Accessibility links

БАҚ: Маңғыстауда бұрынғы басшы парақорлық айыбымен он жылға сотталды


Ақтау қаласындағы сот ғимараты. Көрнекі сурет.

27 тамызда Маңғыстау облыстық қылмыстық істер бойынша мамандандырылған ауданаралық сотының үкімімен облыс әкімінің бұрынғы бірінші орынбасары Серік Аманғалиев жемқорлық ісі бойынша айыпты деп танылып, он жылға сотталды деп хабарлайды жергілікті «ИнАктау» жаңалықтар сайты. Сот шешіміне сәйкес, Аманғалиев мемлекеттік лауазымды қызмет атқару құқығынан айырылды және жазасын қоныс колониясында өтейтін болады.

Азаттық облыстық соттан үкім туралы ақпарат ала алмады. «ИнАктау» басылымының хабарлауынша, соттағы соңғы сөзінде Аманғалиев судьядан өзін бас бостандығынан айырмауды, жазаның басқа түрін қолданып, айыппұл салуды сұраған.

Серік Аманғалиев 2018 жылғы қарашада Ақтау әуежайында ұсталған. Тергеушілердің болжамы бойынша, ол мемлекеттік - жекеменшік серіктестік аясында құны төрт жарым миллиард теңгеге бағаланған (11,7 миллион доллар) «инвестициялық жобаны жалпы қамқорлығына алғаны» үшін шетелдік құрылыс компаниясы өкілінен пара алған деген күдікпен ұсталған. Сол кезде жемқорлыққа қарсы қызмет Ақтауда мұз айдынын салуға қатыспақшы болған словакиялық кәсіпкер Ян Хованның «пара берген» деген күдікпен ұсталғаны туралы мәлімдеген. Жергілікті басылымдар оны Чехияда тіркелген H+H TECHNIKA компаниясының құрылтайшысы деп атаған.


Қазақстан билігі сыбайлас жемқорлықпен күрес туралы арнайы заң мен түрлі бағдарлама қабылдап, "парақорлықпен пәрменді күрес жүргізіп жатқаны" туралы жиі мәлімдеп келеді. Билік елде жемқорлықпен күрес бағдарламалары жүзеге асып жатқаны туралы үнемі айтады.

Берлинде орналасқан Transparency International халықаралық ұйымының биыл қаңтарда жариялаған Жемқорлық индексінде (CPI) Қазақстан 124-орында тұр.

ПІКІРЛЕР

XS
SM
MD
LG