Сәуірдің басында Ресей әскері Киев түбіндегі 15 елдімекенді тастап кетті. Бірақ азат болған ауылдарда қираған үй мен қараусыз қалған мәйіт көп. Сол ауылдардың бірі – Новая Басань. Азаттық радиосы Украин қызметінің фотографы орыс қаласының қолында болған осы ауылды суретке түсірді. (Галереядағы суреттер ауыр тиюі мүмкін)
Қараусыз қалған мәйіттер және күйреген орыс техникасы. Ресейден азат болған ауылдың күйі
Украина НАТО-дан қару-жарақ сұрады
Украина сыртқы істер министрі Дмитрий Кулеба Брюссельде НАТО бас хатшысы Йенс Столтенбергпен кездесті. Кездесуден кейін Кулебаның твиттерде жазғаны:
"Мұнда өте маңызды үш нәрсені – қару, қару және қару мәселесін талқылауға келдім. Украина көмекке зәру, бізге жеңіске жетуге көмектесетін қару-жарақты тұрақты түрде жеткізуді сұрадым" деп жазды Кулеба.
Кремльшіл тележүргізуші Владимир Соловьевтің Италиядағы Комо көлінің жағасындағы вилласына белгісіз біреулер қызыл бояу жағып, бассейніне де қызыл бояу құйып кеткен. Вилланың кіреберісінде "Убийца" (Адам өлтіруші") және "Нет войне" ("Соғысқа жол жоқ") деген жазу қалдырған.
Соловьевтің Италиядағы бұл вилласы Еуропаның санкциясына ілінген еді.
Буча қаласында қаза болған әйелдің тырнағындағы маникюрінен таныған. 2 сәуірде Reuters агенттігі Бучада тырнағы қызыл лакпен боялған әйелдің мәйітін жариялаған еді.
Қаза тапқан әйел Буча қаласының 52 жастағы тұрғыны Ирина Филькина болып шықты. Оны Гостемельде тұратын визажист Анастасия Субачева танып, желідегі парағына жазды. Бұған қоса Субачева америкалық New York Times газетіне де сұхбат берген.
"Украина мен әлемге тарап кеткен бұл фотодағы әйел – менің клиентім" деп жазды ол.
Субачеваның сөзінше, Филькина жылу орталығында оператор болып жұмыс істеген.
Филькинаның өлімін журналистерге оның қызы Ольга Щирук те растады. Щирук соғыс басталған соң Бучадан кетіп үлгерген.