Accessibility links

Ағаділдің туысы: Дулаттың ұлына үш жерден пышақ сұққан


"Үш жерден пышақталған". Дулат Ағаділдің ұлы Жанболаттың қазасының анық-қанығы
please wait

No media source currently available

0:00 0:03:19 0:00

11 қарашаға қараған түні Нұр-Сұлтанда төбелес кезінде қаза болған Жанболат Ағаділдің үш жеріне - шынтақ тұсы, 4-5 қабырғасының арасы және жүрегіне пышақ тиген. Бұл туралы Азаттыққа 11 қарашада күндіз мәйітханаға барып қайтқан ағасы Таңат Ағаділ айтты. Оның сөзінше, Жанболат Ағаділдің денесінен басқа соққы іздері байқалмаған.

Туыстарының айтуынша, 10 қарашада түнде жергілікті жастар Көктал мен Талапкер ауылы болып бөлініп, төбелескен. Сейсенбі күні Жанболатты достары кешкі сағат 9 шамасында үйде шәй ішіп отырған жерінен алып кеткен. "Қайда барасың?" деген кезде "қазір, бір жерге барып келейін" деп жауап берген. Түні бойы Жанболаттың жоғына алаңдаған туыстары таңертең қайғылы ақпаратты естіген.

"Қайғыдан қан жұтқан Жанболаттың шешесінің халі ауыр" дейді туыстары.

Төбелеске нақты не түрткі болғаны белгісіз. Осыған дейін әлеуметтік желіде полицияның ішкі құжаттарына ұқсас хабарлама тараған едіі. Онда "төбелестің қыз үшін болғаны" айтылады. Бұған қоса, Жанболат Ағаділдің жанында болған бірнеше жігіттің полицияға жеткізілгені, қарсы тарапта 7-8 адам болғаны да жазылған. Азаттық тілшісі Нұр-Сұлтан қалалық полиция департаментіне хабарласқанмен баспасөз қызметі бұл ақпаратты таратпағанын айтты.

Осыған дейін төбелес кезінде Жанболат Ағаділмен қатар тағы бір адамның жарақаттанғаны хабарланған еді. Бірақ бұл ақпарат ресми расталмады.

Оқиғаға байланысты Қылмыстық кодекстің 99-бап 2-бөлігі ("Адам өлтіру") және 293-бап 3-бөлігі ("Бұзақылық") бойынша қылмыстық іс қозғалған. Тергеу амалдары жүргізіліп жатыр.

Жанболат Ағаділдің жерлеуі 13 қарашаға жоспарланған

17 жастағы Жанболат Ағаділ биыл 24 ақпанда әкесі, азаматтық белсенді Дулат Ағаділді полиция түнде үйінен ұстап алып бара жатқанда араша түскен еді. Сол жолы курткасы жыртылған бозбала кейін әкесінің өлімінің әділ тергелуін талап етуімен де көзге түскен.

Нұр-Сұлтандағы тергеу изоляторында жұмбақ жағдайда көз жұмған Дулат Ағаділ өлімінен кейін Қазақстан қалаларында наразылық шаралары өтіп, оған қатысқандар белсендінің өліміне билікті айыптаған. ІІМ "Ағаділ жүрек талмасынан қайтыс болды" деп мәлімдеген. Марқұмның туыстары биліктің нұсқасына күдік келтіріп, ашық тергеуді талап еткен. Ал прокуратура белсенді өлімінен кейін ашылған қылмыстық істі жапқан.

  • 16x9 Image

    Сәния ТОЙКЕН

    Сәния Тойкен Азаттық радиосында 2007 жылдан бері жұмыс істейді. ҚазҰУ-дің журналистика факультетін бітірген. Республикалық  "Қазақстан пионері", "Жас Алаш" газеттерінде тілші болған. Қазақстан Республикасы Жекешелендіру жөніндегі комитетінің баспасөз хатшысы қызметін атқарған. Атырау облыстық "Ақ Жайық" газетінде  тілші, қазақ редакциясының редакторы, Маңғыстау облысында шығатын "Не хабар?!" апталығының редакторы болып жұмыс істеген. 

    Сәния Тойкен 2017 жылы журналист әйелдердің халықаралық қоры (IWMF) тағайындаған "Журналистикадағы батылдығы үшін" сыйлығын иеленді. Ол - бұл беделді сыйлықты алған алғашқы қазақстандық журналист.

ПІКІРЛЕР

XS
SM
MD
LG