Комиссия "Арқалықтағы науқас коронавирустан қайтыс болған жоқ" деп санайды
Қостанай облысы денсаулық сақтау басқармасындағы комиссия "25 сәуірде коронавирустан қайтыс болды деп хабарлаған Арқалықтың 84 жастағы тұрғынының өлімінің себебі COVID-19 емес" деген шешім қабылды. Бұл туралы 30 сәуірде денсаулық сақтау басқармасы мәлімдеді.
Жергілікті басылымдардың хабарлауынша, тұрғын 25 сәуірде үйінде қайтыс болған.
Басқарма "Арқалық тұрғыны артериалдық гипертония, гипертензивті энцефалопатия" диагнозымен қалалық емханада тіркеуде тұрғанын, кейінгі екі айда үйіне бірнеше рет жедел жәрдем шақырғанын" алға тартады.
Комиссия "тұрғынның жасы келіп қалған, созылмалы аурулары болды, жүрек-қан айналым жұмысының бұзылуынан көз жұмды. Ал коронавирус табылуы жанама әсер еткен" деген қорытынды шығарған.
Қазақстан үкіметі бұған дейін де Алматыда коронавирус жұқтырған 97 жастағы зейнеткердің өлімінің себебі COVID-19 емес" деген қорытындыға келген.
Қазақстанда қазір 3350-ден асты. 858 адам дерттен айықты. 25 адам қайтыс болды. Денсаулық сақтау министрлігі елде мамырдың соңына дейін 5300 адамға виру жұғады деп болжайды. Қазақстанда коронавирус тарауына байланысты 11 мамырға дейін төтенше жағдай.
Елде 30 сәуірде 264 адамнан вирус табылды
Қазақстан денсаулық сақтау министрлігі 30 сәуір 23.00-дегі мәліметіне сай, елде тағы 48 адамнан коронавирус табылды: Алматы қаласында - 23, Жамбыл облысында - 7, Нұр-Сұлтан қаласында - 6, Атырау облысында - 4, Қызылорда облысында - 3, Алматы облысында - 2, Қостанай облысында - 1 науқас.
Осылайша, елде бейсенбі күні 264 адамнан вирус анықталды. Бұрын елде бір күнде мұнша адам COVID-19 дертіне шалдықпаған.
Қазір Қазақстанда барлығы 3402 адамнан вирус анықталды. 866 адам дерттен айықты. 25 адам қайтыс болды.
Алматыда вирус жұқтырғандар мыңнан асып кетті. Нұр-Сұлтанда 700-ге жақындап қалды. Қызылорада дертке шалдыққандар 200-ден асты.
Вирус жұқтырған 3402 адам мына аймақтарда:
- Алматы қаласы – 1051
- Нұр-Сұлтан қаласы – 645
- Қызылорда облысы – 201
- Шымкент қаласы – 192
- Қарағанды облысы – 149
- Батыс Қазақстан облысы – 146
- Алматы облысы – 140
- Атырау облысы – 139
- Жамбыл облысы – 130
- Павлодар облысы – 129
- Түркістан облысы – 124
- Ақтөбе облысы – 109
- Ақмола облысы – 99
- Қостанай облысы – 50
- Маңғыстау облысы – 48
- Солтүстік Қазақстан облысы – 30
- Шығыс Қазақстан облысы – 20
Ресей премьер-министріне коронавирус жұққан
Ресей премьер-министрі Михаил Мишустин COVID-19 ауруына шалдыққанын хабарлады. Үкімет жетекшісінің міндетін уақытша бірінші вице-премьер Андрей Белоусов атқарады.
Мемлекеттік "Россия-24" арнасының эфирі кезінде премьер-министр үкімет мүшелерімен байланыста болатынын айтты. Ол ресейліктерді шектеу шараларына немқұрайлы қарамауға шақырды.
Соңғы бір күнде Ресейде 7 мыңнан астам адамнан коронавирус табылған. 101 адам қайтыс болған. Вирус жұқтырғандар жалпы 106 498 адамға жетті. 1 073-і қайтыс болған, 11 619 жазылған.
Вирус жұқтырғандар саны бойынша Ресей астанасы Мәскеу алда тұр: мұнда бір күн ішінде 3093 адамнан коронавирус табылған.
Биліктің айтуынша, мамыр айының басында эпидемия шарықтау шегіне жетеді. Президент Владимир Путин жақында жұмыссыз апта мерзімін 11 мамырға дейін ұзартқан. Мәскеуде "оқшаулау режимі" 12 мамырға дейін күшінде болады.
Бұған дейін Путин үкіметке 12 мамырға дейін шектеу шараларын біртіндеп азайту жоспарын жасауды тапсырған.
Өзбекстанда түлектердің бітіру кештері онлайн форматта өтеді
Коронавирусқа байланысты Өзбекстанда жоғары оқу орны түлектерінің бітіру кеші онлайн форматта өтеді. 30 сәуірде оқу жылын аяқтау мәселесі бойынша өткен отырыста президент Шавкат Мирзияев осылай деп мәлімдеді.
Президенттің баспасөз қызметінің хабарлауынша, кездесу кезінде білім беру мекемелеріне құжат қабылдау жүйесін жетілдіру, құжаттарды қашықтан тапсыру мүмкіндігін қарастыру сияқты мәселелер талқыланған. Қоғамға жаңа өзгерістер қосымша хабарланатыны да айтылды.
Мирзияев шенеуніктерге биыл оқу орнына қабылдау емтиханын жеңілдетілген форматта өткізуді тапсырған.
Коронавирус жұқтырғандар саны жағынан Өзбекстан Орталық Азия аймағында Қазақстаннан кейін екінші орында тұр. Соңғы мәлімет бойынша, мұнда 2039 адамнан коронавирус табылған. 9 адам қайтыс болған. 1133 адам жазылған.
Елде карантин 10 мамырға дейін ұзартылған. Бірақ билік 30 маусымға дейін халықаралық рейстерді қабылдауға тыйым салған.