19 тамыз күні түстен кейін Ресей күштері Украинаның Житомир қаласына әуеден шабуыл жасады. Житомир облыстық полициясы басқармасы ғимаратына дрон түскенін аймақ әкімшілігінің басшысы Виталий Бунечко Telegram-арнасында жазды.
Кейінірек Ұлттық полиция шабуыл салдарынан екі полиция қызметкері қаза тапқанын хабарлады. Шамамен 40 адам жараланған. Шабуылға ұшыраған жердің фотосуреттері де жарияланды.
Сәрсенбі күні таңертең Ресей күштері Херсонның Корабельный ауданында микроавтобусқа дронмен шабуыл жасаған. Херсон облыстық әкімшілігінің басшысы Александр Прокудин шабуыл салдарынан төрт кісі қаза тауып, бес адам жараланғанын хабарлады.
Бұған қоса, 19 тамызда Херсонның басқа аудандарына жасалған дрон шабуылдары салдарынан тағы екі адам – көлік жүргізуші әйел және 62 жастағы қала тұрғыны қаза тапқан. Ресей күштері Херсонға күн сайын дронмен шабуыл жасап келеді. Telegram-арналары таратқан видеоларда ресейлік FPV-дрондардың Херсон көшелерінде бейбіт тұрғындарды "аңдып-аулап" жүргені көрінеді.