Қырғызстан президенті қазақ-қырғыз шекарасындағы жағдай оңалмаса, ЕАЭО-ның (Еуразия экономикалық одағы. – ред.) кезектен тыс отырысын шақыру құқығы бар екенін айтты.
Бұл туралы Алмазбек Атамбаев бүгін, 2017 жылы 15 қазан күні сайлауға дауыс беруге келген кезде мәлімдеді. Атамбаев Бішкектегі №1209 сайлау учаскесіне әйелі Раиса Атамбаевамен бірге келді.
Қырғыз мемлекетінің басшысы "Қазақстанның қырғыз сайлауына байланысты шекарада қосымша шаралар қабылдағанын" айтып;
- Қазақ билігі оның Қырғызстандағы сайлауға қатысты екенін айтады. Солай шығар, бірақ сайлау бүгін аяқталады. Егер бірінші турдан-ақ бәрі анықталса, алайда шекара ашылмаса, мен Қырғызстан президенті ретінде... Менің ЕАЭО президенттерінің кезектен тыс отырысын шақыруға құқығым бар. Егер бұл сайлаудан кейін де шекара ашылмаса, ЕАЭО (Еуразия экономикалық одағы. – ред.) бола ма, болмай ма деген үлкен мәселе туады, - деді.
Қазақстанмен арадағы шекара арқылы қатынау 10 қазан күні қиындаған. Қырғызстан шекара қызметінің мәліметіне қарағанда, сол күні кешкі сағат 18:00-ден бастап Қазақстан шекарадан өткізуді қиындатқан. Мұнан соң бірнеше күн шекарада ұзын сонар кезектер пайда болған.
Қырғызстан шекара қызметі Қазақстан шекарасынан өтудің жеңілдей бастағанын 13 қазан күні мәлімдегенімен, ертеңінде қырғыз-қазақ шекарасында жағдай өзгермегені туралы қайта хабарлады.
