Ресейдің байланыс, ақпараттық технологиялар және бұқаралық коммуникациялар саласын қадағалайтын федералдық қызметі (Роскомнадзор) қазақстандық ҚазТАГ агенттігі сайтын бұғаттауды талап еткен. Бұл талап агенттік бас директоры Әсет Матаев пен бас редакторы Әмір Қасеновке қатысты қылмыстық іс туралы жарияланған материалдарға байланысты қойылды деп жазды ҚазТАГ.
ҚазТАГ мәліметінше, Роскомнадзор талабына 2026 жылғы 20 қаңтарда Мәскеу қалалық соты қабылдаған шешім негіз болған. Ресей тарабы ҚазТАГ басшылығы, олардың адвокаттары және Freedom Finance салымшылары қатысқан баспасөз жиындарынан түсірілген видеолар мен көпшілік алдындағы мәлімдемелерді және өзге материалдарды авторлық құқықты бұзу деп бағалаған.
Роскомнадзор талабы ҚазТАГ сайты орналасқан серверлерді қамтамасыз ететін қазақстандық хостинг-провайдерге — "PS интернет компаниясы" жауапкершілігі шектеулі серіктестігіне жіберілген. Компания өкілдері ресейліктердің талабына қарамастан агентік сайтын бұғаттамағанын айтқан.
ҚазТАГ Ресейдегі сот процесі жөнінде алдын ала хабардар етілмегенін жазған. Агенттік ол жайында 3-4 ақпан күндері сайттың уақытша ашылмай қалуының себебін бірқатар қазақстандық интернет-провайдерлерден анықтаған кезде кездейсоқ білген.
Осы жағдайға байланысты ҚазТАГ Қазақстанның бас прокуратурасына, Ұлттық қауіпсіздік комитетіне, әділет министрлігіне, цифрлық даму министрлігіне, мәдениет және ақпарат министрлігіне сауал жолдап, Роскомнадзордың ҚазТАГ сайтын бұғаттау талабының құқықтық негізі бар-жоғын және Қазақстанның ақпараттық егемендігін қорғау үшін қандай шаралар қабылданып жатқаны жөнінде түсініктеме беруді сұраған.
Бұған дейін ҚазТАГ 4 желтоқсанда таңертең агенттік сайты "Қазақтелеком", "Транстелеком", Beeline, Activ және Tele2 провайдерлерінен ашылмай тұрғанын хабарлаған.
Былтыр желтоқсанның басында ҚазТАГ ақпарат агенттігінің бас директоры Әсет Матаев пен бас редакторы Әмір Қасенов "көрінеу жалған ақпарат таратты" деген күдікке ілінген. Желтоқсанның аяғында Қасенов үйқамаққа алынғаны белгілі болды.
Ақпарат агенттігінің үстінен Freedom Finance компаниясы арыз түсірген. Ақпарат агенттігі бұған дейін осы компаниядағы "алаяқтық схемалардан зардап шеккендер" жайлы деп бірнеше мақала мен видео жариялаған. ҚазТАГ басшылығы бұл қылмыстық істі сөз еркіндігін шектеу әрекеті деп атаған.
9 желтоқсанда Freedom Finance иесі, Ресейден шыққан, кейін Қазақстан азаматтығын алған миллиардер Тимур Турлов (Forbes журналы байлығын $5,8 млрд деп бағалаған) ҚазТАГ агенттігінің компанияның "алаяқтығы" туралы "біржақты 12 материал жариялауы" "жала жабу мен қоғам пікірін бұрмалауға бағытталған арнайы кампанияның" бір бөлігі болуы мүмкін деп мәлімдеген еді. Ол компания заң аясында өз ұстанымын қорғауға және мұның жала екендігін дәлелдеуге де дайын деген.