Accessibility links

Ресей депутатының грузин спикерінің орнына отыруы наразылыққа себеп болды


Наразылар Ресей президенті Владимир Путиннің суретін өртеп жатыр. Тбилиси, 20 маусым 2019 жыл.

Грузияда ресейлік депутаттың ұлттық парламентте өткен жиында төрағаның орындығына отырып алуы жаппай наразылыққа түрткі болды. Мыңдаған адам Тбилиси көшесіне шықты. Полиция наразыларды тарату үшін арнайы құралдар қолданды.

Тбилисиде түні бойы жалғасқан наразылықтан кейін маусымның 21-і күні таңға жуық полицияның арнайы жасағы көшедегі тәртіпті бақылауына алды. Оппозиция жетекшілері қарсылық акциялары жалғасатынын мәлімдеді.

"Біз Руставели даңғылында [сағат 19-да] тағы кездесеміз. Бұдан кейін қандай әрекет қылатынымызды халықпен кеңесіп алуымыз керек" деді "Жаңа Грузия" партиясының лидері Георгий Вашадзе.

Билік парламент ғимараты қасында демонстранттар мен полиция арасында болған қақтығыстан 70-ке жуық адам, соның ішінде 39 полиция қызметкері зардап шекті деп хабарлады. Полиция наразыларды тарату үшін көзден жас ағызатын газ бен резеңке оқ қолданған. Жергілікті басылымдардың хабарлауынша, полиция бірнеше азаматты ұстаған.

"Үкіметтің іс-әрекеті мүлде заңсыз. Қазір кімнің ұсталып, кімнің ауруханаға түскені және хал-жағдайы қандай екенін анықтау маңызды" деді Вашадзе.

Маусымның 20-ы күні Тбилисиде болған жаппай наразылыққа ресейлік депутат Сергей Гавриловтың Грузия парламенті төрағасының орындығына отырып алуы түрткі болды. Тбилисиге сапармен келген Ресей мемлекеттік думасының депутаты, Ресей коммунистік партиясының мүшесі Сергей Гаврилов әлемнің бірқатар елінің өкілдерін біріктіретін Парламентаралық православие ассамблеясының жиынына төрағалық еткен.

Грузия парламенті алдына жиналған наразы азаматтар. Тбилиси, 20 маусым 2019 жыл.
Грузия парламенті алдына жиналған наразы азаматтар. Тбилиси, 20 маусым 2019 жыл.

Гавриловты Ресей президенті Владимир Путиннің серігі деп санайтын грузиялық азаматтар ол Грузияның сепаратистік аймақтары - Абхазия мен Оңтүстік Осетияға қолдау білдірген Мәскеудің іс-әрекетін құптайды дейді.

Грузия президенті Саломе Зурабишвили Гавриловтың іс-әрекеті - "айтарлықтай қылмыс", бірақ қоғамның көтерілуін онымен ақтауға болмайды деп, наразылықтың артында басқа бір күштер тұруы мүмкін дегенді меңзеді. Ресейлік депутат Грузия парламенті спикерінің орындығына отырып алып "елдің абыройын қорлады", "бірақ бұл парламентке шабуылдау мен төңкеріс жасауға бағытталған арандатуды [наразылықты] ақтамайды" деді ол.

Демонстранттар мен полиция арасындағы қақтығыс. Тбилиси, 21 маусым 2019 жыл.
Демонстранттар мен полиция арасындағы қақтығыс. Тбилиси, 21 маусым 2019 жыл.

Тбилисидің Грузиядан бөлінетінін мәлімдеген екі аймақ - Оңтүстік Осетия мен Абхазияны қайтадан өз бақылауына алуға және батыс ұйымдарына қосылып, НАТО ұйымына енуге деген талпынысы 2008 жылы Ресеймен арадағы бес күндік соғысқа себеп болған. Грузия Кремльде билікте отырған Путин Грузияның Ресейдің ықпалында болғанын қалайды деп санайды.

Парламентаралық православие ассамблеясы отырысындағы үзілісткен кейін Гаврилов спикердің орындығына қайта отырмақшы болды, бірақ оның жолын кес-кестеген грузиялық депутаттар ресейліктің "мемлекет институттарын қорлауына" көнбейтіндерін мәлімдеді деп хабарлайды жергілікті БАҚ. Парламент ішіндегі тірестен кейін отырыстың жұмысы аяғына жетпей тоқтап, қауіпсіздік қызметі Гаврилов пен ресейлік делегацияның өзге өкілдерін ғимараттан алып кеткен.

Ресей мемлекеттік думасы депутаты Сергей Гаврилов. Тбилиси, 19 маусым 2019 жыл.
Ресей мемлекеттік думасы депутаты Сергей Гаврилов. Тбилиси, 19 маусым 2019 жыл.

Маусымның 20-сы кешке парламент ғимаратының алдына жиналған наразылар спикер Ираклий Кобахидзенің отставкаға кетуін талап етті. Кейбірінің қолында Грузия, Еуропа одағы мен АҚШ туы болды, енді біреулері "Ресей - басқыншы" деген жазу ұстап алған. Әзербайжан астанасында жұмыс сапарымен жүрген Кобахидзе Гавриловтың парламентаралық православие ассамблеясы отырысын Грузия парламенті спикерінің орнына отырып алып басқарғанын естісімен жиынды дереу тоқтатуды сұрағанын айтты. "Парламентте бүгін барлығымыз куә болған жағдайды көру аса қиын болды. Ресей жеріміздің 20 пайызын басып алған, сондай елдің депутаты парламент спикерінің орындығында отырды" деді ол.

Түн ортасына қарай парламенттің алдына бірнеше мың адам жиналды, наразылардың кейбірі ғимаратқа басып кірмекші болды. Демонстранттар парламентті айнала қоршап тұрған полицияның арнайы бөлімшесі қызметкерлерінің шлемі мен қалқанын тартып ала бастады. Полиция наразыларға газ шашты. Газдан қорғану үшін демонстранттар бетін қолымен, жейдесімен жауып, амал жасады.

Полиция арнайы жасағы мен наразы азамат. Тбилиси, 21 маусым 2019 жыл.
Полиция арнайы жасағы мен наразы азамат. Тбилиси, 21 маусым 2019 жыл.

"Газ көзіме тиіп, тамағыма кептелді. Көп ыдыстан шашты" деп жазды түн ортасына таман Twitter-парақшасына грузиялық фотограф әрі Stratfor зерттеу компаниясының қызметкері Онник Крикорян.

Оның сөзінше, полиция бірнеше рет газ шашып, кейін наразылар жиналған жерден кетпей қойған азаматтарға резеңке оқ ата бастаған. Кейбіреулер жарақат алған. Оқиға болып жатқан жерге жедел жәрдем көліктері келген.

АҚШ-тың Грузиядағы елшілігі Гавриловтың іс-әрекетін жұрттың көбі "қорлау" деп қабылдағанына түсініспеушілікпен қарайтынын мәлімдеп, барлық тарапты "сабыр сақтап, ұстамдылық танытуға және Конституция аясында әрекет етуге" шақырды.

Полиция мен демонстранттар арасында қақтығыс болған жерде тұрған зардап шеккен адам. Тбилиси, 21 маусым 2019 жыл.
Полиция мен демонстранттар арасында қақтығыс болған жерде тұрған зардап шеккен адам. Тбилиси, 21 маусым 2019 жыл.

Сергей Гаврилов Ресей мемлекеттің думасы сайтында жариялаған мәлімдемесінде Грузия парламентін "радикалдар басып алғанын", Ресей мен Грузияны "православиялық бауырластық байланыс біріктіріп" отырғанын айтқан.

1994 жылы құрылған Парламентаралық православие ассамблеясының бас кеңсесі Грекияда орналасқан. 2013 жылы қабылданған декларацияда ұйым мақсаты – православ христиандардың христиандық және демократиялық құндылықтар мен принциптер негізінде ынтымақтасуына септесу деп жарияланған.


ПІКІРЛЕР

XS
SM
MD
LG