Биыл "Шаңырақ оқиғасына" 16 жыл толды.
2006 жылдың 14 шілдесінде Алматының шетіндегі Шаңырақ ықшамауданы тұрғындары мен осы елдімекендегі «заңсыз салынған үйлерді» сүру туралы сот шешімін орындауға келген полиция күші арасында ірі қақтығыс болып, бір полиция офицері қаза тапты, ондаған адам зардап шекті. Оның алдында полицияның көмегімен Бақай ауылындағы «заңсыз салынған» үйлер сүрілген еді.
Шаңырақта «тәртіпсіздік ұйымдастырды» деген айыппен 25 адам сотқа тартылды. Төрт адам көп жылға бостандығынан айырылды.
Осы іс бойынша 15 жыл түрмеде болған диссидент ақын Арон Атабекті билік былтыр күзде денсаулығы әбден нашарлап, әлсіреген шағында қамаудан босатқан. Өзіне тағылған айыппен келіспей, жылдар бойы толық ақтауды талап еткен Арон Атабек бірнеше аптадан соң аурухана төсегінде көз жұмды. Халықаралық құқық қорғау ұйымдары мен жергілікті белсенділер оның өліміне билікті кінәлап, түсініктеме беруді талап етті. Халықаралық дәрежеде тергеу жүргізу қажеттігін де алға тартты.
"Шаңырақ оқиғасы" бойынша ұзақ жылға сотталған тағы бір азамат Құрманғазы Өтегенов әлі түрмеде отыр. Сәуір айында Қостанай соты оның мерзімінен бұрын босап шығу туралы өтінішін орындамаған.
Құқық қорғаушылар "саяси іс" деп таныған "Шаңырақ ісі" бойынша сотталған тұтқынның түрмедегі жағдайын үнемі бақылап келе жатқан заңгер Гүлмира Қуатбекқызының айтуынша, Құрманғазы Өтегеновтің жазасы биыл тамызда аяқталуы тиіс. Ол қазір Қостанайдағы қауіпсіздігі жоғары УК-161/2 мекемесінде жазасын өтеп жатыр. Сот үкімі бойынша 16 жылға бас еркіндігінен айырылған Құрманғазы Өтегеновтің жаза мерзіміне 2013 жылы түрме әкімшілігінің "заңды талабына бағынбағаны" үшін тағы екі жарым жыл қосылған.
"Шаңырақ ісі" бойынша 15 және 14 жылға сотталған Ерғанат Тараншиев пен Рүстем Тұяқов 2018 жылы мерзімінен бұрын босатылған.
Шаңырақ оқиғасы, 14 шілде 2006 жыл.
ПІКІРЛЕР