Accessibility links

Semey Bus қызметкерлері Семей салық инспекциясы мен прокуратурасының әрекетін тексеруді сұрайды


Semey Bus автопаркі қызметкерлері ереуіл кезінде. Семей, 10 тамыз 2020 жыл.

Semey Bus автопаркінің қызметкерлері Сыбайлас жемқорлықпен күрес агенттігінен Семей қаласы мемлекеттік кірістер комитеті мен прокуратурасының әрекетін тексеруді сұрап отыр. Олар бұл туралы 4 қыркүйек күні мемлекеттік органдарға арызданар алдында мәлімдеді.

- Тоғыз ай бойы әділетке қол жеткізе алмай, өзімізге тиесілі зейнетақы және медициналық төлемдерді ала алмай отырмыз. Осы уақыт аралығында 50-ге жуық арыз жаздық, ондаған ереуіл өткіздік. Ереуіл кезінде жүздеген адамды қабылдады, бірақ мемлекеттік органдард мораторийді желеу етіп біздің арыздарымызды қарастырмай отыр. Осыған орай біз Сыбайлас жемқорлықпен күрес агенттігінен Семей қаласы мемлекеттік кірістер комитеті мен прокуратурасы әрекетінің заңдылығын тексеруді сұраймыз, - дейді автопарк қызметкерлері кәсіподағының жетекшісі Наталья Борисевич.

Бір күн алдын автопарк қызметкерлері прокуратура мен мемлекеттік кірістер комитетінен жауап алды. Олар Semey Bus автопаркі шағын бизнесті тексеру мораторийіне жататын "микромекеме" деп, оны тексеруден бас тартты. Бұл мәлімдеме ұлттық экономика министрлігінің сайтындағы ақпаратқа қайшы. Онда Semey Bus ірі мекеме деп көрсетілген. Ол - сондай-ақ қаладағы ең автопарктердің бірі.

Автопарк сондай-ақ сондай қалалық прокуратураға жүгініп, комитеттің жұмыс берушінің "мүддесіне" жұмыс істеп отырмағанын тексеруді талап еткен. Мекеме сайтында Semey Bus автопаркінің зейнетақы және медициналық төлемдер бойынша қарызы жоқ деп көрсетілген. Осыған дейін компанияның 200 миллион теңге шамасында қарызы болған. Автопарк қызметкерлері төлемдерді алмағанын, сайттағы ақпараттың шындыққа жанаспайтынын айтады.

Мемлекеттік кірістер комитетінің әрекетсіздігіне шағым түскен Семей прокуратурасы тексеруге негіз жоқ дейді.

- Құрметті прокуратура өкілдері, сіздер бізге өтінішті елдің өміріне, денсаулығына және қауіпсіздігіне орны толмас зиян келтірілгенде, сондай-ақ адамдардың топ болып құқығы бұзылған жағдайда қарастырамыз дедіңіздер. Біздің жағдайымыз бұған жатпай ма? Не айтып тұрғандарыңызды түсінесіздер ме? Жүздеген адамның құқығының бұзылуы және мемлекеттік органдардың осы мекеменің мүддесін қорғауы сіздердің құзыреттеріңізге кірмей ме сонда? – деді кәсіподақ жетекшісі Борисевич.

Автопарк қызметкерлері компанияның еңбек құқықтарын жүйелі түрде бұзып отырғанын мәлімдейді. Олардың сөзінше, компания тиесілі жалақыны не кешіктіріп, не ұстап қалып отырады және міндетті төлемдерді аудармайды. Олар бірнеше рет қарсылық акциясын өткізіп, ереуіл ұйымдастырған. Олар медициналық төлемдердің жасалмауынан дәрігердің қабылдауына бара алмай отырғанын, ал зейнетақ төлемдерінің аударылмауынан карантин кезінде мемлекеттік жәрдемақыны ала алмағанын айтады.

2019 жылдың қыркүйегінен бастап жұмыс істеп келе жатқан Semey Bus автопаркінің 49 пайызы Семей қаласының әкімдігіне, 51 пайызы "Семей" автобус паркі" компаниясына тиесілі.

Осыған дейін мекемені тексеруден еңбек инспекциясы да бас тартқан. Автопарк қызметкерлері осы шағыммен оған да жүгінген. Тамыз айында көптеген ереуілден кейін тексеру өткен. Инспекция еңбек кодексінің бұзылуы жөнінде 72 фактіні тіркеп, оларды жоюды талап еткен. Қызметкерлердің айтуынша, заңбұзушылық толықтай ашылмаған.

  • 16x9 Image

    Хадиша АҚАЕВА

    Хадиша Ақаева - Азаттықтың Шығыс Қазақстан облысындағы тілшісі. Шәкәрім атындағы университетті журналистика мамандығы бойынша тәмамдаған. Армения және Грузиядағы басылымдарда тәжірибеден өткен. Азаттықпен 2019 жылдан бері серіктес.

ПІКІРЛЕР

XS
SM
MD
LG