Денсаулық сақтау министрі карантин кезінде жұрттың митингіге шыққанынан қарсы
Қазақстан денсаулық сақтау министрі Елжан Біртанов 4 маусымда өткен онлайн брифингте жұртты карантин кезінде митингіге шықпауға шақырды.
"Карантин кезінде жұрт көп жиналатын шараларға тыйым салынады. Бұл адамдар үшін қауіпті. Заңды сақтау керек. Пандемия кезінде, эпидемия кезінде бас санитарлық дәрігердің қаулысын сақтау керек. Митинг ұйымдастырушыларға айтарым, мұндай шараларды кейінге шегере тұрған дұрыс. Митинг вирустың жаппай тарауына әсер етеді. Біз бұған қарсымыз" деді министр.
Қазақстан билігін сынаушы, шетелде тұратын оппозициялық саясаткер, "Қазақстанның демократиялық таңдауы" қозғалысының жетекшісі Мұхтар Әблязов пен "Қазақстанның демократиялық партиясын" құрғысы келетін бастамашыл топтың жетекшісі, саясаткер Жанболат Мамай жұртты 6 маусымға билікке қарсы митингіге шақырған.
Әблязов құрған "Қазақстанның демократиялық таңдауы" қозғалысы 2018 жылы елде "экстремистік ұйым" деп танылып, қызметіне тыйым салынған. Ал Әблязов Қазақстан сотының шешімімен келіспейді. Еуропарламент 2019 жылғы наурыздағы резолюциясында ҚДТ-ны "бейбіт оппозициялық қозғалыс" деп атаған.
Мұхтар Әблязовқа Қазақстанда "ақша жымқыру", "қылмыстық топ құру", "адам өлтіруді ұйымдастыру" сияқты бірнеше баппен екі рет сырттай сотталды. Әблязов Қазақстан билігі таққан айыптың бәрін жоққа шығарып, "билікке оппозиция болғаным үшін өш алғысы келеді" деп санайды.
Ал Жанболат Мамай бастаған белсенділер елде "Демократиялық партия" құрғысы келген. Бірақ Мамай билік тарапынан қысымға шағымданған. Биыл ақпанда бастамашыл топ "партияның құрылтай съезін өткізуге билік кедергі жасап, съезге келетін делегаттарды жолдан алып қалды" деп мәлімдеген.
Құқық қорғаушылар елде ықтимал митинг қарсаңында белсенділер қамалып, митинг болады деп белгіленген орындардың қоршауға алынатыны әдетке айналған. Бұл жолы да Қазақстанның түрлі аймағында бірнеше белсенді жазаланды.
Министр: Қазақстанда коронавирус жұққан 37 науқас басқа аурудан қайтыс болған
Қазақстанда коронавирус жұққан 37 науқас басқа аурудан қайтыс болды. Бұл туралы 4 маусым күнгі онлайн брифинг кезінде денсаулық сақтау министрі Елжан Біртанов хабарлады. Министр елде коронавирусқа байланысты мәлімет жасанды түрде азайтылмауын мұқият қадағалаймыз деді.
- Коронавирустан қайтыс болған 48 адамнан бөлек тағы 37 адам басқа аурудан қайтыс болған. Бірақ оларда коронавирус инфекциясы ілеспе ауру түрінде кездескен. Біз Дүниежүзілік денсаулық сақтау ұйымының кеңесі бойынша [адам өлімін] тіркейміз. Инфекция науқастың тыныс алу жүйесін, пневмонияны асқындырып, оның өлімінің тікелей себебі болса, мұндай жағдайда бұл науқас коронавирустан қайтыс болды деген шешім қабылдаймыз. Ал егер науқас миокард инфарктынан, ауыр жарақаттан қайтыс болса, әрине мұндай жағдайда негізгі диагнозы негізгі болып қалады, - деді министр.
Оның айтуынша, Қазақстанда коронавируспен байланысты адам өлімі 0,4 пайызды құрайды. Бұл өзге елдермен салыстырғанда төмен көрсеткіш.
Ресми мәлімет бойынша, Қазақстанда коронавирустан барлығы 48 адам қайтыс болған. Соңғы екі аптада коронавирустан көз жұмған адамдар туралы ресми дерек пен вирус жұқтырғандар зиратына жерленгендер саны арасында айырмашылық бары туралы айтыла бастаған.
Оқи отырыңыз: Қазақстанда коронавирустан 37 адам қайтыс болған. Шын мәнінде одан көп пе?
Министрлік коронавирус жұққан бірақ басқа аурудан қайтыс болғандар саны туралы мәліметті алғаш рет айтып отыр.
Министрдің сөзіне қарағанда Қазақстанда коронавирус жұққан 12 124 науқас анықталған. 6 288 адам жазылған, қазір 5836 адам емделіп жатыр. Науқастардың 77 пайызында ауру белгілері жоқ.
59 науқастың жағдайы күрделі. 24 адам жасанды тыныс алу аппаратымен демалып жатыр. 10 пайызы немесе 600-ге жуық науқастың жағдайы - орташа.
Біртанов халықаралық тәжірибені ескере отырып, бұдан былай ауру белгілері байқалмаған бірақ COVID-19 диагнозы анықталған науқастар үйде емделетінін айтты. "Ең бастысы науқастарды уақытында анықтау және емдеу" деді министр.
Алматының бұрынғы бас санитар дәрігері ғылыми орталық жетекшісі болып тағайындалды
Алматы қаласының бұрынғы бас санитар дәрігері Айзат Молдағасымова Жұматов атындағы гигиена және эпидемиология ғылыми орталығының директоры болып тағайындалды. Бұл туралы жергілікті ақпарат агенттіктері хабарлады.
Елде коронавирус індеті өршіп тұрған шақта - сәуір айының ортасында Айзат Молдағасымованың Алматы қаласының бас санитар дәрігері қызметінен кеткені хабарланған еді. Оның орнына Жандарбек Бекшин келген.
Informburo сайтының жазуынша, бұған дейін шенеуніктің "өзіне ірі көлемде сыйақы тағайындағаны туралы" ақпарат пайда болған. Молдағасымова Halyk Bank-тен ақшалай сыйақы алғанын растап, бірақ сыйақыны өзі тағайындамағанын айтқан. Кейінірек жемқорлыққа қарсы іс-қимыл агенттігі Алматы қаласындағы "медицина қызметкерлеріне үстемақы үлестіру ісі" бойынша тексеру басталғанын хабарлаған.
Сәуір айында Алматыда орталық қалалық клиникалық аурухананың 200-ге жуық медицина қызметкеріне коронавирус жұққаны анықталған кезде Молдағасымова дәрігерлердің өздері "қажетті дәрежеде сақтық шараларын жасамады" деп мәлімдеген. Ал дәрігерлер мен медбикелер бұл тұжырыммен келіспей, кейбір дәрігерлер бас санитар дәрігерін сотқа беретінін айтқан.
Қарағандыда қайтыс болған ер адам коронавирус анықталған ұжымда жұмыс істеген
Қарағанды облысында коронавирустан қайтыс болған 56 жастағы ер адам бұған дейін жұмысшыларынан вирус анықталған ұжымда жұмыс істеген. Бұл туралы Қарағанды облыстық денсаулық сақтау басқармасы хабарлады. Ер адам 3 маусымда көз жұмған. Бұл облыста коронавирусқа байланысты тіркелген төртінші өлім. Науқаста созылмалы аурулар - артық салмақ және екінші дәрежелі кардиомиопатия болғаны айтылады. Басқарма өкілдерінің айтуынша, науқаста екіжақты пневмония, "тыныс алу және бүйрек жетіспеушілігі" болған, COVID-19 ауруының ауыр түріне шалдыққан. Ауру белгілері 15 мамырда байқалған.
Басқарма өкілдерінің айтуынша, науқас дене қызуын өз бетімен төмендетуге тырысқан. Екі күннен кейін жедел жәрдем көлігін шақырған. Оны әуелі провизорлық ауруханаға жатқызған, кейінірек COVID-19 диагнозы қойылғаннан кейін инфекциялық ауруханаға ауыстырған.
Денсаулық сақтау басқармасының хабарлауынша, облыста сәрсенбі күні 68 жаңа науқас анықталған. Қарағанды, Теміртау қалалары, Бұқар жырау, Абай, Шет, Ұлытау аудандары тұрғындарынан вирус табылған. Олар науқастармен жақын араласқан.
Қарағанды облысында 20 наурыз бен 3 маусым аралығында 1024 науқас тіркелген. 4 адам қайтыс болған. Олар Қарағанды, Теміртау, Шахтинск қалаларында тұрған. 314 науқас жазылған.
Қазақстанда ресми мәлімет бойынша, 12 067 адамнан коронавирус табылған. 48 адам қайтыс болған. Өткен тәулікте 271 адамнан вирус табылды. Барлығы 6240 адам жазылған.
ПІКІРЛЕР