27 жастағы Мағжан Сағымбаев велосипедпен 2014 жылы 1 мамырда 28 мың километрлік жолға шығып, Еуразия, Солтүстік және Оңтүстік Америка және Австралияға Bike The Earth деп аталатын саяхатын бастаған.
«ЖИЫРМА ЕЛДІ АРАЛАП ШЫҚТЫМ»
Мағжан Сағымбаев велосипедімен Қазақстан, Өзбекстан, Түркіменстан арқылы Иранға өтіп, кейін Еуропаға жеткен. Еуропадан Америкаға ұшақпен жеткен Мағжан Сағымбаев қос Американы велосипедпен аралап шыққан.Саяхатшы сапар алдында тек Солтүстік Американы аралауды жоспарлаған екен. Кейін жоспары өзгеріп, Оңтүстік Америкаға да саяхаттады.
Одан кейін Австралияны аралап шыққан Мағжан Сағымбаев бұл күндері Қытайда жүр.
Мағжан Сағымбаев Азаттыққа берген сұхбатында саяхатының негізгі бөлігі аяқталғанын, бірнеше айдан кейін елге оралатын айтты.
– 20 елді аралап шықтым. 164 ірі қалада, 200-ден астам шағын ауылдарда болдым, - дейді саяхатшы.
Сағымбаев Қытайды екі айдай аралап, Қазақстан шекарасына өтпек. Қытайға дейін Лаос, Камбоджа, Таиланд елдерін аралап шыққан. Саяхатшы Камбоджада жергілікті балаларға ағылшын тілін оқытып, Лаостағы бірнеше тайпаларда қонақта болған. Эквадордағы Сumbre Rucu Pichincha шыңына шығып, Колумбияның Богота, Кали қалаларында Латын Америкасының мәдениетімен де танысқан.
- Еуропалықтар велосипедпен жиі саяхат жасайды. Таиландта англиялық, Австралияда швейцариялық велосипедшілерді кездестірдім. Арасында 65 жастағы ер адам да бар, - дейді ол.
БІР МИЛЛИОН 730 МЫҢ ТЕҢГЕЛІК САЯХАТ
Мағжан Сағымбаев сапарының түрлі хикаяға толы болғанын айтады. Ол саяхаты кезінде бірнеше рет велосипед сатып алған. Бір жолы Барселонада оның велосипедін ұрлап кеткен. Иранда саяхатшыны автобус қағып кетіп, жарақат алған.
– Биылғы ақпанда Австралияда 38-39 градус ыстық болып, суға түскенмін. Құлағыма инфекция түсіп, ауырып қалдым. Дәрігерге 70 доллар беріп тексерілдім, - дейді Мағжан Сағымбаев.
Саяхатшы жолда шатырда түнеп, тамақты арнайы газды ыдыста пісіріп жүре берген. Ол өзімен 30 килограмм жүк алып жүргенін айтты.
Мағжан Сағымбаев елге оралған соң біраз демалатынын, кейінірек келесі саяхаты туралы ойластыра бастайтынын айтады.
Мағжан Сағымбаевтың бұл сапарына қажет 1 миллион 730 мың теңгені (шамамен 9,5 мың доллар) демеушілер жинап берген.
Мағжан Сағымбаевтың әлемдік велосаяхаты туралы фотогалерея
Мағжан Сағымбаевтың әлемдік велосаяхаты
Әуесқой саяхатшы осыған дейін Қазақстан тауларын да жалғыз аралап шыққан. Жолшыбай кездескен көлікке мініп бірнеше шет елге саяхат та жасап көрген. 2013 жылы автостоппен 20 мың километр жол жүріп, Ресей, Солтүстік Осетия, Грузия, Армения, Украина, Молдова мен Түркияны аралап шыққан соң велосипедпен саяхат жасау идеясы туған.
Қазақстанда әлемді жылдар бойы велосипедпен аралауға құмар басқа да азаматтар бар. Азаттық солардың бірі – әлемнің жиырма шақты елін велосипедпен аралап шыққан Түгелбек Қасымұлы туралы да жазған еді. Шығыс Қазақстан облысы Тарбағатай ауданы Жамбыл ауылындағы мұғалім бұл сапарына 12 жылын арнаған.