Көкшетау қаласы әкімдігі жергілікті белсенді Базарбай Машариповке карантиннен соң бір адамдық пикет өткізуге рұқсат бермеді. Белсенді 12 мамырда жазған өтінішіне әкімдіктің жауабын 20 мамырда алғанын, бірақ жауапта 15 мамыр деп көрсетілгенін айтады.
Машариповтің сөзінше, әкімдік өтініште қала мәслихаты белгіленген орынды көрсету керек деген. Белсенді билік талабын орындап, қайта арыз тапсырғанымен, рұқсат бермегенін айтады.
- Мен қалалық мәслихат бекіткен үш орынның бірі - Нұрсұлтан Назарбаев көшесіндегі ауған соғысы жауынгерлеріне қойылған ескерткіш маңына 30 мамырда шығатыным туралы қайта хабарлама тапсырдым. "Бейбіт жиын туралы" жаңа заңға сәйкес рұқсат күтуім міндетті емес екенін айтып едім, әкімдіктегілер "біз жаңа заңның оның қабылданғанын әлі естімедік" деп жауап берді, - деді ол Азаттыққа.
Көкшетау қаласы әкімі Амангелді Сымайлов қол қойған жауапта пикет өткізуге рұқсат берлімейтіні туралы жазылған, бірақ себебі көрсетілмеген. Белсенді жергілікті биліктің өзіне қалалық мәслихат белгілеген арнайы орынды көрсетпегені үшін рұқсат бермегенін ауызша түсіндіргенін айтады.
Машарипов бір адамдық пикетте үкімет басындағылардың отставкаға кетіп, парламенттік жүйеге көшуді, құқық қорғаушылар саяси тұтқын деп таныған белсенділерді босатуды, Нұр-Сұлтан түрмесінде қайтыс болған белсенді Дулат Ағаділдің өліміне қатысты тергеуді әділ жүргізуді, ақтөбелік белсенділер Аманбике Хайрулла, Серік Оразовтың өліміне қатысты тергеу амалдарын ашық әрі бейтарап жүргізуді талап етпек болған. Ол Көкшетаудың әлеуметтік мәселесін де айтып, елді белсенділікке үндегісі келгенін айтады.
Азаттық тілшісі Көкшетау әкімдігіне қоңырау шалғанымен, хабарласуға мүмкін болмады.
30 жастағы Базарбай Машарипов – Көкшетау маңындағы Қызылсая ауылының тумасы.
Қазақстанда қазіргі заңнамаға сай, жұрт митингіге шығу үшін жергілікті биліктен рұқсат алуы тиіс. Жергілікті әкімдіктер түрлі себеппен митингіге рұқсат ете бермейді. Елде рұқсат етілмеген митингілер заңсыз деп танылып, қатысушылары ұсталады. Қоғам мен халықаралық ұйымдар сынынан кейін Қазақстан билігі бұл заңды өзгертуге тырысып жатыр.
20 мамырда парламент "Бейбіт митинг туралы" заң жобасын мақұлдап, ел президенті Қасым-Жомарт Тоқаевтың қарауына жіберді. Заң жобасында бейбіт жиын кезінде маска тағу сияқты қорғаныш құралдарын қолдануға рұқсат беру, митинг орындарын көпшілікке көрінетін орталықтарда ұйымдастыру және митинг өткізетін орындардың санын үшке дейін жеткізу сияқты өзгерістер бар.
Сенат "Бейбіт жиындар туралы" заң жобасын қалай өзгертті?
ПІКІРЛЕР