Қазақстанда тағы 9 адамнан коронавирус табылды
Қазақстан денсаулық сақтау министрлігінің 30 наурыз сағат 11:10-дағы дерегіне сай, елде тағы 9 адамнан коронавирус табылған. Алматыда - үш адам, Батыс Қазақстан облысында - 3 адам, Ақмола облысында үш адам дертке шалдыққан.
Қазір елде науқастар саны 293 адамға жетті. Барлығы 20 адам (Нұр-Сұлтан - 13, Алматы - 7) аурудан жазылған. 26 наурызда Ақмола облысы Қосшы ауылында 65 жастағы әйел адам коронавирустан қайтыс болған.
Вирус жұқтырған 293 адам мына қалаларда:
- Нұр-Сұлтанда - 167 адам
- Алматыда - 73 адам
- Атырау облысында - 12 адам
- Қарағандыда - 7 адам
- Ақмола облысында - 9 адам
- Алматы облысында - 6 адам
- Жамбыл облысында - 3 адам
- Шымкентте - 2 адам
- Батыс Қазақстан облысы - 2 адам
- Шығыс Қазақстан облысында - 2 адам
- Ақтөбе облысында - 2 адам
- Солтүстік Қазақстан облысында - 1 адам
- Павлодар облысында - 1 адам
- Маңғыстау облысында - 1 адам
- Қызылорда облысында - 5 адам.
Қазақстанда коронавирусқа байланысты 15 сәуірге дейін төтенше жағдай жарияланған. 28 наурыздан бастап Алматы, Нұр-Сұлтан, Шымкент қалаларында сақтық шаралары күшейтілді. Бұл қалаларда жұрт тек тамақ, дәрі алуға және жұмысқа шыға алады. Ал 30 наурыздан – 5 сәуір аралығында Нұр-Сұлтанда демалыс жарияланды. Бұл аралықта қалада қоғамдық көлік жүрмейді. Тек дәрігерлер, полицейлер, орган қызметкерлері мен коммуналдық қызмет өкілдері ғана жұмысқа шығады.
30 наурызда Қарағанды облысындағы Қарағанды, Абай, Саран, Шахтинск, Абай қалалары және Атырау қаласы карантинге жабылды. Ақтау қаласында да жұрттың сыртқа шығуына шектеу қойылды.
Қазақстан шетелдіктерге арналған 72 сағат визасыз жүру режимін уақытша тоқтатты
Қазақстан транзиттік жолаушыларға арналған 72 сағат визасыз жүру режимін 1 шілдеге дейін тоқтатты деп хабарлады primeminister.kz сайты. Қаулы қол қойған күннен бастап күшіне енеді.
2018 жылдың сәуір айынан бастап Нұр-Сұлтан және Алматы халықаралық әуежайы арқылы ұшқан Қытай және Үндістан азаматтарының елде 72 сағат визасыз жүру мүмкіндігі болған. Жергілікті БАҚ-тың жазуынша, бұл мүмкіндікті пайдаланғысы келген азаматтарды әуежайда шекара қызметі тіркеп, көші-қон карточкасын беруі тиіс болған.
Соңғы дерек бойынша, Қазақстанда 284 адамнан коронавирус табылған. Нұр-Сұлтанда - 167, Алматыда - 70 адамнан вирус табылған. 20 адам айыққан. 1 адам қайтыс болған.
16 наурызда елде төтенше жағдай жарияланып, қазір сегіз қала карантинге жабылған.
Эпидемияның тоқтағанын айтқан Қытай "екінші толқынынан" қауіптенеді
Өткен жылдың соңында коронавирус тараған Қытайда билік COVID-19 инфекциясының таралуын тоқтатқанын мәлімдеді. Қытай билігінің айтуынша, соңғы күндері тек ондаған адамнан коронавирус табылған және олардың басым бөлігі - шетел азаматтары. Эпидемия ушығып тұрған кезде Қытайда күніне мыңдаған адамнан вирус табылған болатын.
Мемлекеттік Синхуа агенттінінің хабарлауынша, шамамен үш мың адам коронавирустық инфекциядан емделіп жатыр. Шамамен 70 мыңнан астам адам айыққан, үш мыңдай адам қайтыс болған. Соңғы тәулікте коронавирустан үш адам қайтыс болған.
Бірнеше күн бұрын АҚШ пен Италия вирус жұқтырғандар саны бойынша Қытайдан алға шығып кеткен.
Алайда билік шетел азаматтарынан вирус табылып жатқандықтан эпидемияның екінші толқыны болуы мүмкін деп қауіптенеді. Бірнеше күн бұрын Қытай шетел азаматтарын елге кіргізуді тоқтатқан. Британдық Guardian газетінің жазуынша, Қытайда вирусқа байланысты шетел азаматтарынан сескену құбылысы байқалған.
Дегенмен эпидемия ошағы саналатын Қытайдың Ухань қаласында бірқатар карантиндік шаралар алына бастады. Ухань мен бірқатар қалалар арасында әуе байланысы қалпына келді. Қалада метро істей бастады. 8 сәуірден бастап қалада адамдар еркін жүріп-тұра алады.
Батыс ақпарат құралдары мен кейбір мамандар Қытай билігінің вирус жұқтырғандар мен қайтыс болғандар санына байланысты айтқан ресми дерегіне күмән келтіреді. Жергілікті дәрігерлердің статистика азайтылып көрсетілді деген айғақ-пікірлері бар. Қытайдағы статистиканың дұрыстығын дәлелдеген тәуелсіз дереккөз жоқ. Коронавирус туралы ақпарат елде қатаң цензураға ұшыраған.
Өзбекстанда 30 наурыздан бастап әуежайлардың жұмысы тоқтайды
Өзбекстанда 30 наурыздан бастап барлық әуежайлардың жұмысы тоқтайды. Коронавируспен күрес жөніндегі арнайы республикалық комиссия осындай шешім қабылдады деп хабарлады Азаттықтың Өзбек қызметі.
"30 наурыз сағат 00.01-ден бастап 20 сәуір сағат 00.01-ге дейін Өзбекстандағы барлық әуежайлардың жұмысы тоқтайды, әуе қатынасы толық үзіледі" делінген ресми хабарламада.
Сенбі күні Азаттықтың Өзбек қызметі - Озодлик радиосы шамамен жүз өзбек азаматының Мәскеудегі "Внуково" әуежайында бір аптадан астам уақыттан бері тұрып жатқанын, елге апаратын чартерлік рейсті күтіп жатқанын хабарлаған. Стамбул әуежайында да чартерлік рейсті күтіп отырған өзбек азаматтары бар.
Өзбекстан ақпарат құралдарының хабарлауынша, билік шетелде қалып қалған өзбек азаматтарын елге қайтаруға күш салып жатыр. Дегенмен Стамбул және Мәскеу әуежайындағы азаматтардың еліне қашан қайтатыны белгісіз.
29 наурыз түнгі дерек бойынша, Өзбекстанда коронавирус жұқтырғандар саны 144 адам болды. Емделіп жатқан 19 науқаста пневмония белгілері байқалған. Төрт науқастың жағдайы - ауыр. Екі науқастың жағдайы салыстырмалы түрде ауыр. 27-28 наурызда екі адам қайтыс болған.
Жексенбі, 29 наурызда билік жеті науқас айықты, бірақ карантинде қала береді деп мәлімдеді.