Accessibility links

Созақта сақалға байланысты дау шықты


Көрнекі сурет.
Көрнекі сурет.

Аудан әкімі «сақалдарыңды алып тастаңдар» деп сес көрсетті дейді Созақ ауданының тұрғыны. Ал әкім тек «әдемі, жарасымды болып жүруге кеңес бергендігін» айтады.


Оңтүстік Қазақстан облысы Созақ ауданына қарасты Степной ауылының тұрғыны Бағдат Шайдазимов «аудан әкімі сақалыңды ал дегенді айтты» деп отыр. Оның сөзінше, бұл оқиға өткен аптаның соңында аудан әкімімен өткен жиналыста айтылған.

«ЗАҢ – МЕНМІН!»

– Жиналыста аудан әкімі Берік Мейірбеков «сақалдарыңызды алуға жарлық шықты, сондықтан сақалдарыңызды алыңыздар» деді. Содан кейін мен «Сол жарлықты көруге болады ма, жарлықпен қалай таныссақ болады?» деп едім, әкім үстелді ұрып, «Сендерге заң – менмін!» деп айқайлады, – дейді Бағдат Шайдазимов Азаттық тілшісіне қазанның 19-ы күні.

Жиналыста Бағдаттың жанында отырған досы «Конституцияда діні үшін қудаланбайды» деп ара түспек болған екен, бірақ ашуға мінген әкім «сендерге прокуратураны, КНБ-ны жіберемін!» деп сес көрсетті дейді шағымданушы азамат.

Бес жылдан бері намаз оқып, сақалын өсіріп жүрген Бағдат Степной ауылындағы «Қазатомпром» компаниясына қарасты кәсіпорындардың бірінде дәнкерлеуші болып жұмыс істейді.

– Осы күнге дейін сақалым кедергі келтіріп, күйік шалған емес. Жеті жыл болды – автогеннің астында жұмыс істеп келемін, – дейді сұхбаттасымыз.
Оның сөзінше, әкім жиналыс барысында аудандағы «сақалдылардың барлығын қысамыз» деп ескерткен.

РУХАНИ КЕЛІСІМ НЕМЕСЕ «ЖІГІТТЕРГЕ РАҚМЕТ»

Созақ ауданының әкімі Берік Мейірбеков өткен аптада жиналыс өткенін растады. Әкімнің айтуынша, жиналыс «рухани келісім күніне орайластырып өткізілген».

– Біздің Қазақстанымыздың мәдениеті, әлеуеті, өркениеті дамып жатыр. Қазір ортаға байланысты әдемі болып жүру, жарасымды болып жүру... осы мәселе жайында айтылды. Ал оны (сақалды) алып тастасын деген мәселе айтылған жоқ, – деді қазанның 19-ы күні Азаттық тілшісімен сөйлескен аудан әкімі.

Қазір «діндегі азаматтармен өте жақсы қарым-қатынас орнаған», бұл мәселе «жігіттердің дұрыс түсінбей қалғандығынан туындаған болар» дейді Берік Мейірбеков.

– Қайта ол жігіттер біздің әлеуметтік экономикамызға кәсіпкерлік арқылы үлкен үлес қосып жатыр. Рахмет қайта ол жігіттерге! – деді Созақ ауданының әкімі Берік Мейірбеков.

Созақтағы сақал дауына байланысты радиохабар
please wait

No media source currently available

0:00 0:02:46 0:00
Жүктеп алу
XS
SM
MD
LG