Украинаның кейбір қалаларында азық-түлік үш-төрт күнге ғана жетеді. Бұл туралы "Mercy Corps" (жылулық корпусы) халықаралық қайырымдылық ұйымы хабарлады. Ұйымның хабарлауынша, Украинадағы гуманитарлық жүйе "толық қираған" және Харьков пен Сумы қалаларының 70 пайыз халқы гуманитарлық көмекке зәру.
Мариуполь қалалық кеңесі бүгін, 22 наурызда Ресей әскерилері қалаға өте күшті авиабомба тастады деп мәлімдеді. Бұл қала бірнеше аптадан бері Ресейдің қоршауында қалған, қала кеңесі Мариупольде екі мыңнан аса бейбіт тұрғын қаза болды дейді.
Сондай-ақ Ресей әскері 22 наурызға қараған түні Николаев қаласындағы теңіз портын атқылағаны хабарланды.
"Порттың инфраструктурасының біраз бөлігі қирады. Қаза болғандар жайлы ақпарат түскен жоқ" деп хабарлады Украина теңіз порттары әкімшілігінің баспасөз қызметі.
Ресей қорғаныс министрлігі бұл ақпараттар жайлы ештеңе деген жоқ.
Соғыс уақытында мұндай ақпараттарды тәуелсіз дереккөзден тексеру мүмкін емес.
Украина қорғаныс министрлігі: Ресей бір күнде 300 әскериінен айырылды
Украина тарабы Ресей 21 наурызда 300 әскериінен айырылды және Ресейдің солдаттарының шығыны 15300 адамға жетті деп мәлімдеді. Осыған дейін украиналық басылымдар Ресейдің әскерилерінің шығынына қаза тапқандар мен жараланғандар да енеді деп жазған.
Соғыс уақытында мұндай ақпараттарды тәуелсіз дереккөздерден тексеру мүмкін емес.
Қоршауда қалған Мариупольде қаза болғандарды көшеге жерлеп жатыр
Бірнеше аптадан бері Ресей қоршауында тұрған Мариупольде мыңдаған адам қаза болды. Жұрт марқұмдарды көшеге жерлеп жатыр. Ал үйлерінен айырылған тұрғындар жертөледе бас сауғалауға мәжбүр. Қоршаудағы қаланың қазіргі көрінісі.
