Жұлдыз ТӨЛЕУ

қаңтар 24, 2008

Биліктегі ауыс-түйістер нені білдіреді?

Жаңа жылдан кейін Астанада бірінші рет жоғары билік сатысында ауыс-түйістер болды. Сәрсенбі күні кешкісін «Нұр Отан» халықтық-демократиялық партиясының бюро отырысын өткізген мемлекет басшысы әрі партия көсемі Нұрсұлтан Назарбаев саяси ұйымдағы өзінің бірінші орынбасары етіп осыған дейін президент әкімшілігінің жетекшісі болып келген Әділбек Жақсыбековті тағайындағанын айтты. Ал Әділбек Жақсыбековтің бұған дейін атқарып келген қызметіне «Нұр Отан» төрағасының екінші орынбасары, осыған дейін «Қазына» ұлттық холдингінің төрағасы болған Қайрат Келімбетов тағайындалды. Ал партия басшысының бұрынғы бірінші орынбасары Бақытжан Жұмағұлов болса, қазіргі кезде Мәжіліс төрағасының орынбасары болғандықтан саяси ұйымдағы басшы қызметінен босатылғаны туралы хабарланды.

қаңтар 18, 2008

Экс-сенатор Зәуреш Батталова бастаған топ Астана әкімін сотқа берді

Жұма күні Астананың Сарыарқа аудандық сотында қала әкімі Асқар Маминді сотқа берген «Лайықты баспана үшін» ұйымы өкілдерінің өтініштері бойынша сот ісі қаралды. Өтініш беруші тарап, өздеріне шеру өткізуге рұқсат бермегендігі үшін соттан әкімді жауапты деп тануын және 234 млн теңге моральдық шығындарын өтеп беруін сұрап отыр. Ал Астана қаласы әкімдігінің өкілі өздерін айыптымыз деп санамайды.

қаңтар 16, 2008

Мәжіліс отырысында депутаттар «Абай» шахтасындағы қазалы апат жайлы ләм-мим деп ауыз ашпады

Қаңтардың 16-күні өткен Парламент мәжілісінің жалпы отырысында Қарағанды облысындағы «Абай» шахтасында болған жарылыс жөнінде бірде бір депутат мәселе көтерген жоқ. Олар тек бір минөт үнсіздік жариялаумен және бір күндік еңбекақыларын қаза болғандардың отбасыларына көмек ретінде берумен ғана шектелді. Отыз адамның өмірін қиған оқиға жөнінде депутаттар неге тіс жармады?

қаңтар 15, 2008

Халықтық коалиция қазіргі парламентті таратуға ықпал жасай алады ма?

Өткен жылдың аяғында Қазақстанның жалпыұлттық социал-демократиялық партиясының жетекшісі Жармахан Тұяқбай елдегі саяси, қоғамдық ұйымдардың жетекшілеріне халықтық коалиция құру жөнінде ұсыныспен шыққан еді. Таяуда бірқатар саяси партиялардың жетекшілері биресми түрде бас қосып, халықтық коалицияны құру жөнінде кеңес өткізіпті. Мәліметтерге қарағанда, «Нағыз Ақ жол» партиясының лидерлері ең бірінші жұмысты қазіргі парламентті таратуға ықпал жасаудан бастау керек деген ұсыныс білдірген. Алайда, олар толыққанды шешім шығармаған. Жалпы Қазақстандағы қазіргі билікке қарсы саяси күштер жұмылып жұмыс істесе, «НұрОтаннан» құралған парламентті таратуға ықпал жасай алады ма?

желтоқсан 24, 2007

Оппозиция қайраткері мен адам құқығын қорғаушылардың ісін он бес сағат қараған әкімшілік сот оларға айыппұл салды

Заңсыз шеру ұйымдастырды деген айыппен сотқа тартылған оппозиция өкілі, экс-сенатор Зәуреш Батталова мен құқық қорғаушылар Тимур Кулеев, Болатбек Біләлов, Дәурен Белгібаевтарға және «Лайықты баспана үшін» қоғамдық ұйымының өкілі Дәмеш Мұқышеваға өткен сенбіден жексенбіге қараған түні Астана қаласының әкімшілік соты айыппұл cалу туралы шешім шығарды. Бірақ сот шешімімен келіспеген олар қалалық сотқа шағымданбақ және өздерін ұстаған полиция жасақтарының әрекетін заңсыз деп сотқа бермекші.

желтоқсан 17, 2007

Желтоқсан көтерілісін ұйымдастырған биліктегі басшылар болатын дейді «Нағыз желтоқсан» қозғалысының өкілдері

Желтоқсанның 17-сі Қазақстанда демократиялық жаңару күні деп белгіленген. Осыдан тура жиырма бір жыл бұрын қазақ жастары Алматыда Коммунистік партия Орталық комитет пленумының шешімімен келіспей алаңға шыққан еді. Бұндай бас көтеру желтоқсанның 18-19 күндері республикалық барлық қалаларында да болған. Сол бір ызғарлы күндерде наразылық толқуына қатысқандардың бір тобы - бүгінде «Нағыз желтоқсан» қозғалысының өкілдері – дүйсенбі күні Астанадаға саяси қуғын-сүргін құрбандарын еске алу ескерткішінің жанына жиналды.

желтоқсан 15, 2007

Астанада экс-сенатор Зәуреш Батталова бастаған топты заңсыз шеру өткіздіңдер деп полиция жасақтары ұстап әкетті

Тәуелсіздік күні қарсаңында Астана шетіндегі Окан Атрико алаңында Астана қаласы студенттерінің Альянсы «Жастарды патриоттық рухта тәрбиелеу» деген атпен акция өткізді. Аталған акцияға «Азаматтық қоғам» қоғамдық ұйымы мен төрт айдан бері еңбекақыларын ала алмай жүрген «Қуат» корпорациясының жұмысшылары да қатысты. Өйткені дәл сол жерге шеру өткізуге «Қуат» компаниясының жұмысшылары да алдын ала арыз берген екен. Бірақ қала әкімшілігі олардың өтініштерін қабылдамай тастаған. Акция аяқталып, жастар тарқай салысымен, полиция жасақтары «Азаматтық қоғам» қоғамдық ұйымының Астанадағы жетекшілерін заңсыз шеру өткіздіңдер деп ұстап алып кетті.

желтоқсан 13, 2007

Алашорда үкіметінің 90 жылдығын Қазақстан қалай атап өтті?

Осыдан тура 90 жыл бұрын, 1917 жылғы желтоқсанның 5-13 аралығында, Орынбарда 2-ші жалпықазақ құрылтайы өтті. Жиынның күн тәртібінде барлығы 10 мәселе қаралып, Қазақ автономиясы – Алашорда үкіметі құрылып, оның төрағасы болып Әлихан Бөкейханов сайланған еді.

желтоқсан 12, 2007

Мәжіліс депутаты Сәт Тоқпақбаев елдегі құқық орындарын мұқият тексеру керек дейді

Сәрсенбі күні мәжіліс депутаты, генерал Сәт Тоқпақбаев Қазақстан президентінің атына үндеу жариялады. Ол елдегі барлық құқық орындары - прокуратура, президенттің күзет қызметі, Ұлттық қауіпсіздік комитетінің қызметкерлерін жаппай тексеруден өткізуін сұрап, басшыларын қызметтен алуын да талап етті. Өйткені елде болып жатқан сыбайласқан қылмысқа солардың басты қатысы бар дейді. Мәселен, Қазақстанның Австриядағы бұрынғы елшісі Рахат Әлиевтің ұзақ жылдар бойы қауіпсіздік құрылымында істеп жүріп, қылмыстық әрекеттер жасағанын айтқан Сәт Тоқпақбаев сол кезде құқық орындары неге шара қолданбаған дейді.

желтоқсан 10, 2007

Қазақстан үкіметі Интернетті арнайы заңмен реттемекші

Мәдениет және ақпарат министрі Ермұхамбет Ертісбаев 2010 жылы Қазақстанның ЕҚЫҰ- ға төрағалық етуіне байланысты, олардың талаптарына сәйкес, бұқаралық ақпарат құралдарына өзгерістер енгіземіз деп мәлімдеді дүйсенбі күні мәжіліс депутаттарының алдында. Сонымен бірге министр мырза «Интернет туралы» жеке заң жобасы әзірленіп жатқандығын да сөз етті. Ал Қазақстандағы журналистерді қорғайтын ұйымдар «БАҚ туралы» жеке заң қажет дейді.

желтоқсан 07, 2007

Төрт айдан бері еңбекақыларын ала алмай жүрген «Қуат» компаниясының жұмысшылары тағы да шеруге шықпақшы

Астанадағы ең ірі құрылыс компанияларының бірі болып саналатын «Қуат» корпорациясының жұмысшылары тамыз айынан бері еңбекақыларын ала алмай келеді. Олар осыдан бір ай бұрын президент резиденциясы Ақорданың жанында рұқсат етілмеген шеру ұйымдастырған болатын. Сол кезде компания басшылары бұқаралық ақпарат құралдары өкілдеріне «бүгіннен бастап ақшаларын төлейміз» деп уәде берген еді. Алайда компания басшылары ақша төлеудің орнына, «заңсыз шеруге шықтыңдар, айыппұл саламыз» деп өздерін қорқытқан көрінеді. Бірақ «Қуат» компаниясының жұмысшылары еңбекақыларын төлемесе, тәуелсіздік күні қарсаңында көшеге шығамыз деп отыр.

желтоқсан 05, 2007

Қазақстанның спорт министрі ел президенті Нұрсұлтан Назарбаевтың өмірлік қызметінде отыруы - елге келетін инвестиция кепілі деді

Бүкіләлемдік туристік ұйымның Бас Ассамблеясына қатарынан төрт жыл вице-президент болып сайланған Қазақстанның спорт және туризм министрі Темірхан Досмұхамбетов сәрсенбі күні бұқаралық ақпарат құралдарына арнап өткізген баспасөз мәслихатында «Қазақстанға туризм саласына келіп жатқан инвестицияның көбеюінің себебі - президентімізді өмірлік етіп сайлап алдық, өйткені инвесторлар да тұрақтылықты қалайды» деген сенсациялық мәлімдеме жасады. Шын мәнінде, Қазақстан президенті Н.Назарбаев Конституцияға биылғы енгізілген түзетулер арқылы «мәңгілік президент» болып қалды ма?

желтоқсан 03, 2007

Ресей думасына сайлау: Қазақстандық саясаткерлердің көзімен

Ресей мемлекетінде биыл Дума сайлауы бірінші рет, Қазақстанда өткен парламент сайлауы секілді, пропорционалдық жүйемен және жеті пайыздық меже арқылы өтті. Ресей Орталық сайлау комиссиясының алдын ала жариялаған сайлау нәтижесі бойынша, жеті пайыздық межеден төрт партия өтіп отыр. Алайда, басым дауыс биліктің «Біртұтас Ресей» партиясына тиесілі болды. Көрші Ресей өлкесінде өткен Дума сайлауын ресми Астанада отырған саясаткерлер қалай бағалайды?

қараша 26, 2007

Әділет министрлігі заң жобаларын енді тек қазақ тілінде әзірлемекші

Қазақстанның Әділет министрлігі келесі жылдан бастап заң шығару жұмыстарын толықтай мемлекеттік тілге көшірмекші. Осылай деп дүйсенбі күні әділет вице министрі Дулат Құсдәулетов айтты. 2008 жылы парламенттің қарауына жіберілуі тиіс 21 заңның жобасы бүгінде қазақ тілінде дайындалып жатыр екен. Алайда қазіргі шақырылымдағы парламент депутаттарының басым бөлігі қазақ тілін жетік білмейді. Олар қазақ тілінде әзірленген заң жобаларын қалай талқыламақ?!

қараша 23, 2007

«Нұр Отаннан» тұратын мәжілісмендерге оппонент табылды

Жұма күні Астанада парламент мәжілісі жанынан құрылған қоғамдық палатаның алғашқы отырысы өтті. Қоғамдық палатаға оппозициялық партияның өкілдерінен басқа ұзын саны отызға жуық елдегі саяси партиялардың және үкіметтік емес ұйымдардың өкілдері мүше болып кіріпті. Алайда мәжіліске түскен заң жобаларына тек ақыл кеңес берумен ғана шектелетін ұйымның мүшелері әртүрлі тақырыптың басын шалып, тіптен қоғамдық палатаны саяси алаңға айналдыру жөнінде ұсыныс жасады. Өйткені президенттік «Нұр Отан» партиясынан басқа партиялардың ойын ашық айтатын елде мінбер қалмапты.

қараша 22, 2007

Академик Салық Зиманов: «Егер тез арада билік саясатын өзгертпесе, Қазақстанды үлкен дағдарыс күтіп тұр»

Испания астанасы Мадридте Қазақстанның Еуропадағы ынтымақтастық және қауіпсіздік ұйымына төрағалық ету мәселесін талқылау күні жақындаған сайын ресми Астана «демократпыз» деп жүргендерді жинап алып, түрлі жиындар өткізіп, халықаралық қауымдастыққа «Қазақстанда саяси реформа дамып келеді» деген үнді жеткізуге барынша тырысып жатыр. Соның бірі Қазақстан парламенті өткізген «елдегі парламентаризмнің дамуы» атты халықаралық конференция. Онда депутаттар бір партия ұзақ жылдар үстемдік құрған дамыған мемлекеттердің сарапшыларын шақырып алып, «бір партиялық жүйемен де реформа жасауға болады, жасап жатырмыз» деген әңгімелер айтты. Алайда академик Салық Зиманов қазіргі биліктің үлкен қателік жасап отырғанын, оны тез арада түзетпесе елде үлкен саяси-экономикалық дағдарыс болады деген пікірін жеткізді.

қараша 21, 2007

Қазақстанда есірткі саудасымен айналысқандарға өмір бойы бас бостандығынан айыру жазасын қолданатын болады

Сәрсенбі күні мәжіліс депутаттары Қазақстанның Қылмыстық кодексіне және әкімшілік құқық бұзушылық туралы кодекске есірткіні заңсыз айналымы саласындағы жауапкершілікті күшейту мәселелері бойынша өзгерістер енгізу туралы заң жобасын бірінші оқылымда мақұлдады. Түзетулерге сәйкес, есірткі саудасымен айналысқан азаматтарға өмір бақи бас бостандығынан айыру секілді жазаның ауыр түрін қолданатын болады.

қараша 16, 2007

Президент қауіпсіздік кеңесінің отырысында Алматы әкімі Тасмағамбетовке қатаң сөгіс берумен шектелді

Бейсенбі күні Астанада Қазақстан президенті Нұрсұлтан Назарбаевтың төрағалық етуімен қауіпсіздік кеңесінің кезекті отырысы өтті. Отырыста елдегі экономикалық, әлеуметтік ахуал және Алматыда заңсыз берілген жерлерге қатысты мәселелер өрбіді. Ең бастысы, көптен бері қоғам арасында қызметінен алынады деген болжам айтылып келген Алматы қаласының әкімі Иманғали Тасмағамбетовке президент тек қана қатаң сөгіс берумен шектелді. Мұны елдегі бірқатар сарапшылар Тасмағамбетовтің жеңісі деп отыр.

қараша 14, 2007

Мәжіліс жанынан қоғамдық палата құрылды

Сәрсенбі күні Қазақстан парламентінің депутаттары мәжілістің жанынан қоғамдық палата құру туралы шешім қабылдады. Қоғамдық палатаның құрамына саяси партиялардың, үкіметтік емес ұйымдардың өкілдері кіріп, әзірленетін заң жобаларына өздерінің ұсыныстарын енгізе алады екен. Алайда, мәжіліс сайлауынан кейін парламентке өте алмаған «Нұр Отан» партиясынан басқа саяси партияның өкілдерінің бірқатары қазіргі парламенттің қоғам алдында пәрменділігі жоқ деп отыр.

қараша 08, 2007

CITIC group қытай компаниясына қарайтын Қаражамбас мұнай өндіруші кәсіпорнының 50 пайыз акциясын ҚазМұнайГаз сатып алды

Бейсенбі күні Астанада Қазақстан – Қытай Ынтымақтастық жөніндегі комитетінің төртінші отырысы өтті. Комитет қорытындысы бойынша екі мемлекеттің үкімет басшыларының орынбасары жеті түрлі келісімге қол қойды. Соның бірі Қаражамбас мұнай өндіруші кәсіпорнының елу пайыз акциясын CITIC компаниясынан Қазмұнайгаз ұлттық компаниясы сатып алды.