«Қазмұнайгаз» компаниясының еншілес мекемелерінің бірі Oil Construction Company кәсіподағының бұрынғы еңбек инспекторы Нұрбек Құшақбаев мамырдың 28-і күні бостандыққа шықты. Оны мерзімінен бұрын босату туралы сот қаулысының күшіне енгені туралы Павлодар қалалық сотының баспасөз қызметі хабарлады.
«Нұрбек Құшақбаевты мерзімінен бұрын шартты түрде босаnу туралы сот шешімі күшіне енді. Ешқандай наразылық шағым тіркелмеген» деп хабарлады Азаттыққа №2 Павлодар қалалық сотының баспасөз хатшысы Гүлсім Ақтаева.
Павлодардағы АП-162/3 мекемесіне 36 жастағы кәсіподақ лидерін қарсы алуға оның туыстары, жұбайы және бұрынғы кәсіподақтағы серіктері барды.
Нұрбек Құшақбаевты қарсы алуға барған жолдастарының айтуынша, ол ертең 29 мамыр күні Ақтауға пойызбен жолға шығатын болады.
Oil Construction Company (OCC) бұрынғы лидерлерінің бірі Нұрбек Құшақбаевты мерзімінен бұрын шартты түрде босату туралы №2 Павлодар қалалық сотының қаулысы мамырдың 10-ында шыққан болатын.
Нұрбек Құшақбаевпен қатар екі жылға бас бостандығынан айырылған Oil Construction Company кәсіподағы ұйымының бұрынғы жетекшісі Әмин Елеусінов те мамырдың 22-сі күні мерзімінен бұрын шартты түрде бостандыққа шықты.
OCC компаниясы жұмысшылары кәсіподақ ұйымының бұрынғы еңбек инспекторы Нұрбек Құшақбаевты 2017 жылғы сәуірдің 7-і күні Астананың Алматы ауданы 2-соты қылмыстық кодекстің «заңсыз ереуілге қатысуды жалғастыруға арандату» бабы бойынша айыпты деп танып, екі жарым жылға бас бостандығынан айырған. Істі қараған судья Айжан Күлбаева Құшақбаевқа екі жыл мерзімге қоғамдық қызмет атқаруға тыйым салып, жәбірленуші тарап Techno Trading компаниясы талап еткен 25,2 миллион теңге «материалдық шығынды» өндіру туралы шешім шығарған.
Нұрбек Құшақбаев Ақтауда 2017 жылғы 20 қаңтарда ОСС кәсіподағы кеңсесінде және «Маңғыстаумұнайгаз» компаниясына тиесілі Қаламқас, Жетібай кеніштерінде бірнеше жүз жұмысшының жаппай аштық акциясы кезінде ұсталған еді. Оны Астанаға апарып, сол жерде үстінен қылмыстық іс қозғап, қамауға алған.
ВИДЕО: Соңы сотқа ұласқан аштық. Ақтау, 26 қаңтар 2017 жыл
ОСС жұмысшылары Қазақстан тәуелсіз кәсіподақтар конфедерациясын әділет министрлігі арызы бойынша жабу туралы биліктің шешіміне қарсылық білдірген еді. Конфедерация жабылса, оның құрамындағы ОСС кәсіподағы ұйымына да жабылу қаупі төнеді деп уайымдаған мұнайшылар конфедерацияға тиіспеуді талап етіп аштық жариялаған.
Нұрбек Құшақбаев өзі қамауға алынатын 2017 жылдың 20-қаңтарында мұнайшылар наразылығын заңсыз деп таныған Ақтау қаласының 2-соты шешімін орындауды талап етіп, сот орындаушылары мен Ақтау қаласы прокуроры келген кезде батыл сұрақтар қойған.
«Неге сот шешімі Қазақстан Республикасының кәсіподақтар туралы заңына қайшы? Кәсіподақ туралы заңның 5-бабында кәсіподақтың барлық мемлекеттік органдардан тәуелсіздігі жазылған. Мұны қалай түсіндіресіз? Біз қай жерде қашан жиналып, нені дайындайтынымызды, құқымызды қалай қорғайтынымызды өзіміз білеміз. Түнімен отырып ұжымдық келісім шарт жасақтаймыз ба, басқа мәселе талқылаймыз ба - ол біздің жұмысымыз» деген Құшақбаев Ақтау қаласының прокуроры Марат Тойжанға.
Нұрбек Құшақбаевтың кәсіподақ саласындағы қызметі 2011 жылы басталған. Жұмысшылар құқын қорғап көзге түскен жас жігітті сол кезде ол жұмыс істеген Ersai Caspian Contractor LLC компаниясы жұмысшылары оны өздері құрған «Қарақия» тәуелсіз кәсіподағы жетекшісі етіп сайлаған. 2011 жылы компания жұмысшылары мамыр-маусым айларында жалақыны көтеруді, еңбек жағдайын жақсартуды талап етіп, жұмысқа шығудан бас тартып, ереуілге шыққан. Сол жолы да сот жұмысшылар талабын заңсыз деп танып, ереуіл комитетіне жетекшілік еткен «Қарақия» кәсіподақ ұйымының лидері Нұрбек Құшақбаевты он тәулікке қамау және оған 105 мың теңге айыппұл салу туралы шешім шығарған еді.
Нұрбек Құшақбаевпен қатар екі жылға бас бостандығынан айырылған Oil Construction Company кәсіподағы ұйымының бұрынғы жетекшісі Әмин Елеусінов те мамырдың 22-сі күні мерзімінен бұрын шартты түрде бостандыққа шықты.
Әмин Елеусінов пен Нұрбек Құшақбаевтың есімі қазақстандық құқық қорғаушылар жасаған «саяси тұтқындар» тізімінен де орын алған.
ВИДЕО: Мұнайшылар наразылығы. 9 қаңтар 2017 жыл
Биылғы сәуірдің 26-сында Әмин Елеусінов, Нұрбек Құшақбаев пен Қазақстанның тәуелсіз кәсіподақтары конфедерациясының лидері Лариса Харькова Артур Свенссон атындағы халықаралық сыйлыққа ие болды. «Кәсіподақтардың Нобель сыйлығы» деп аталып кеткен бұл марапат жұмысшылардың құқын қорғауда ерекше үлес қосқандарға беріледі.
ПІКІРЛЕР