Accessibility links

Ішкі істер министрі "Кексель ісінің" тоқтатылғанын растады


Ішкі істер министрі Ерлан Тұрғымбаев.

Қазақстанның ішкі істер министрі Ерлан Тұрғымбаев арнайы прокурорлар қызметінің бұрынғы жетекшісі Олеся Кексельге байланысты істің тоқтағанын растады.

"Қылмыс құрамы жоқ болғандықтан Кексельге байланысты сотқа дейінгі тергеу амалдары тоқтады. Барлық тергеу амалдары жүргізілді және қазір заңдылығын тексеру үшін барлық материалдар прокуратураға жіберілді" деді 13 желтоқсанда журналистердің сұрақтарына жауап берген Ерлан Тұрғымбаев.

Олеся Кексель мен бас прокуратураның тергеу тобының мүшесі Бауыржан Ғаббасовқа қатысты сотқа дейінгі тергеу амалдары басталғанын ең алғаш болып "Время" газеті хабарлаған. Басылымның жазуынша, істің қозғалуына кәсіпкер Набиевтің шағымы түрткі болған. Ішкі істер министрі Ерлан Тұрғымбаев бұған дейін бас прокуратураға бір азаматтың шағым түсіргенін, онда аталған азаматтардың тергеу амалдарында заңға қайшы әдістерді қолданғаны туралы шағымданғанын айтқан. Олар "Азаптау" бабы бойынша күдікке ілінген.

21 қарашада бас прокуратура Кексель ісі тоқтағанын мәлімдесе, ішкі істер министрі бұл деректі растамаған еді.

Оқи отырыңыз: "Олеся Кексельдің ісіне" қатысты қарама-қайшы ақпарат тарады

Олеся Кексель бұрынғы премьер-министр Серік Ахметов, бұрынғы ұлттық экономика министрі Қуандық Бишімбаев, бұрынғы денсаулық сақтау министрі Жақсылық Досқалиевтің ісі сияқты Қазақстандағы ірі даулы істер бойынша тергеу тобына жетекшілік еткен. Ол мамыр айында арнайы прокурорлар қызметінің жетекшісі қызметінен босатылған.

  • 16x9 Image

    Әсемгүл МҰХИТҚЫЗЫ

    2004 жылы Павлодар мемлекеттік университетін журналистика мамандығы бойынша тәмамдаған. "КТК-7"  телеарнасында тілші  (2003-2005), "Қазақстан-Павлодар" облыстық телеарнасында редактор, шеф-редактор (2005-2013), "Астана" телеарнасы Павлодар облысындағы меншікті тілшісі (2013-2019) болып жұмыс істеген. 2019 жылдан бері Азаттықтың Нұр-Сұлтан қаласындағы тілшісі.  

ПІКІРЛЕР

AzattyqTV

Онлайн оқуға дайындық қалай?
please wait

No media source currently available

0:00 0:04:07 0:00
XS
SM
MD
LG