Accessibility links

"Екі күнде 120 мың қол жинаған" Рақымбеков кандидат ретінде тіркелді


"Ауыл" партиясы ұсынған кандидат Төлеутай Рақымбеков Қазақстан орталық сайлау комиссиясынан кандидат куәлігін алды. Нұр-Сұлтан, 6 мамыр 2019 жыл.

"Ауыл" партиясы ұсынған кандидат Төлеутай Рақымбеков 6 мамырда кандидат ретінде тіркеліп, орталық сайлау комиссиясынан кандидат куәлігін алды.

Сайлау комиссиясының айтуынша, Рақымбеков міндетті 118 мыңнан асырып, 122 309 қол жинаған. Оның 1655-і есепке алынбай, 120 754-і саналған.

"Ауыл" партиясының кандидаты қол жинау қиын болмағанын айтады.

- Біздің партияда 320 мыңдай мүше бар. Сондықтан қол жинау қиын болған жоқ. 1-2 мамырда жинап, 3 мамырда дайын болды, - дейді Рақымбеков.

Бұған дейін ОСК "Нұр Отан" партиясы сайлауға үміткер ретінде ұсынған Қазақстанның қазіргі президенті Қасым-Жомарт Тоқаев пен "Ұлы дала қырандары" қозғалысы ұсынған үміткер Сәді-Бек Түгел, "Қазақстанның кәсіподақтар федерациясы" ұсынған Амангелді Таспиховті, "Ақ жол" партиясы ұсынған Дания Еспаеваны президенттікке кандидат ретінде тіркеген.

Президент сайлауына кандидаттарды тіркеу 11 мамырда аяқталады. Қазірге дейін саяси партиялар мен қоғамдық бірлестіктер ұсынған кандидаттардың тізімі:

Қазақстан құрылысшылары одағы ұсынған Талғат Ерғалиев кейін құжаттарын қайтарып алды. "Халық демографиясы" ұйымының үміткері Жұматай Әлиев тіл сынағынан өте алмады.

Қазақстанда 30 жылға жуық билік құрған Назарбаев 19 наурызда кенеттен президент қызметінен кететінін жариялап, сайлау өткенше Қасым-Жомарт Тоқаев президент болатынын айтқан. Тоқаев 20 наурызда ант беріп, президент қызметіне кіріскен.​ 9 сәуірде Тоқаев Қазақстанда биыл маусымның 9-ы күні кезектен тыс президент сайлауы өтетінін жариялаған.​

Қазақстандық кей оппозициялық ұйымдар ерте сайлауға бойкот жариялаған.

1 мамырда Алматы мен Нұр-Сұлтанда жүздеген адам наразылыққа шығып, биліктен әділ сайлау өткізуді талап етті. Олардың кейбірін кейін әкімшілік жазаға тартты.

  • 16x9 Image

    Әсемгүл МҰХИТҚЫЗЫ

    2004 жылы Павлодар мемлекеттік университетін журналистика мамандығы бойынша тәмамдаған. "КТК-7"  телеарнасында тілші  (2003-2005), "Қазақстан-Павлодар" облыстық телеарнасында редактор, шеф-редактор (2005-2013), "Астана" телеарнасы Павлодар облысындағы меншікті тілшісі (2013-2019) болып жұмыс істеген. 2019 жылдан бері Азаттықтың Нұр-Сұлтан қаласындағы тілшісі.  

ПІКІРЛЕР

XS
SM
MD
LG