Амангелді КЕҢШІЛІКҰЛЫ

ақпан 15, 2006

Алматы жұртшылығы белгілі саясаткер әрі қоғам қайраткері Алтынбек Сәрсенбайұлын ақтық сапарға шығарып салды

Ақпанның 15-күні Алматы қаласының жұртшылығы республикаға белгілі саясаткер әрі қоғам қайраткері Алтынбек Сәрсенбайұлын соңғы сапарға шығарып салды. Марқұммен қоштасу Алматы қаласындағы Ғылым Академиясының ғимаратында өтті. Азалы жиында сөйлеген марқұмның серіктері мен қоғам өкілдері бұл қазаны саяси қастандық деп атап, Қазақстанның билігінен елдегі оппозиция жетекшілерінің бірі Алтынбек Сәрсенбайұлын атып өлтірген қылмыскерлер мен оған қатысты барлық кінәлі адамдарды анықтап, оларды заң алдында қатаң жазаға тарту туралы талап қойды. Сондай-ақ бұл өлімге қатысты моральдық және Конституциялық жауапкершілікті президент Н.Назарбаев дербес көтеретінін айтып, қазірде шетелде демалыста жүрген мемлекет басшысының шұғыл түрде Отанына оралып, елде қалыптасқан саяси жағдайға байланысты Қазақстандағы барлық саяси күштердің қатысуымен парламенттің төтенше мәжілісін шақыруды талап етті.

ақпан 14, 2006

Баспасөзге шолу. 02.14.2006 жыл

Сейсенбі күні жарық көрген мерзімді және интернет басылымдарында кезінде лауазымы жоғары қызметтерді атқарған, өмірінің соңында оппозиция белсенділерінің бірі болған Алтынбек Сәрсенбайұлының қазасы туралы сөз болыпты.

ақпан 13, 2006

Қазақстандық оппозиция қайраткері, экс-министр Алтынбек Сәрсенбайұлы белгісіз жағдайда қаза тапты

Ақпанның 13-күні Алматы қаласының маңында Қазақстандағы оппозиция қайраткерлерінің бірі, бұрынғы ақпарат министрі Алтынбек Сәрсенбайұлы мен тағы екі адамның мәйіттері табылғаны мәлім болды. Серіктерінің айтуынша, Алтынбек мырзаның қол телефоны өткен сенбіден бастап байланысқа шықпаған. Мәйітті көргендер А.Сәрсенбайұлын әлдекімдер қасақана атып өлтірген деп отыр.

ақпан 10, 2006

Жазушы Рамазан Тоқтаровтың шығармашылық кеші болып өтті

Өткен ғасырдың алпысыншы жылдарында қазақ әдебиетінің көшіне бір топ толқынның келіп қосылғаны белгілі. Әдебиет зерттеушілерінің айтуынша, тоталитарлық жүйе кезінде қалыптасып үлгірген сеңді бұзуға алпысыншы жылдары келген буынның өкілдері зор үлес қосты. Осы толқынның ішінде ешкімге ұқсамайтын жазу ерекшелігімен танылған қаламгерлердің бірі – Рамазан Тоқтаров көзі тірі болса бүгінде жетпіс жасқа толар еді.

ақпан 09, 2006

Алматыда Мұқағали Мақатаевтың туған күні аталып өтті

9-ақпан ақын Мұқағали Мақатаевтың туған күні. Соңғы жылдары Алматы қаласында осы күні ақын Мұқағали Мақатаев ескерткішінің алдында өлең оқу дәстүрге айналды. Мұқағали ақынның дүниеден озғанына талай жыл өтсе де ақынның жырларына деген халықтың махабаты суыған емес. Кезінде ақынның өзі: Көрер едің, Шаламын ба, отпын ба? Білер едің, Ақынмын ба, жоқпын ба?.. Кектендірген хан Жәңгір де жоқ мұнда, Кектенетін Махамбет те жоқ мұнда, - деп, тебіріне толғанған болатын.

ақпан 08, 2006

Баспасөзге шолу. 02.08.2006 жыл

Сәрсенбі күні жарық көрген мерзімді басылымдарда келешекте Қазақстан мен Ресейдің бірігуі мүмкін екендігі туралы болжамдардың соңғы уақыттары жиі айтыла бастағандығы сөз болыпты. Сондай-ақ кейбір тәуелсіз басылымдарда Қазақстанда орысшыл күштердің қайтадан күшейіп бара жатқандығы айтылыпты. Үкіметтің кезекті отырсының қалай өткендігі де сәрсенбі күнгі жарық көрген басылымдардың назарынан тыс қалмапты.

ақпан 02, 2006

Баспасөзге шолу. 02.02.2006 жыл

“Ресми билік саяси реформалар жасауы мүмкін бе?” деген мәселе бейсенбілік мерзімді басылым бетінде жарық көрген мақалаларда талқыға салыныпты. Кейбір тәуелсіз басылымдар комиссия артынан комиссия құрылып, қауырт жұмыс жүріп жатқандай көрінгенімен, түптеп келгенде бәлендей ілгерілеу бола қоймайды деген қорытынды түйіпті. Оппозиция басшылары болса ендігі уақытта демократияның алға қадам басуы Мемлекет басшысының өз билігін азайтып, халықтық және азаматтық қоғам билігінің дамуына ерік беруіне байланысты болатындығын сөз қылыпты.

қаңтар 27, 2006

Баспасөзге шолу. 01.27.2006 жыл

Жаңадан тағайындалған Мәдениет, ақпарат және спорт министрі Ермұхамет Ертісбаев апта соңында жарық көрген басылымдардың негізгі қаһарманына айналыпты. Мерзімді басылымдарға берген сұхбатында Ермұхамет Ертісбаев қазақ тілінің мәртебесін күшейтуге уәде бергенімен, кейбір тәуелсіз газеттер қазақша әрең сөйлейтін Ермұхамет Ертісбаевтың бұл қызметке тағайындалуын қатты сынға алыпты. Ал, халықаралық “Human Rights Watch” құқық қорғау ұйымының баяндамасында Қазақстанда сөз бостандығына байланысты қысымның күшейіп кеткендігі айтылыпты.

қаңтар 26, 2006

Баспасөзге шолу. 01.26.2006 жыл

Белгілі оппозиционер Ғалымжан Жақиянов бейсенбі күнгі жарық көрген кейбір тәуелсіз басылымдардың басты қаһарманына айналыпты. Тәуелсіз басылымдарға берген сұхбатында Ғалымжан Жақиянов оппозиция өзінің біріге алатындығын президентік сайлауда көрсеткендігін айта келіп, Қазақстандағы болып жатқан жағдайлар туралы халық шынайы ақпарат алуы үшін қоғамдық телеарна ашу керектігін сөз қылыпты. Бейсенбі күнгі кейбір мерзімді басылымдарда Өзбекстан мемлекетінің Еуразиялық экономикалық қауымдастыққа кіруіне байланысты сараптама жасалыныпты.

қаңтар 25, 2006

Баспасөзге шолу. 01.25.2006 жыл

Сәрсенбі күнгі жарық көрген басылымдарда Қазақстан Президенті Нұрсұлтан Назарбаев Үкіметтің жұмысын қатты сынға алғанымен, не себептен оның өз орнында қалғандығына байланысты болжамдар жасалыныпты. Кейбір сарапшылардың айтуынша, егер Н.Назарбаев президенттік сайлауда басқа нәтижемен жеңіске жеткен жағдайда, өзінің қарсыластарымен ымыраға келу үшін оппозиция өкілдеріне Үкімет құрамынан бірнеше орынды үлестіріп беруі мүмкін еді. Алайда, Президент абсолюттік жеңіске жеткеннен кейін, шын мәнісінде коалициялық үкімет құру мәселесі өз-өзінен жоғалған.

қаңтар 24, 2006

Баспасөзге шолу. 01.24.2006 жыл

Сейсенбі күнгі жарық көрген басылымдар Қазақстан Президенті Нұрсұлтан Назарбаевтың Министрлер кабинетін толық құрамымен қабылдап, олардың жұмыстарындағы кемшіліктерді атап көрсетіп, тез арада жоюды талап еткендігіне айрықша назар аударыпты. Қазақстан Президенті Нұрсұлтан Назарбаевтың 2005 жылдың ақпанындағы жолдауындағы көрсетілген міндеттерді атқару премьер-министрдің орынбасары Кәрім Мәсімовке жүктеледі. Ендігі уақытта стратегиялық мәселелер бойынша тиімді жұмыс жүргізу, бағдарламалар әзірлеп, оларды әрі қарай жетілдіру ісін Премьердің орынбасары Кәрім Мәсімов басшылыққа алуға тиіс.

желтоқсан 29, 2005

Баспасөзге шолу. 12.29.2005 жыл

Бейсенбі күнгі басылымдарда 2005 жылды қорытындылаған мақалалар жарық көріпті. Сонымен қатар белгілі оппозиционер Ғалымжан Жақияновтың Жаңа жылды түрмеде қарсы алуы мүмкін екендігі айтылыпты.

желтоқсан 27, 2005

Қырғыз елінен әкелініп, Астана абақтысына жабылған жас саясаткер Махамбет Әбжан әкесімен кездесті

26 желтоқсан күні Қырғызстанның кейбір тәуелсіз интернет-басылымдарында, Бішкекте қамауға алынған Махамбет Әбжанды билік орындарының Қазақстанға қайтарғандығын жоққа шығарған ақпарат пайда болған еді. Алайда, 27 желтоқсан күні бұл ақпараттың жалған мәлімет екендігі аян болды.

желтоқсан 26, 2005

Әдебиеттегі көркем тілдің деңгейі қандай?

Көркем әдебиеттің негізгі құралы тіл болып табылатындығы белгілі. Соңғы уақыттары әдебиеттегі көркем тілдің құнарлығының жоғалып бара жатқандығы жиі сөз бола бастады. 26 желтоқсан күні Қазақстан Жазушылар Одағында әдебиеттегі көркем тілдің проблемасына байланысты конференция болып өтті. Конференция барысында қазіргі замандағы әдеби қазақ тілінің ахуалы талқыға салынды.

желтоқсан 24, 2005

Сенбі күні Қазақстан мұсылмандары қажылық сапарға аттанады

24 желтоқсанда Қазақстанның мыңдаған азаматтары мұсылманның бес парызының бірі - қажылық сапарға аттанады. Осыған орай жұма күні Алматы қаласының Орталық мешітінде қажыға баратындарды шығарып салу рәсімі болып өтті. Үстіміздегі жылы Меккеге қажылық сапарға барушылардың саны екі мыңнан асып отыр.

желтоқсан 22, 2005

Баспасөзге шолу. 12.22.2005 жыл

Бейсенбі күнгі басылымдарда Президент сайлауынан кейін саяси билікте қандай өзгерістердің болуы мүмкін екендігіне байланысты сараптамалық мақалалар жарық көріпті. Ал, кейбір тәуелсіз басылымдар болса сайлау өте салысымен оппозицияға қарсы қысымның қайтадан күшейе бастағандығы айтылыпты.

желтоқсан 20, 2005

Бішкектегі Қазақстан елшілігінің алдында наразалық шарасы өтті

Сейсенбі күні Бішкектегі Қазақстан елшілігінің алдында наразылық шарасы өтті. Оған қатысушылар Қырғызстан астанасында 13 желтоқсан күні тұтқынға алынған Қазақстан азаматы Махамбет Әбжанның әлі күнге дейін бостандыққа жіберілмегендігіне наразылық білдіріп, оны қуғындауды доғаруды талап етті. Бұл шараға өзін шетелдегі қазақстандық оппозицияның, қырғыз бөлімінің өкілдері ретінде таныстырып жүргендердің бірі Азамат Жетпісбаев пен Қырғызстандағы “Кел кел” жастар ұйымының мүшелері қатысты. Кейбір ақпарат құралдары таратқан мәліметтерге жүгінсек, Махамбет Әбжанға Қазақстанда қаржы заңын бұзған деген айыппен қылмыстық іс қозғалған. Бірақ, Қырғызстанда оппозициялық қызметпен айналысып жүрген қазақстандық азамат Махамбет Әбжан мен оның жақтасы Азамат Жетпісбаев өздерінің саяси көзқарастарына қатысты қудалауға ұшырағандығын айтып отыр.

желтоқсан 16, 2005

Алматы қаласы тәуелсіздік күнін атап өтті

16 желтоқсан Қазақстан Республикасының тәуелсіздік күні. Тоқсаныншы жылдардың бас кезінде тәуелсіздік күні айрықша аталып өтіп, Республика алаңына мыңдаған азаматтар келіп, 1986 жылғы желтоқсанда қаза тапқан жастардың рухына тағзым ететін. Алайда, соңғы жылдары 16 желтоқсан күні Қазақстанның тәуелсіздігі үшін қаза тапқандардың рухына тағзым ету үшін Республика алаңына санаулы азаматтар ғана келіп жүр. Жұма күні де тәуелсіздік күніне орай Алматы қаласындағы Республика алаңына адам көп жиналған жоқ. Тіпті, осы алаңға келіп, тағзым етушілердің өздері жыл өткен сайын тәуелсіздік күнінің қадірінің кетіп бара жатқандығын айтып отыр.

желтоқсан 15, 2005

Баспасөзге шолу. 12.15.2005 жыл

Мерзімді басылымдарда тәуелсіздік күніне арналған мақалалар жарық көріпті. Кейбір тәуелсіз басылымдарда 16 желтоқсан күні туды көтеріп, әнұран айтуды былай қойғанда елдегі бас алаңға келіп тағзым ететін шенеуніктің де табылмайтындығы, 1986 жылғы желтоқсан оқиғасынан бері он тоғыз жыл өтсе де қазақ жастарының әлі күнге дейін өздерін тәуелсіз сезіне алмайтындығы сөз болыпты.

желтоқсан 14, 2005

Қырғызстанда қазақстандық оппозицияшыл жастар тұтқындалды

Желтоқсанның 13-күні Бішкекте өздерін шетелдегі оппозициялық бюроның қырғыз бөлімінің жетекшілеріміз деп таныстырып жүрген Әбжан Махамбет, Азамат Жетпісбаев және “Айбат” жастар қозғалысы жетекшілерінің бірі Жанбота Қарашолақовты Қырғызстанның заң орындары тұтқынға алғаны мәлім болды. Алайда, кейіннен олардың екеуі - Азамат Жетпісбаев пен Жанбота Қарашолақов бостандыққа жіберілген. Желтоқсанның 14-күні “Азаттық” радиосына берген сұхбатында Жанбота Қарашолақов сәрсенбі күні Алматыға қайтып оралғанын, ал Махамбет Әбжанды қырғыз заң орындары Бішкектегі уақытша абақтыда қамауда ұстап отырғанын айтты.