Алматы облысында вирус жұқтырғандар саны 7 адамға жетті
Қазақстан денсаулық сақтау министрлігі 30 наурызда түскі сағат 12:45-те Алматы облысында бір адамнан вирус табылғанын хабарлады. Осылайша облыста вирус жұқтырған саны жеті адамға жетті.
Жалпы елде науқастар саны 294 адам болды:
- Нұр-Сұлтанда - 167 адам
- Алматыда - 73 адам
- Атырау облысында - 12 адам
- Қарағандыда - 7 адам
- Ақмола облысында - 9 адам
- Алматы облысында - 7 адам
- Жамбыл облысында - 3 адам
- Шымкентте - 2 адам
- Батыс Қазақстан облысы - 2 адам
- Шығыс Қазақстан облысында - 2 адам
- Ақтөбе облысында - 2 адам
- Солтүстік Қазақстан облысында - 1 адам
- Павлодар облысында - 1 адам
- Маңғыстау облысында - 1 адам
- Қызылорда облысында - 5 адам.
Барлығы 20 адам (Нұр-Сұлтан - 13, Алматы - 7) аурудан жазылған. 26 наурызда Ақмола облысы Қосшы ауылында 65 жастағы әйел адам коронавирустан қайтыс болған.
30 наурызда Қарағанды облысындағы Қарағанды, Абай, Саран, Шахтинск, Абай қалалары және Атырау қаласы карантинге жабылды. Ақтау қаласында да жұрттың сыртқа шығуына шектеу қойылды. 31 наурызда Ақмола облысы да карантинге көшеді.
Қырғызстанда алғашқы науқас коронавирустан айықты
Қырғызстанның денсаулық сақтау министрі Космосбек Чолпонбаев Жалалабад облысында коронавирус жұққан бір науқастың айыққанын хабарлады. Науқас жақын арада ауруханадан шығады. Министр толық ақпаратты кейінірек айтатынын жеткізді.
30 наурызда инфекционист, пульмонолог, анестезиолог-реаниматологтардан құралған дәрігерлер тобы коронавирус жылдам тарап жатқан елдің оңтүстігіндегі елді мекендерге барды. Олар бір ай осы аумақта болады.
29 наурыз күнгі дерек бойынша, Қырғызстанда 84 адамнан коронавирус табылған. Ош облысында - 32, Жалалабад облысында - 40, Бішкек қаласында - 8, Баткен облысында - 1, Шу облысында - 2, Нарын облысында -1 адам дертке шалдыққан.
Дәрігерлер Атыраудағы науқастардың жағдайы туралы айтты
Атырауда коронавирус жұққан 12 науқастың жағдайы жақсы, басым бөлігінде ауру белгілері байқалмайды деп хабарлады Атырау облыстық аймақтық коммуникация қызметіне сүйенген "Ақжайық" сайты.
"Екеуінде құрғақ жөтел бар. Барлығына қажетті дәрежеде күтім көрсетіліп жатыр" деді басқарма өкілдері.
29 наурызда Атырауда вирус жұқтырған науқастар саны екі есеге көбейіп, 12 адамға жеткен.
Нұр-Сұлтанда тұрғындардың жұмысқа баруы үшін жұмыс орнынан анықтамасы болуы керек деп хабарлады коронавирусқа байланысты құрылған шұғыл штаб өкілдері.
Ақпарат құралдарында істейтін тілшілерде астанада ары-бері жүру үшін қызметтік куәлік және редакция тапсырмасы болуы керек.
Нұр-Сұлтан - Қазақстанда коронавирус ең көп табылған қала. Мұнда соңғы дерек бойынша, 167 адамнан вирус табылған. 18 адам айыққан. 19 наурызда қалада карантин жарияланып, өткен аптаның соңында тұрғындардың үйден шығуына тыйым салынды. Олар тек азық-түлік, дәрі-дәрмек сатып алу үшін немесе жұмысқа бару үшін сыртқа шыға алады. 28 наурызда қалада қоғамдық көлік тоқтаған.