Солтүстік Корея лидері Ким Чен Ын Оңтүстік Корея президенті Мун Чжэ Инмен кездесу кезінде Пхеньян мамыр айында ядролық полигондарын жабатынын айтқан. Бұл туралы Оңтүстік Корея президентінің баспасөз хатшысы Юн Ен Чхан хабарлады.
Оның айтуынша, Ким Чен Ын полигонның жабылуына америкалық сарапшылар мен халықаралық журналистерді шақыртуға уәде берген.
Кездесуде Солтүстік Корея лидері елдегі уақытты жарты сағат алға жылжытып, Оңтүстік Кореямен бір уақытқа көшуге келіскен. 2015 жылы "Пхеньян уақытын" енгізіп, уақытты жарты сағатқа шегіндірген.
27 сәуірде Ким Чен Ын мен Мун Чжэ Ин арасындағы келіссөз шекара түбіндегі Пханмунджом аймағында өтті. Ким Чен Ын 1953 жылдан бері Оңтүстік Кореяға бірінші рет барған Солтүстік Корея басшысы атанып отыр. 65 жыл бұрын Корей соғысында бітім жасалған, бірақ бейбіт келісімге әлі күнге дейін қол қойылмаған.
Ресми Астана Корей түбегіндегі келіссөздерді қолдайтынын мәлімдеген.
Ал АҚШ президенті Дональд Трамп Солтүстік Корея басшысы Ким Чен Ынмен алдағы бірнеше апта ішінде кездесуі мүмкін.
Ким Чен Ынның Оңтүстік Кореяға сапары
