6 ақпанда Италияның Милан және Кортина қалаларында 25-қысқы олимпиада ойындарының ашылу салтанаты өтті. Бұл – ашылу салтанаты екі қалада бір уақытта болған алғашқы олимпиада. Салтанатты шара кезінде жанкүйерлер Украина спортшыларына қошемет көрсетіп, Израиль спортшылары шыққан кезде гуілдеді. Азаттық тілшісі де ашылу салтанатын стадионнан тамашалады.

Салтанатты шара Миландағы әйгілі "Сан Сиро" стадионында өтті. Ал Кортинада қалашықтың көшесінде болды. "Сан Сиродағы" ашылу салтанатының басында Ла Скала театрының 70 бишісі Италиядағы ежелгі антика мүсіндері бейнесінде ортаға шығып, би биледі.

Шара кезінде ұйымдастырушылар Италияның танымал композиторлары Джузеппе Верди, Джакомо Пуччини мен Джоакино Россиниге және Италия музыкасына құрмет көрсетті.

Одан әрі сахнаға бояулар "төгіліп", стадион ортасы сантүрлі түске енді. Осылайша ұйымдастырушылар Италияның сурет өнерін паш етті.

Артынша америкалық әнші Мэрайя Кэри италиялықтардың танымал Volare әнін шырқады.

Сахнаға Италия туымен түстес киім киген модельдер шығып, италиялық әйгілі модельер Джорджио Арманиді (былтыр қыркүйекте 91 жасында қайтыс болған) құрметпен еске алды. Бұл көйлектерді Армани сән үйі тіккен.

Одан соң стадионда олимпиадаға қатысатын елдердің парады басталды. Бұл шара да Милан мен Кортина қалаларында қатар өтті. Қазақстан ұлттық құрамасы екі қалада да атлеттер парадына қатысып, мемлекеттік туды Миланда шорт-трекші Денис Никиша, Кортинада фристайл могулден олимпиадаға қатысатын Аяулым Әміренова ұстап шықты.

Украина құрамасы парадқа шыққан кезде стадиондағы бүкіл жұрт қошеметтеп қолдау білдірді. Ал Израиль құрамасы ортаға шыққанда қарсылық білдіріп гуілдеді.

Стадионға АҚШ құрамасы шыққан кезде көрермендер қошемет көрсетіп жатқан еді, кейін экраннан АҚШ вице-президенті Джей Ди Вэнсті көрсеткенде жұрт гуілдеп қоя берді. Осылайша "Сан Сиродағы" көрермен Израильдің Газадағы соғысы мен президент Трамп әкімшілігінің АҚШ-тағы саясатына қарсылық білдірді.

Ашылу салтанатында италиялық әнші Андреа Боччели ән салды. Бұған қоса, әлемді бейбітшілікке үндеген, расизм мен соғыстың адамзатқа зияны жайлы қойылымдар қойылды.

25-қысқы олимпиада ойындарының ашылу салтанатында 1200-ден аса адам өнер көрсетті. Ең жасы он жаста, ең үлкені 70 жаста. Шараға 700 сағат дайындалған. Музыка жазуға 500-ден аса музыкант қатысса, өнер көрсеткен әртістер мен өзге де адамдарды сәндеуге 70 шаштараз, 110 make-up жасаушы атсалысқан. 1400-ден астам көйлек тігу үшін 7500 метр мата жұмсалған.

Ал салтанатты шара соңында Милан мен Кортина қалаларында олимпиада алауы жанды. Олимпиада ойындары 22 ақпанда жабылады.