Accessibility links

Ақтөбеде өртенген автобустың иесі Қазақстанға экстрадицияланды


Ақтөбе маңында жанып кеткен автобус. 18 қаңтар 2018 жыл.

Ақтөбеде биыл қаңтарда өртеніп, "салонындағы 52 өзбек азаматы тірідей жанып кеткен" автобустың иесі Өзбекстаннан Қазақстанға экстрадицияланды. Бұл туралы 26 желтоқсанда Қазақстанның Бас прокуратурасы хабарлады.

"Техникалық ақауы бар автобусты заңсыз пайдаланған" деп күдікке ілінген 46 жастағы Ордухан Мехтиев - Қазақстан азаматы. 2018 жылғы 18 қаңтар күні жолаушылар автобусы өртеніп кеткен соң Мехтиев қазақстандық құқық органдарына келмей, тергеуден қашып жүрген. Кейін Түркістан облысының Сарыағаш аудандық ішкі істер басқармасы оған халықаралық іздеу жариялап, Қылмыстық кодекстің "Көлiк құралдарын сапасыз жөндеу немесе оларды техникалық ақауларымен пайдалануға шығару" туралы 348-бабының 4-тармағы бойынша айып таққан. Ордухан Мехтиев 20 қарашада Ташкенттің Сергелі ауданында ұсталған.

Қазақстан Бас прокуратурасы Ордухан Мехтиевтің 26 желтоқсан күні Шымкент қаласындағы тергеу изоляторына жеткізілгенін мәлімдеді.

Биыл 18 қаңтарда Ақтөбе облысының Ырғыз ауданы Қалыбай ауылынан 10 километр қашықта Шымкент - Самара жолында жолаушылар автобусы өртенген. Билік орындарының хабарлауынша, автобуста барлығы 57 адам болған, олардың 52-сі қазаға ұшыраған. Құрбан болғандардың барлығы – Өзбекстан азаматтары. Екі жолаушы мен үш жүргізуші аман қалған.​

Кейін Ақтөбеде қайғылы оқиғаға байланысты іс қозғалып, бес адам қамалған. Аман қалған үш жүргізуші биыл қараша айында бес жылға, автобусты жалға алған "Азия транзит сервис" компаниясының құрылтайшысы мен автбоус механигі үш жарым жылға сотталған.

  • 16x9 Image

    Жаңагүл ЖҮРСІН

    Жаңагүл Жүрсін - Азаттықтың Ақтөбе облысындағы тілшісі. Қ.Жұбанов атындағы Ақтөбе университетін бітірген. Еңбек жолын Ақтөбе облыстық телевидениесінен бастап, әр жылдары осы өңірдегі түрлі БАҚ-та тілші, редактор, бас редактор қызметін атқарған. Азаттықпен 2011 жылдан бері әріптес.

ПІКІРЛЕР

XS
SM
MD
LG