АҚШ президенті Джо Байден 2021 жылдың соңына дейін Иракта америкалық әскер өзінің миссиясын аяқтайды деп мәлімдеді. Байден бұл мәлімдемесін Ирак премьер-министрі Мустафа әл-Казымидің Вашингтонға сапары аясында жасады.
"Ислам мемлекеті" экстремистік ұйымға қарсы күресте Ирак билігімен әріптес орнату аймақтағы тұрақтылық үшін өте маңызды болды деді Байден.
Ол Ирак премьеріне америкалық әскер миссиясын аяқтағанымен, әріптестік жалғаса беретінін айтты.
Қазір Иракта АҚШ-тың шамамен 2500 әскері бар.
Байден америкалық әскер миссиясы аяқталғаннан кейін Иракта қанша әскери қызметкер қалатынын нақтыламады. Әскери сарапшылар сөзіне сүйенген батыс ақпарат агенттіктері едәуір дәрежеде қысқару болмайтынын жазды.
Вашингтон осыған дейін Ауғанстаннан 11 қыркүйекке дейін әскерін толық алып кету жөнінде шешім шығарған.
АҚШ президенті Таяу Шығыстағы терроризммен күресті тоқтатпайтынын айтып, бірақ негізгі назарды Қытайға бұратынын мәлімдеді. Вашингтон қазір АҚШ үшін Қытай әрекеті қауіпсіздікке қауіп төндіреді деп есептейді.
Ирак премьер-министрімен келіссөз кезінде АҚШ президенті коронавирусқа қарсы вакцина жіберуге уәде етті.
ПІКІРЛЕР