Украиналық дрондар Ресейдің Краснодар өлкесіндегі Афип мұнай өңдеу зауытына, Башқұртстандағы "Газпром нефтехим Салават" кешеніне және алдын ала мәлімет бойынша, "Роснефть-Опт" мұнай базасына шабуыл жасаған.
Краснодар өлкесінің жедел штабы Афип мұнай өңдеу зауытында өрт шыққаны туралы телеграм-арналарының хабарын растады. Бірнеше елді мекенге дрон қалдықтары құлап, бір адам жараланған, тұрғын үйлер мен теміржол өткеліндегі ғимарат зақымдалған. Дрон шабуылы салдарынан жергілікті кәсіпорындардың бірінде өрт болған.
Украиналық Exilenova+ каналының мәліметінше, Ресейдегі ірі мұнай өңдейтін және мұнай-химия кешендерінің бірі – Башқұртстан аумағында орналасқан "Газпром нефтехим Салават" кәсіпорнында өрт шыққан.
Supernova+ деп аталатын украиналық тағы бір osint-каналдың дерегінше, мұнайды бастапқы өңдеу қондырғысы (ЭЛОУ-АВТ-6) мен тығыздығы жоғары полиэтилен шығаратын цех зақымданған болуы мүмкін. Astra каналы Салауатта "Роснефть-Опт" мұнай базасы шабуылға ұшыраған болуы ықтимал деп жазды.
Башқұртстан басшысы Салауат қаласының өнеркәсіп аймағына шабуыл жасалғанын растап, "атып түсірілген дрондардың сынықтарынан бірнеше жерде түтін шыққанын мәлімдеді.
Ал Supernova+ дерегінше, Керчь маңындағы энергокөпірде өрт шыққан және Азов теңізінде Ресейдің "тасадағы флоты" танкерлеріне тағы да шабуыл жасалған.