Мұжтаба Хаменеи Иранның жаңа жоғарғы көшбасшысы болып жарияланды

Қатар қорғаныс министрлігінің мәлімдеуінше, ел аумағындағы Әл-Удейд әуежай базасына Иран баллистикалық зымыран атқылаған. Әл-Удейд – АҚШ-тың Таяу Шығыстағы ең ірі әскери базасы.

Хабарламада 3 наурыз кешке Иран Қатарға екі баллистикалық зымыран атқаны айтылған. Әуе қорғаныс жүйелері бір зымыранды қағып түсірді, екінші зымыран Әл-Удейд базасына түсті, зардап шеккендер жоқ деп хабарлады Қатар қорғаныс министрлігі.

Министрлік зымыран нақты қай жерге түскені я келген зақым көлемі туралы ешқандай ақпарат бермеді.

Доха қаласы маңында орналасқан Әл-Удейд базасын Қатар мен Ұлыбритания әскері пайдаланады. Бұған дейін Иран былтыр өзінің ядролық нысандарын АҚШ күштері бомбалаған кезде қарымта ретінде осы базаны нысанаға алған.

Иран зымыранмен атқылауын АҚШ пен Израильдің Иранға жасаған шабуылға қарымта деп атады.

Әл-Удейд базасында әдетте шамамен 10 мыңға жуық әскери және азаматтық қызметкер шоғырланған. Сонымен қатар бұл база аймақтағы АҚШ әскери операцияларының командалық орталығы ретінде пайдаланылады.

2026 жылғы 4 наурызда таңертең Ливан астанасы Бейрутта және тағы бірнеше қалада жарылыстар болды. Израиль АҚШ-пен бірлесіп Иранға қарсы әскери операция бастағаннан кейін аймақтағы өзге елдерде Тегеранға қолдау білдіріп, Израильге қарсы қару қолданған ираншыл күштерге жаңа шабуылдар жасаған.

Ливан билігі хабарлағандай, Бейруттан оңтүстікке қарай орналасқан екі қалаға Израиль жасаған шабуылдар салдарынан 6 адам қаза тауып, 8 адам жараланған. Мемлекеттік БАҚ Бейрут маңындағы қонақүй және Баальбек қаласындағы ғимарат шабуылға ұшырағанын хабарлады.

Сонымен қатар, Иракта Журф әл-Наср әскери базасына шабуыл жасалған. Иран қолдайтын Катаиб "Хезболла" әскери құрылымына тиесілі бұл базаға шабуыл салдарынан зақым келген.

Бұл оқиғалар АҚШ пен Израильдің Иранға жасаған кейінгі шабуылдарынан кейін Таяу Шығыстағы шиеленіс ауқымы кеңейіп отырғанын көрсетеді.

Қатар Иранның Ислам революциясы сақшылары корпусы мүддесіне тыңшылық жасаған деген күдікке ілінген 10 адамды тұтқындады.

Qatar News Agency хабарлауынша, Қатар билігі Иранның сақшылар корпусымен байланысы бар болуы мүмкін деген сезікпен екі жасырын топты анықтап, әлгі он адамды ұстаған. Олар тыңшылықпен айналысып, маңызды инфрақұрылымдарға қарсы саботаж әрекеттерін жасаған деген күдікке ілінген.

Ресми деректерге сәйкес, "жеті күдіктіге елдегі әскери және өзге маңызды нысандар бойынша барлау жүргізу туралы тапсырма" берілген, қалған үш адам "саботаж миссияларын орындау және дрон қолдану бойынша дайындықтан өткен".

Тергеушілердің айтуынша, күдіктілерден негізгі нысандардың координаттары көрсетілген карталар, байланыс құралдары мен технологиялық жабдықтар тәркіленген.

Билік күдіктілер тергеу барысында Иранның сақшылар корпусымен байланысы бар екенін, тыңшылық пен деструктивтік операцияларға тартылғанын мойындады деп хабарлады.

Иран үкіметі әзірге бұл хабарламаға байланысты еш пікір білдірген жоқ.

Халықаралық Журналистерді қорғау комитеті (CPJ) Таяу Шығыс аймағындағы жағдай қатты шиеленісіп тұрған шақта Иранда түрмеде отырған журналистердің қауіпсіздігіне қатты алаңдап отырғанын білдірді. Ұйым Иран билігін қамаудағы журналистерді дереу және ешқандай шарт қоймай босатуға үндеді.

CPJ мәліметінше, Иранда кемінде 15 журналист түрмеде отыр, олардың арасында ирандық-америкалық Реза Вализаде, жапон журналисі Шинносукэ Кавашима және Мохаммад Заре-Фумани бар. Олар Тегерандағы Эвин түрмесінде отыр.

Израиль әскери күштері бұл түрме орналасқан аймақтағы тұрғындарға ол маңнан көшуді ескерткеніне байланысты түрмеде отырғандардың қауіпсіздігі ерекше алаңдаушылық туғызған.

CPJ сондай-ақ, Иранда интернет толық дерлік өшіріп, байланыс үзіліп қалғаны тұтқындарды отбасы мен сыртқы әлемнен оқшаулап тастағанын айтты.

Құқық қорғау ұйымдары мен қамаудағы журналистердің туыстары Эвин түрмесіндегі жағдай нашарлағанын, соның ішінде азық-түлік жетіспейтінін, түрме басшылығы тарапынан бақылау азайғанын, бұл жайттар тұтқындардың тағдырына алаңдаушылықты күшейткенін айтып отыр.