Бүгін Петропавлдағы спорт сарайында 2018 жылғы Азия ойындарында 800 метр қашықтықта жүгіруден екінші орын иеленген Маргарита Мукашевамен кездесу өтті. Спортшы жарысқа дайындалу оңай болмағанын айтты.
- Жарыстағы нәтижеме өте ризамын. Біраз уақыт спортта болмағандықтан қарсыластарымды бағалау қиынға соқты. Былтыр 28 тамыз күні дүниеге сәби әкеліп, шамамен бір жарым айдан кейін жаттығуға кірістім. Тәуекелге баруым керек болды, - дейді ол.
Спортшы алдағы Азия чемпионатына бірнеше айдан кейін дайындықты бастауды жоспарлап отыр.
Солтүстік Қазақстан облыстық дене шынықтыру және спорт басқармасының басшысы Руслан Есеналин биылғы Азия ойындарында облыс спортшылары ең үздік көрсеткішке қол жеткізгендерін айтады.
- Биыл облысымыздың спортшылары Азиадада ие болған медальдар саны рекордқа жетті. Бұл спортшыларымыздың тәуелсіздік тарихындағы ең үздік көрсеткіші. Қазақстан 22 жыл бойы велотректен жүлде алған жоқ еді. Біздің Артем Захаров екі медаль әперді, - дейді Руслан Есеналин.
Фотогалерея. Қазақстан спортшыларының 15 алтыны
Қазақстанның 15 алтыны
Қазақстан спортшылары Индонезияда өткен Азия ойындарында 15 алтын, 17 күміс және 44 қола жүлдеге ие болды. Осылардың ішінде алты жүлде Солтүстік Қазақстан облысынан қатысқан спортшылардың еншісінде. Велоспортшы Алексей Луценко екі алтын, жеңіл атлет Маргарита Мукашева күміс, велотректен Артем Захаров екі қола және жеңіл атлет Михаил Литвин қола жүлде иеленді.
ПІКІРЛЕР