23 қыркүйекте Астанада жаңа құрылған консультативтік орган - Халық кеңесінің бірінші сессиясында президент Қасым-Жомарт Тоқаев мәжілістің бұрынғы спикері Ерлан Қошановты осы органның төрағалығына ұсынды.
Қошановтың кандидатурасын ұсынған кезде Тоқаев “бұл азаматты бәріңіз жақсы білесіздер, жауапкершілігі жоғары, білікті, тәжірибесі мол тұлға. Ол мемлекеттік қызмет жүйесінде ұзақ жыл еңбек етті, бұл жұмысты абыроймен атқарды. Мәжіліс төрағасы ретінде ауқымды реформаларды іске асыруға белсене атсалысты” деді.
Ізінше оның кандидатурасы мақұлданды.
Қазақпараттың жазуынша, кеңестің 120 мүшесі оның кандидатурасын қолдаған, бір адам қалыс қалған. Жарамсыз бюллетень болмады.
Халық кеңесінің өзінен тікелей эфирде хабар таратылмады. Жиынға журналистер жаппай шақырылғаны жөнінде де хабар жоқ. Ақпарат құралдарының басым бөлігі жиын барысын Ақорда хабарламасы және мемлекеттік БАҚ арқылы қадағалады.
Тоқаев Халық кеңесін билік пен халық арасында диалог орнататын консультативтік орган ретінде құрған. Жаңа Конституцияда бұл орган "халық мүддесін білдіретін жоғарғы орган" деп жазылған. Кеңестің 126 мүшесі болады. Олардың бәрін президент тағайындайды. Бұл орган Құрылтайға заң жобаларын енгізе алады әрі референдум тағайындау туралы бастама көтереді.
Бұған дейін қаржы министрлігі Халық кеңесінің жұмысына жылына 1,7 млрд теңге бөлінетінін, мүшелеріне жалақы берілетінін айтқан.
Бір күн бұрын Халық кеңесінің құрамы белгілі болды. Сәрсенбі күнгі алғашқы сессия кезінде Тоқаев кеңеске “кәсіби білігі жоғары мамандар, абырой-беделі зор, нағыз отаншыл азаматтар мүше болғанын” айтты.
Ерлан Қошанов 2022 жылғы Қаңтар оқиғасынан кейін парламенттің төменгі палатасының спикері болған.
Оның алдында, 2019 жылдың қыркүйегі мен 2022 жылдың ақпаны аралығында, президент әкімшілігін басқарған. Одан бұрын екі жыл Қарағанды облысының әкімі болды.
Қошанов жылдар бойы түрлі лауазымды қызметтер атқарды, парламенттің жоғарғы және төменгі палаталарында да депутат болды. Көктемде басқарушы "Аманат" таратылғанға дейін оған төрағалық та етті.
