Accessibility links

Шымкент базары сүрілерде бірнеше адамды полиция ұстады


Базар сүрілерде бірнеше саудагерді полиция ұстады
please wait

No media source currently available

0:00 0:00:48 0:00

Базар сүрілерде бірнеше саудагерді полиция ұстады

30 шілдеде Шымкенттегі орталық базар алдында сауда орындарын сүруге қарсылық танытқан бірнеше адамды полицейлер ұстап алып кетті. Олар сот орындаушылары дүңгіршектерін бұза бастағанда қарсылық танытқан.

Дүйсенбі таңертеңнен бастап Шымкент қаласының Төле би көшесінің бойында орналасқан "Орталық Қырғы базар" аталатын сауда орнында 30 шақты дүңгіршектерін бұзуға наразылық танытты. Оқиға орнындағы Азаттық тілшісінің хабарлауынша, ондаған саудагерлерге таңғы сағат ондар шамасында полицейлер, сот орындаушылары мен прокуратура өкілдері келген.

Орталық базардағы дүңгіршектер сүрілер алдында бір күн бұрын базарға келген полицейлер. Шымкент, 29 шілде 2018 жыл.
Орталық базардағы дүңгіршектер сүрілер алдында бір күн бұрын базарға келген полицейлер. Шымкент, 29 шілде 2018 жыл.

Сот бұзуға шешім шығарған 34 дүңгіршектің саудагері кеше сауда орындарын сүруге қарсылық танытып, түнде бала-шағасымен дүңгіршектерде түнеген. Сүру жұмыстары басталмай тұрып сот орындаушылары саудагерлерге сүруге қарсылық танытса бес тәулік әкімшілік қамауға алынатынын немесе айыппұл салынатынын ескерткен.

Бірақ саудагерлер оны елемей, сүру жұмыстарына қарсылық көрсеткен соң оншақты әйелді полиция ұстап, көлікке отырғызып алып кетті. Дүңгіршектерінен шықпай отырған біраз саудагерді полиция қызметкерлері күшпен сыртқа шығарды. Кейбірі өз еркімен тауарларын жинап жатыр.

Полиция қызметкерлері орталық базарда дүңгіршектерін сүруге қарсылық танытқан адамды ұстап әкетіп барады. Шымкент, 30 шілде 2018 жыл.
Полиция қызметкерлері орталық базарда дүңгіршектерін сүруге қарсылық танытқан адамды ұстап әкетіп барады. Шымкент, 30 шілде 2018 жыл.

Полиция ұстап алып кеткен адамдар Әл-Фараби аудандық ішкі істер бөліміне жеткізілген. Азаттық осы ішкі істер бөлімінен мәлімет алуға тырысқанымен, әзірге ешқандай ақпарат берілген жоқ.

Дегенмен, Түркістан облыстық ішкі істер департаменті бұл ақпаратты растады. Мекеменің баспасөз қызметінің Азаттыққа хабарлауынша, «Әл Фараби аудандық полиция бөліміне қоғамдық орында полицияға бағынбай, дауыс көтергені үшін екі азаматша бөлімге жеткізілген. Олармен түсіндіру жұмыстары жүргізіліп, босатылды".

Ал сот орындаушысы Айнұр Тойшыбекова саудагерлерге сот шешімін оқып, бұзуға кедергі жасаған жағдайда әкімшілік құқұқбұзушылық туралы заңның 667 бабымен айыппұл салынатынын немесе бес тәулікке қамалатынын ескертті. 667 бап бойынша 20 айлық есептік көрсеткіш мөлшерінде (жиыны - 48 мың 100 теңге) айыппұл көзделген.

Сатушылардың айтуынша, шілденің 28-і күні сот орындаушылары өздерін сауда орындары мен дүңгіршектерін бұзу туралы сот шешімімен таныстырып, екі күнде орындарын босатуды талап еткен. Олар Түркістан облыстық соты 27 шілде күні 34 дүңгіршекті бұзу туралы шешім шығарғанын айтады. Сот дүңгіршектерді "заңсыз салынған" деп тапқан. Ал дүңгіршектер орналасқан жердің өзін мемлекетке қайтару туралы сот шешімі 2015 жылы шыққан.

Базардағы дүңгіршектердің бірін сүріп жатқан техникалар. Шымкент, 30 шілде 2018 жыл.
Базардағы дүңгіршектердің бірін сүріп жатқан техникалар. Шымкент, 30 шілде 2018 жыл.

Саудагер Алтынай Нарымбетова бұған дейін Азаттыққа екі күнде басқа жақтан орын тауып, дүңгіршектерін босата алмайтындарын айтқан. Олар билік орындары өздеріне екі ай уақыт берсе, сатушылар базардан өз еркімен кетуге дайын екенін жеткізген. Прокурорлар саудагерлерге базардың ішінен орын тауып беруді ұсынғанымен, сатушылар "базарда сауда болмайды" деп, көшуден бас тартқан.

Базар алдын полиция қызметкерлері қоршап, ішке ешкімді өткізбей тұр. Оқиға орнына дүңгіршектерді сүруге арнайы техника, өрт сөндіру техникалары мен жедел жәрдем көлігі әкелінген.

  • 16x9 Image

    Дилара ИСА

    Дилара - Азаттықтың Шымкенттегі тілшісі. 1986 жылы туған. Солтүстік Қазақстан мемлекеттік университеті мен Абай атындағы ҚазҰПУ-ді бітірген.

    "Жас Алаш" газетінде жұмыс істеген.

    Азаттықпен 2012 жылдан бері әріптес.

  • 16x9 Image

    Мәншүк АСАУТАЙ

    1980 жылы туған. Е.Бөкетов атындағы Қарағанды мемлекеттік университетін бітірген.

    Қарағанды қаласындағы жергілікті телеарнада қызмет еткен. 2004 жылдан бері Азаттықтың тілшісі. 

    Автормен оның Facebook парақшасында да пікірлесуге болады.

ПІКІРЛЕР

XS
SM
MD
LG