24 қыркүйекте түстен кейін Қазақстан аумағында Азаттық сайты дұрыс ашылмай қалды, деп хабарлады оқырмандар. Rus.azattyq.org сайты не ашылмайды не ұзақ жүктеліп ашылады. Мұны "Қазақтелеком", "Билайн", "Актив" интернеттерін қолданған қолданушылар хабарлады. Кейбір оқырмандар сайтты VPN-нің көмегімен ашты.
Сенбі күні таңертең сайтта "Тоқаевтың "астыртын бизнесі" және "Мәскеудің Қазақстанды соғысқа араластыру ықтималдығы" атты мақала жарық көрген. Мақаланың алғашқы бөлігінде швейцариялық Public Eye ұйымының зерттеуі жөнінде айтылады.
Хакерлердің қолына түскен Қазақстанның қазіргі президенті Қасым-Жомарт Тоқаев пен ұлы Тимур Тоқаев арасындағы хаттармен танысқан батыс журналистері 2010 жылдары Тоқаевтың мұнай және металл өндіру саласында "астыртын бизнесі" болған деген қорытындыға келген. Зерттеушілердің айтуынша, Тимур Тоқаев пен оның қарындасының ұлы Мұхамед Ізбастин Abi Petroleum Capital компаниясының қағаз жүзіндегі иесі болған, ал іс жүзінде бенефициары Қасым-Жомарт Тоқаевтың өзі болған.
Швейцариялық ұйымның мақаласында Қасым-Жомарт Тоқаев пен Тимур Тоқаев 2007 жылы тіркелген вольфрам-молибден компаниясының бенефициары болған деп жазады. Аталған компания Қараоба және Солтүстік Қатпар кенішін өндіруге лицензия алған. Зерттеушілердің дерегінше, 2015 жылы Тоқаев сенат спикері болған кезде кеніш иелері оны "Самұрық-Қазына" қорына еншілес компанияға 7,7 млрд теңгеге сатқан.
Зерттеушілер Тоқаев әкімшілігіне хабарласқанмен жауап ала алмаған.
Сенбі күні кешке Қазақстан аумағында Public Eye ұйымының сайты да ашылмай қалды.
- Тоқаев 2019 жылы наурызда Нұрсұлтан Назарбаев отставкасынан кейін президент болған. Сол жылы маусымда кезектен тыс президент сайлауы өтіп, ресми мәлімет бойынша Тоқаев жеңімпаз атанды. Елде халық пікірімен санаспаған басқармалы транзитке қарсы жаппай наразылықтар өтті. Мыңдаған адам ұсталды.
- Бақылаушылар сол кезде Тоқаевты "жартыкеш президент" деп атаған, себебі ол кезде экс-президенттің ықпалы күшті болды. Назарбаев Қауіпсіздік кеңесін басқарып, басқару партиясына жетекшілік етті. Қаңтар оқиғасынан соң Назарбаевтың ықпалы әлсіреп, айналасындағы адамдар биліктен шеттетілді, кейбірі қамалды. Маусым айында Конституцияға өзгерістер енгізу бойынша референдум өтіп, Ата заңнан бірінші президент туралы пунктер алынып тасталды. Қыркүйекте Тоқаев бастамасымен Конституцияға тағы түзету енгізіліп, президенттік өкілеті жеті жылдық бір мерзіммен шектелді. Елде кезектен тыс президент сайлауы белгіленді. Тоқаев оған қатысатынын да жариялады. Әзірге бірде-бір кандидат ұсынылмады. Сарапшылар президент сайлауының нәтижесі алдын ала анықталып қойды деп санайды.
