Ресей соғыста 1351 әскериі қаза болғанын айтады
Ресей қорғаныс министрлігі соғыста 1351 әскери қаза болып, 3825 әскериі жараланғанын мәлімдеді. Ведомство соғыс басталғалы әскерилері арасындағы шығынды екінші рет жариялап отыр. 2 наурызда Ресей 198 әскериі қаза тапқанын айтқан еді.
Киев бір айдың ішінде Ресей 13 мыңнан аса әскериінен айырылды (қаза тапқандар мен жараланғандар) деп мәлімдеді. АҚШ қорғаныс министрлігі бір айда Ресей кемі 7 мыңға жуық әскериін жоғалтты деп есептейді.
Украина әскері Киев маңында Ресей әскерін тықсырып жатқаны айтылды
Ұлыбритания қорғаныс министрлігі Украина әскерилері Киевтің шығысында Ресей әскерін тықсырып, Киевтен 35 шақырым жердегі қалалар мен жерлерді қайта бақылауға алды деп мәлімдеді.
Америкадағы соғысты зерттеу институты (ISW) Украина әскерінің шабуылынан ресейлік әскерилер Киевтің солтүстік-батысында қорғанысқа көшуге мәжбүр болды деп жазды. Институт Украина күші Ресей әскеріне Чернигов облысын қоршауға мүмкіндік бермеді дейді.
Украина президенті кеңсесі жетекшісінің кеңесшісі Алексей Арестович Ресей әскерилері Киевтің солтүстік-батысындағы Гостомель қаласынан қашып кетті деді.
АҚШ жыл соңына дейін Еуропа одағына 15 млрд куб метр сұйытылған табиғи газ жібереді. Осы арқылы Батыс елдері Ресей газының импортын төмендетпек. Еуропа одағы көлікке қажетті сұйытылған газдың 40 пайызын Ресейден алады.
Мариупольдегі драма театрға шабуылдан кемі 300 адам қаза болғаны айтылды. 16 наурыз Ресей әскері қаладағы драма театрға әуеден шабуыл жасаған еді. Театрдың жертөлесінде мыңнан аса адам бас сауғалап отырған.
"Куәгерлер тарапынан Мариупольдегі драма театрға шабуылдан 300-дей адам қаза тапқаны жайлы хабар алдық" деді қалалық кеңес.
Мариуполь қаласы бірнеше аптадан бері Ресейдің қоршауында тұр. Украина президенті Зеленский қалада әлі 100 мың адам бар деген еді.
Соғыс уақытында мұндай ақпараттарды тәуелсіз дереккөздерден тексеру мүмкін емес.
Мариуполь. Бомбаланған драма театр
