IOM пандемияға байланысты Қазақстан шекарасында қалған жүздеген тәжік азаматының елге қайтуына көмектесті
Коронавирусқа байланысты енгізілген шектеудің кесірінен Қазақстанда қалып қалған жүздеген тәжік азаматы халықаралық ұйымның көмегімен еліне оралды.
Көші-қон жөніндегі халықаралық ұйым (IOM) Азаттыққа 19 маусымда 635 азамат мінген 14 автобустың қазақ-өзбек шекарасындағы "Жібек жолы" бақылау-өткізу пунктінен Өзбекстанға қарай өткенін айтты.
IOM дерегінше, олардың арасында жұмысшылар, студент-мигранттар, әйелдер мен балалар да бар.
Бұл сапарға Қазақстан, Өзбекстан және Тәжікстан үкіметі келісім берген. IOM ұйымының хабарлауынша, тәжік азаматтарын үйге жеткізу сапарын АҚШ, Норвегия және ЮНИСЕФ қаржыландырған.
Үйіне қайтқан азаматтардың 25 пайыздан астамы - Қазақстан университеттерінде оқып жүрген 15-24 жас аралығындағы жастар. 15 пайызға жуығы - әйелдер мен балалар.
Наурыз айының соңында Өзбекстан коронавирус пандемиясына байланысты шекарасын жапқан. Содан кейін Өзбекстан арқылы өтетін көрші елдердің азаматтарына шекарадан өтуге рұқсат беруді тоқтатқан. Осыдан соң Қазақстанда жұмыс істеп жүрген жүздеген тәжік азаматы еліне өте алмай қалған.
Шымкент пен Түркістан облысында пневмониямен ауырғандар күрт артты
Шымкент қаласы және Түркістан облысында пневмониямен ауырғандар саны күрт артты. Бұл туралы 20 маусым күні қалалық және облыстық денсаулық сақтау басқармасы хабарлады.
Шымкент қалалық денсаулық сақтау басқармасының баспасөз хатшысы Лаура Нахыпқызының айтуынша, медициналық мекемелерге келіп жатқан науқастар саны көп. Оларды жатқызуға тесек-орын жеткілікті. Қосымша орын дайындалып жатыр. Қазір медициналық ұйымдарда 318 адам пневмониямен емделіп жатыр. Бұл өткен жылмен салыстырғанда 7,2 пайызға көп. Пневмониямен жедел жәрдем шақырушылардың саны 50 пайызға артқан. Пневмонияға шалдыққан 300-ден астам адам арасында 110 науқастан коронавирус анықталған.
Азаттық тілшісі соңғы уақытта Шымкентте дәріханаларда дәрілердің шектеліп беріп жатқанын байқады. Дәріхана қызметкерлерінің сөзіне қарағанда, соңғы аптада дене қызуы көтерілген тұрғындар көбейген. Олар көбіне антибиотиктер сұрап келген. Дәріханаларда анальгин, димедрол сияқты дәрілерді сату шектелген.
Процедуралық кабинеттерге де келушілер көбейген. Онда жүрегі айнып, лоқсып жатқан, дене қызуы көтерілген, дәм сезбей қалған, әлсіздік басқанын айтып шағымданғандар жиі кездеседі. Олардың ішінде жасы да, зейнеткерлер де бар.
- Бір аптадан бері дене қызуым көтеріліп, әлсіздік басты. Күнде дәрі ішіп, ине салдырып отырмын. Қазір дене қызуым басылғанымен әлсіздік кетпей жатыр, - дейді аты-жөнін айтудан бас тартқан тұрғын.
Түркістан облысында да соңғы бір аптада пневмониямен ауырғандар саны көбейген. Облыстық денсаулық сақтау басқармасының дерегінше, маусым айында 600-ге жуық адам пневмониямен ауырып, ауруханаға түскен. Олардың тең жартысы жазылып, үйіне жіберілген.
Облыста ауырып, емханаға түскендерге орын таппай жатқаны туралы Facеbook парақшаларына жазып жатқан қолданушылар бар. Дегенмен денсаулық сақтау басқармасы қазір орын жеткілікті екенін айтады. Олардың айтуынша, аудандардан қосымша медицина қызметкерлері тартылып жатыр.
Бұған дейін Ақтөбе облысында да пневмонияға шалдыққандар 6 есеге көбейгені хабарланған еді. Жағдай қиындағандықтан дәрігерлер ауруханалардан қосымша орын дайындауға мәжбүр болған. Жергілікті денсаулық сақтау басқармасы пневмонияны емдейтін дәрігерлер тапшылығын да айтқан.
Оқи отырыңыз: Ақтөбе облысында пневмонияға шалдыққандар 6 есе көбейді, дәрігерлер тапшы
Қырғызстанда бір күнде үш адам коронавирустан қайтыс болды
Бұл ақпаратты Қырғызстанның денсаулық сақтау вице-министрі Нурболот Усенбаев хабарлады. Ошта облысаралық ауруханада - 1961 жылғы әйел адам, Кара-Су ауданында 1959 жылғы ер адам, Тюп ауданы ауруханасында 1958 жылғы ер адам қайтыс болған.
Министрліктің айтуынша, Тюп ауданының тұрғыны бұған дейін жасанды аппаратпен тыныс алған. Оған пневмония және "жүрек жетіспеушілігі" диагнозы қойылған. 1960 жылғы Ош қаласында тұрған әйел ауруханаға 15 маусымда түскен. 1959 жылғы Кара-Су ауданының тұрғыны дене қызуы көтеріліп, жөтелетініне және ауыр тыныс алатынына шағымданған. Бұған дейін инфарктың асқынған түрі және гипертониямен ауырған.
Қырғызстанда коронавирустан барлығы 35 адам қайтыс болған. Жалпы 2981 адамнан коронавирус табылған. 1981 адам жазылып, ауруханадан шыққан.
Ресейде вирус жұқтырғандар 576 952 адамға жетті
Ресейде бір күнде 7 889 адамнан коронавирус табылды. 161 пациент қайтыс болды. Олардың 34-і Мәскеуде тұрады. Бір күнде 10 186 адам жазылған.
Жедел штаб мәліметінше, жаңа анықталған науқастардың 32 пайызында симптом байқалмаған. Ресейде барлығы 576 952 адамнан коронавирус анықталған. 8002 адам қайтыс болған. 334 592 адам жазылған.