Астанада полиция бірнеше адамды ұстап, кейін босатты

24 ақпанда Астанада бірнеше адамды полиция ұстап әкетіп, кейін босатты.

Жұма күні түстен кейін полиция Ресей елшілігі маңында пикет өткізбек болған құқық қорғаушы Артур Алхасовты ұстап, бір сағаттан соң босатты.

"Мені полиция әкімдік маңында шамамен сағат 15.45-терде ұстады. Байқоңыр полиция басқармасына жеткізді. Арнайы жасақ ұстады. Ол жақта бір сағаттай болдым. Пикет жасамауға үгіттеді. Мен заң бойынша пикет жасауға құқығым бар дедім. Ақыры босатып жіберді. Қазір плакатымды әкелуге кетіп бара жатырмын. Ресей елшілігіне барамын" деді полициядан шыққан Артур Алхасов Азаттық тілшісіне.

Айтуынша, ол бұған дейін әкімдікке пикет өткізетінін ескерткен, әкімдік жауап бермеген. Заң бойынша, атқарушы орган жауап бермесе, рұқсат еткен болып есептеледі.

BES.media телеграм-арнасының жазуынша, полиция "Артур Алхасовпен байланыс үзілген соң, оны іздеген" "Еркіндік қанаты" қорының екі қызметкерін де ұстаған. Олар да Байқоңыр полиция басқармасына жеткізілген. Әзірше олардың басқармадан шыққаны-шықпағаны белгісіз.

Жұма күні Masa.media сайты Украина елшілігі маңында сайттың редакторы Айдар Елкеевті полиция ұстап әкеткенін хабарлаған еді. 18.00-ге таман ол да босап шыққан. Ол Астананың Алматы аудандық полиция басқармасында болған.

Астана полициясы әзірше бұл оқиғаға қатысты түсінік бермеді.

24 ақпанда Ресейдің Украинаға басқыншылығына бір жыл толған күні Алматы мен Астанада Украинаны қолдау шаралары өтетіні хабарланған еді. Жұма күні күндіз Алматыда бірнеше адам Тарас Шевченко ескерткіші маңына жиналып, басқыншылықты айыптап, Украинаға қолдау білдірген. Оқиғаны полиция сырттай бақылап тұрды.

• Мейірім БАҚЫТЖАН

Ресей Украинаға қарсы соғыс бастағанына бір жыл толды. Соғыс ондаған мың адамның өмірін қиып, миллиондаған адамға қайғы-қасірет әкелді. Соғыстан қашқан украиндер де, ресейліктер де босып кетті. Халықаралық қауымдастық Ресейден соғысты тоқтатуды талап еткенімен, Мәскеу қантөгісті жалғастырып жатыр.

• Былтыр наурызда Алматы әкімдігі Украинадағы соғысқа қарсы митингіге рұқсат берген еді. Бұл шараға мыңдаған адам қатысып, Ресейдің Украинаға соғысына қарсы шыққан. Бірақ кейінгі уақытта әр аймақтың әкімдіктері Ресей басқыншылығын сынайтын бейбіт митингілерге рұқсат бермей келеді.