Украина бас штабы соғыс басталғалы Ресей 15 мыңға жуық әскериін жоғалтқанын (жараланғандар мен қаза болғандар бірге есептелген) мәлімдеді. Бұдан бөлек, Украина тарабы ресейліктер 1535 бронетехникасынан, 200-ден аса ұшақ пен тікұшағынан, 500-ге жуық танкісінен, үш кемесі мен катерінен айырылды дейді.
Соғыс уақытында мұндай ақпараттарды тәуелсіз дереккөздерден тексеру мүмкін емес.
Ресей әскерінің шабуылына ұшыраған Киевтегі Подольский ауданындағы сауда орталығы. Фотодан көргендеріңіздей сауда орталығы қатты бүлінген. Алдын ала мәлімет бойынша, шабуылдан кемі сегіз адам қаза болып, бірнеше адам жараланған.
Қытайдың АҚШ-тағы елшісі Цин Гань "Пекин Ресейге қару-жарақ пен оқ дәрі бермейді, есесіне жағдай ушықпас үшін қолдан келгеннің бәрін жасайды" деп мәлімдеді. Осыған дейін халықаралық басылымдарда Қытай Ресейге көмек ретінде қару-жарақ беруі мүмкін деп жазған. Пекин бұл ақпаратты "фейк" деп атаған еді.
Вашингтон Пекинге "Ресейге қару-жарақпен көмектессе салдары қиын болатынын" ескерткен.
Қытай - Ресейдің ең жақын одақтастарының бірі.
WSJ дереккөзі: Путин Киевті алу жоспарынан бас тартқан
Америкалық Wall Street Journal газеті америкалық жоғары лауазымды шенеунікке сілтеме жасап, Ресейдің Украинадағы соғыста тактикасы өзгергенін жазды.
АҚШ пен оның одақтастары "Путин Украинаға басып кірген соң үш күннің ішінде Киевті алып, Зеленскийді биліктен кетіріп, орнына ресейшіл режимді отырғызуды жоспарлаған" деген еді.
"Путин үш аптаның ішінде бұл жоспарды орындау мүмкін болмайтынын түсінген соң тактиканы өзгерткен сияқты" дейді WSJ дереккөзі.
Басылымға ақпарат берген адам Путин қазір Киевке Украинаның оңтүстік және шығысындағы аумағы жайлы талабын қабылдатуға тырысады деп айтады.
"Мәскеу енді Ресейдің батысы мен Қырымды жалғайтын жолды қамтамасыз етуге әрі Ресейдің Донбасстағы ықпалын нығайтуға тырысады. Егер Украина бейтарап статусты қабылдамай қойса, Путин қазір Ресей әскерилері бақылап отырған барлық аумақты сақтап қалу үшін соғысты жалғастыра береді. Киев статусы не болары белгісіз, себебі Украина бұл қаланы күш салып қорғап жатыр. Ресей Киевті алу үшін күш жинай ала ма, ол жағы да анық емес" дейді газет дереккөзі.
WSJ басылымы "дереккөзінің айтқаны – АҚШ барлау қызметінің бағасы емес, бұл құпия ақпаратты білетін шенеуніктердің сөзі" деп ескертеді.