Қазақстанда вирус жұқтырғандар 5036 адамға жетті
Қазақстан денсаулық сақтау министрлігі 10 мамыр таңертеңгі сағат 9.45-те тағы 61 адамнан коронавирус табылғанын хабарлады. Нұр-Сұлтан қаласында - 31, Алматы қаласында - 11, Жамбыл облысында - 1, Маңғыстау облысында - 7, Ақмола облысында - 3, Қызылорда облысында - 3, Батыс Қазақстан облысында - 2, Атырау облысында - 1, Қарағанды облысында 2 адамға вирус жұққан.
Елде вирус жұқтырғандар 5036 адамға жетті. 1766 адам жазылған. 31 адам қайтыс болған.
Қазақстанда 11 мамырда коронавирусқа байланысты жарияланған төтенше жағдай аяқталуы тиіс. Бірақ денсаулық сақтау министрлігі елде карантин шаралары біртіндеп алынатынын айтады.
Тәжікстанда бір күнде 90 адамнан коронавирус табылды, 6 адам қайтыс болды
Соңғы бір күнде Тәжікстанда 90 адамнан коронавирус табылды, 6 адам қайтыс болды деп хабарлады Азаттықтың Тәжік қызметі. Елде барлығы 612 адамға вирус жұққан, 20 адам қайтыс болған. 4700-ден астам адам дәрігерлер бақылауында.
Тәжікстан билігі бұған дейін ұзақ уақыт елде коронавирус барын мойындамай келген. Азаттықтың Тәжік қызметінің жазуынша, азаматтық қоғам қысымынан кейін билік елге Дүниежүзілік денсаулық сақтау ұйымы өкілдерін шақыруға мәжбүр болған. Жақында президент Эмомали Рахмон денсаулық сақтау министрін ауыстырды. 54 жастағы Жамолиддин Абдуллозода ведомство басшысы ретінде тағайындалған.
Соңғы кезде тәжік дәрігерлері медициналық киімдер мен дәрі-дәрмек тапшылығына жиі шағымдана бастаған.
Оқи отырыңыз: Тәжікстанда вирус жұқтырғандар күрт өсті. Ауруханаларда орын жетпей жатыр
Бұған дейін коронавируспен күрес жөніндегі республикалық штаб эпидемиологиялық ахуалға байланысты мектеп оқушыларын демалысқа жіберген, азық-түлік емес базарларын жауып, концерт, театр қойылымдары және өзге де қоғамдық шаралар өткізуге тыйым салған. Тәжікстанның дінбасылары мешіттерде топтасып намаз оқып, құлшылық қылуға тыйым салған.
Дегенмен елде қоғамдық көлік, мемлекеттік мекемелер, базарлар жұмыс істеп тұр.
Қазақстанда вирус жұқтырғандар 5056 адамға жетті
Қазақстан денсаулық сақтау министрлігі 10 мамыр түскі сағат 12.35-те тағы 20 адамнан коронавирус табылғанын хабарлады. Нұр-Сұлтан қаласында - 4, Алматы қаласында - 7, Шымкент қаласында - 4, Алматы облысында - 1, Атырау облысында - 2, Батыс Қазақстан облысында - 1, Түркістан облысында 1 адамға вирус жұққан.
Елде вирус жұқтырғандар 5056 адамға жетті. 1828 адам жазылған. 31 адам қайтыс болған.
Бұған дейін денсаулық сақтау министрі Елжан Біртанов елде эпидемиологиялық ахуал тұрақталды деп мәлімдеген. 9 мамырда Қазақстанда 141 адамнан коронавирус табылып, бір күнде 135 адам жазылды. Вирус жұқтырғандар саны жағынан Алматы мен Нұр-Сұлтан бұрынғыдай алдыңғы орындарда тұр.
Қарай отырыңыз: Қазақстанның коронавирус картасы
Қазақстанда 11 мамырда коронавирусқа байланысты жарияланған төтенше жағдай аяқталуы тиіс. Бірақ денсаулық сақтау министрлігі елде карантин шаралары біртіндеп алынатынын айтады.
Алматы әкімдігі карантинге байланысты мемориалға жіберілмеген ардагерден кешірім сұрады
Алматы әкімдігі карантинге байланысты мемориалға жіберілмеген ардагерден кешірім сұрады. Бұл туралы Tengrinews сайты жазды.
Youtube-та жарияланған видеода Алматы қалалық қоғамдық даму басқармасы жетекшісінің орынбасары Айдар Есенбековтің ардагерге "Біз кінәліміз, кешірім сұраймыз. Бұл коронавирустың тарауымен байланысты" деп айтқаны көрінеді.
9 мамыр - Жеңіс күні Алматыда панфиловшылар саябағындағы Мәңгілік алауға гүл қоюға келген ардагерді сақшылар және билік өкілдері саябаққа кіргізбей қойған еді. Ардагердің жанында тұрған адамдар қарт кісіні саябаққа жалғыз кіргізуді сұраған, бірақ билік өкілдері көнбей қойған.
Агенттіктің жазуынша, кейінірек ардагерге қаладағы панфиловшылар саябағындағы Мәңгілік алауға гүл қоюға рұқсат етілген. Екінші дүниежүзілік соғыс құрбандарын еске алуға келген ардагердің аты-жөні - Иван Абдулов. 1930 жылы туған. Ардагерлер сайтында оның балалар үйінде тәрбиеленгені, бала кезден соғысқа араласқаны, түрлі шайқастарға қатысқаны жазылған.
Қазақстанда Екінші дүниежүзілік соғыс Совет кезіндегідей «Ұлы Отан соғысы» аталады. Соғысқа қатысқан Қазақстандағы көзі тірі ардагердің саны – 1025 адам. Жеңістің 75 жылдығына орай оларға 1 млн теңгеге (2 мың 369 доллар шамасында) дейін бір жолғы жәрдемақы беріледі.
Оқи отырыңыз: Пандемия һәм парад. Постсовет елдері Жеңістің 75 жылдығын қалай атап өтті?