Зинаида Мухортова қазір үйінде, отбасымен қайта қауышыпты. Балқашта заңгердің сіңілісі, қызы мен екі немересі тұрады. Өткен аптада емдеу комиссиясы жасаған қорытынды бойынша Мухортова ауруханада жатып емделуге мұқтаж емес. Бірақ психиатриялық диспансерге тұрақты түрде барып, тексеріліп жүруі тиіс.
- Жақсы болып қалдым. Алты ай психиатриялық ауруханада жатқасын үйіңе келудің не екенін білсеңіз ғой. Бақыттымын, - деді Зинаида Мухортова Азаттыққа.
Оны ауруханадан уақытша босатқан. Зинаида Мухортова өзіне берілген дәрілерді үйінде ішіп, диспансерде тексеріліп тұруы қажет. Әзірше қанша уақыт мұндай бақылауда болатынын білмейді, бірақ келесі жылы біржола бостандық алам деп үміттенеді.
Балқаш қаласының психиатриялық-неврологиялық диспансері 15 желтоқсанда адвокат Зинаида Мухортованы үйіне жіберді. Заңгер бұл емдеу мекемесіне биылғы шілденің басында күшпен жатқызылған еді.
Қазақстанның адам құқықтары бюросы Астана филиалының жетекшісі Анар Ибраеваның сөзінше, диспансердің бас дәрігері Рысбек Исақов Балқаш қалалық сотына Мухортованы күшпен емдеуді тоқтату туралы талап-арыз түсірген.
- Ол (Мухортова - ред.) күн сайын жұмыс күндері ауруханаға барып белгіленіп тұрады. Оны емдеу демалысына жіберген, демалыс күндері үйінде болады. Мухортова күн сайын барып белгіленіп тұрам деп қолхат берген, - деді Анар Ибраева Азаттыққа.
Қарағанды облысындағы Балқаш қаласының психиатриялық диспансеріне 57 жастағы адвокат Зинаида Мухортова кезекті мәрте биылғы шілде айында түскен. Мухортованы қудалау 5 жыл бұрын басталған еді. 2009 жылы адвокат қаланың бес тұрғынымен бірге президент Нұрсұлтан Назарбаевқа және "Нұр Отан" партиясына осы аймақтан сайланған депутат Ерлан Нығматулиннің үстінен шағым жазған. Тұрғындар депутатты "сот ісіне араласады" деп айыптаған. Кейін арыз жазушылар қылмыстық жазаға тартылған.
