"Қадір түнінде" Орталық мешітте уағыз тыңдап отырған жамағат. Алматы, 15 тамыз 2012.
Мұсылмандар "Қадір түнін" ұлықтады
Тамыз айының 14-інен 15-іне ауған түні Қазақстан мұсылмандары мешіттерге жиналып, дұға жасап, бір-бірін "Қадір түнімен" құттықтады.
"Қадір түні" Алматының орталық мешіті жамағатқа толды. Азаттық тілшісінің хабарлауынша, мешіттің ішінен гөрі ауласына жиналғандар көп болған. Олардың арасында жастармен қатар әйелдер және отбасымен келгендер байқалған.
Алматы қаласының бас имамы Құлмұхаммед Маханбет уағыз айтып отыр. Алматы, 15 тамыз 2012.
Орталық мешітте тарауық намазынан кейін бас мүфти Әбсаттар Дәрбісәлі, Алматының бас имамы Құлмұхаммед Маханбет және өнер - білім өкілдері сөйлеп, мұсылмандарға "мүбарак болсын" айтты.
Исламның адамгершілік діні екендігі айтқан Әбсаттар Дербісәлі "Қазақстанда дінге бет бұрғандардың 80 пайызы - жастар" деді. Одан кейін ғалым Мұрат Жұрынов, актер Асанәлі Әшімов және басқа да адамдар сөйлеп, жиналғандарға өзінің тілегін білдірді.
Мешіт сыртына үлкен монитор қойылған. Онда Құран сүрелері мен хадистер жазылған. Мешіт іші қатты ысып кеткендіктен халықтың біразы мешіттің сыртына монитор маңына ауысып отырған. Алматы орталық мешітінің маңында полиция қызметкерлері мен көліктері байқалған.
Орталық мешіттің екінші қабатынан уағыз тыңдап отырған жігіт. Алматы, 15 тамыз 2012.
"Қадір түні" құрметіне орай Қазақстандағы кей мешіттерде Құран жарысы өтсе, кей мешіттерде жиналғандарға сыйлық үлестірілген. Кейбір мешіттердің жанынан діни медреселер ашылды, жаңа діни сайт іске қосылған.
"Қадір түнінде" орталық мешіт қызметкерлері Азаттық тілшісіне кеңірек түсінік беруден бас тартты. Олар бұған ресми рұқсат жоғын көлденең тартқан.
Мұсылмандар "Қадір түнінде" қасиетті Құран түскен деп есептейді. Бұл түні періштелер көктен жерге түсіп, адамның тағдыры айқындалады, Алланың кешірімі нәсіп болады делінеді. "Қадір түні" Рамазан айының 26-сынан 27-сіне ауған түніне сәйкес келеді деп саналады.
Алматының орталық мешітінде өткен "Қадір түнін" осы жерден көре аласыз:
