
- Шығыс Қазақстан облысы – 17
ДДСҰ сапары қарсаңында Түркіменстанда жүздеген адам жатқан стационар босап қалды
Дүниежүзілік денсаулық сақтау ұйымы өкілдерінің Түркіменстанға сапары қарсаңында елдегі екінші ірі қала - Түркіменабад қаласында коронавирус жұқтырған болуы мүмкін жүздеген адам жатқан карантин аймағы аяқ астынан босап қалды. Бұл туралы Азаттықтың Түркімен қызметі хабарлады.
Ақпарат бойынша, Түркіменабад маңындағы карантиндік аймаққа жатқызылған 400-ден астам адам 28 сәуірде аймақтағы кішігірім ауруханалар және психиатриялық клиникаға ауыстырылған.
Бұған дейін ақпарат құралдары келесі аптада Түркіменстанға келетін ДДСҰ өкілдерінен коронавирус ахуалын жасыру үшін билік өкілдері науқастарды уақытша басқа жаққа ауыстыру туралы шешім қабылдады деп хабарлаған болатын.
Түркіменстанда ресми түрде коронавирус табылмаған. Бірақ тәуелсіз БАҚ пен ашықтықтың жоғын алға тартқан сарапшылар бұған күмәнмен қарайды. Елде дәрігерлердің коронавирус туралы айтуына тыйым салынған, медициналық маскалар тағуға рұқсат етілмеген, ғаламдық індет жайлы айтқан азаматтар жазаланады.
Бірақ сонымен қатар билік "жұқпалы ауру тарамас үшін" елде үш карантиндік аймақ құрған.
Өткен аптада халықаралық Human Rights Watch (HRW) адам құқығын қорғау ұйымы коронавирустың барын жоққа шығарып отырған Түркіменстан мен Тәжікстан билігі осылайша азаматтарының өміріне қауіп төндіріп отыр деп мәлімдеген.
Теңіз кенішінде вирус жұқтырғандар көбейді
Теңіз кенішінде коронавирус жұқтырғандар 68 адамға жетті. Бұл туралы төтенше жағдай режимін қамтамасыз ету жөніндегі аймақ штабының мәліметіне сүйенген жергілікті БАҚ хабарлады. 29 сәуірде мұнда тағы үш адамға вирус жұққаны анықталған еді.
"Науқастар - 1963, 1988, 1990 жылғы үш ер адам. Барлығы Теңіз кенішіндегі мердігер компаниясында жұмыс істейді" делінген ресми хабарламада.
Коронавирус анықталғанға дейін үш жұмысшы да бұрын коронавирус жұқтырғандармен қарым-қатынаста болуына байланысты стационар карантинде жатқан. Штаб өкілдері үшеуінің жағдайы бірқалыпты дейді. Екі күн бұрын мұнда 9 жұмысшыдан коронавирус табылған болатын. Сәуір айының бас кезінде Теңіз кенішінде жұмыс істейтін мердігер мекемелердің кем дегенде екі қызметкерінен коронавирус инфекциясы табылғаны хабарланған.
Атырау облысының Жылыой ауданы аумағындағы "Теңізшевройл" компаниясының вахталық поселкесіндегі "Болашақ" лагерінің жұмысшылары 20 сәуірде лагерь аумағына "коронавирус жұқтырып, карантинде жатып шыққан" адамдарды әкелуге наразылық танытқан болатын. Компания басшылығы олардың вахта ауысымы бітіп, кетіп бара жатқан қызметкерлер екенін, коронавирус жұқтырмағанын айтқан.
Атырау облысында 131 адамнан коронавирус табылған. 60 адам айыққан.