Австралия Ресей олигархтары мен олардың туыстарына санкция жариялады
Жеке санкцияға ілінгендер: Роман Абрамович, Әлішер Усманов, Алексей Мордашов, Алексей Миллер және Сергей Иванов. Сондай-ақ санкцияға Игорь Шувалов пен оның әйелі және екі ересек баласы, Борис және Аркадий Ротенбергтердің ересек балалары, Игорь Сечин мен Николай Патрушевтің ұлдары, Евгений Пригожиннің әйелі мен екі баласы ілінген. Санкция жарияланған бұл адамдар Австралияға бара алмайды, олардың ондағы мүлкі бұғатталады.
Киевтің батысындағы «Антонов» авиациялық зауыты өртке оранды. Мұның алдында зауыттың атқыланғаны хабарланған. Әзірге қаза тапқандар не зардап шеккендер туралы дерек жоқ. Әлеуметтік желіде өрттің видеосы тарады:
Украина бас прокуратурасы: Ресей елге басып кіргелі 90 бала мерт болды
Украина бас прокуратурасының хабарлауынша, Ресей Украинаға басып кіргелі елде 90 бала қаза тауып, 100-ден астам бала жарақат алған. Көбіне Киев, Харьков, Донецк, Чернигов, Сумы, Херсон, Николаев және Житомир облыстарындағы балалар зардап шеккен.
БҰҰ: Соғыс басталғалы Украинадан 2,6 миллион босқын шетелге кетті
Біріккен Ұлттар Ұйымының босқындар жөніндегі жоғарғы комиссары Филиппо Гранди Ресей Украинаға басып кіргелі Украинадан 2 698 280 босқын қашқанын мәлімдеді.
Сенбі, 12 наурыздан 13 наурызға қараған күні елден 100 700 адам кеткен.
Грандидің айтуынша, Екінші дүниежүзілік соғыстан бері Еуропада мұншалық көп босқын шетелге қашпаған.
Соғыс басталғанға дейін Украинада Киев бақылауындағы аумақта 37 миллион адам тұрған. Бұл есепке ресейшіл сепаратистер бақылауындағы жікшіл аймақтар және Ресей аннексиялаған Қырым халқы кірмейді.
Шетелге қашқан украиналық босқындардың жартысынан астамы Польшаға барған. Польша шекара қызметінің есебінше, Украинадан келген 1 675 мың адам тіркелген. Польшадан Украинаға өтіп жатқандар да бар. Ондаған мың адам өткен. Бірі соғысқа қатысу үшін, бірі қалып қойған туыстарына көмектесу үшін барған.
Соғысқа дейін Польшада Украинаның 1,5 миллион азаматы тұрған.
12 наурыздағы мәлімет бойынша, Венгрияға 246 206 украин өткен. Ал Словакия Украинадан 195 980 босқын қабылдаған.
Ресейден пана іздегені де бар. 10 наурыздағы ақпарат бойынша, Ресейге 106 мың адам барған.
Украиндар сондай-ақ Молдоваға, Румынияға және Еуропаның өзге де елдеріне барып жатыр.
ПІКІРЛЕР