Алматы облысының қылмыстық істер жөніндегі сот алқасы "трансгендер әйел Виктория Берікқожаеваны зорлады" деп айыпталған ұлттық қауіпсіздік комитетінің бұрынғы қызметкері С.А.-ның апелляциялық шағымын қанағаттандырмады. Сот сонымен бірге жазаны күшейту туралы шағым түсірген Берікқожаеваның өтінішін де орындамады.
6 қазанда Алматы облысының Іле аудандық соты "азаптау" және "зорлау" баптары бойынша айып тағылған С.А-ны 5 жылға бас бостандығынан айырған еді. Сот үкімі күшіне енді.
Апелляциялық сот отырысы онлайн режимде өтті. Айыпталушы оған Алматыдағы тергеу изоляторынан қатысты. Басқа іс бойынша сотталып, әйелдер колониясында жазасын өтеп жатқан Берікқожаева процеске қатысқан жоқ. Сотта оның мүддесін адвокат Айман Омарова қорғады. Ол айыпталушыны барынша қатал жазалауды сұрады. Оның сөзіне қарағанда, бірінші инстанцияда шыққан "жұмсақ" үкім жәбірленушіге қосымша моральдық салмақ түсірген.
ҰҚК бұрынғы қызметкерінің адвокаты Серік Ноғайбаев "айыпталушының кінәсі дәлелденбегендіктен оны толық ақтауды" сұрады. Ол бүгінгі қаулыға кассациялық шағым түсіретінін айтты.
Прокурор үкімді өзгеріссіз қалдыруды өтінді.
Берікқожаеваны зорлау фактісі бойынша қылмыстық іс 2019 жылы жазда қозғалған. Күзде "азаптау" айыбы да қосылды. Қазанда ҰҚК экс-қызметкері қамауға алынды.
Берікқожаева мен Омарова осыған дейін тергеу кезінде қатты қысымға ұшырағанын, істің сотқа жетуіне көп күш салғанын айтқан.
ПІКІРЛЕР