Жұлдыз ТӨЛЕУ

мамыр 10, 2007

Дәрігерлерді аттестациядан өткізу үшін қайтадан сұрақтар әзірленіп жатыр екен

Қазақстанның Денсаулық сақтау министрі Анатолий Дерновойдың айтуынша, дәрігер мамандарды аттестациядан өткізу үшін министрлікте жаңа тест сұрақтары әзірленіп жатыр. Тест сұрақтарын қайта өңдеуден өткізуге Парламент депутаттарының пікірлері мен дәрігер мамандардың наразылықтары себеп болған. Өйткені Қазақстан бойынша дәрігер мамандарды қайта аттестациялаудан өткізген кезде 50 пайыздан жоғары бас дәрігерлер тест сұрақтарынан сүрініп, жұмыстарынан кетуге мәжбүр болған.

мамыр 04, 2007

Полиция қызметін бақылайтын қоғамдық кеңес қоғамда резонанс тудырған қылмыстық істерге араласа алмайды

Үстіміздегі жылдың төртінші мамырында Астанада Ішкі істер министі жанындағы полиция қызметін бақылау жөніндегі қоғамдық кеңестің бірінші отырысы өтті. Ішкі істер министрі Бауыржан Мұхаммеджановтың айтуынша, қоғамдық кеңес министрліктің ұсынысымен құрылған. Оның құрамына Мұрат Әуезов, Жеміс Тұрмағамбетова, Генадий Бендицкий секілді қоғам қайраткерлері еніп отыр. Полиция қызметін бақылайтын қоғамдық кеңес қаншалықты қоғамның қажеттілігін өтей алады?!

сәуір 09, 2007

Қазақстан бойынша ВИЧ инфекциясына шалдыққан сегіз мыңға жуық адам тіркеуде тұр

Үстіміздегі жылдың бірінші сәуірі күнгі көрсеткіш бойынша Қазақстанда қорғаныш тапшылығының қоздырғышы індетін жұқтырған адамдардың саны сегіз мыңға жуық екен. Осылай деп дүйсенбі күнгі Парламенттегі Үкімет сағатында Қазақстанның Денсаулық сақтау министрі Анатолий Дерновой мәлімдеді. Қазақстанда вич-инфекциясын жұқтырушылар санының артуының басты себебі – нашақорлар саны мен гомосексуалдар санының артуы деп Үкімет тұжырым жасаса, парламент депутаттары басты себепті халықтың әл-ауқатының төмендігінен іздеу керек дейді.

сәуір 04, 2007

Айтыс ақыны Бауыржан Қалиолла қалайша аяқ астынан «жемқор шенеунікке» айналып кетті?

Қазақстандағы айтыс өнерінің биігінен көрініп жүрген ақындардың бірі Бауыржан Қалиолланың аты-жөні президенттің алдындағы қара тізімде жатыр. Бауыржан Қалиолла аяқ астынан «жемқор шенеунікке» айналып кеткен. 27 жастағы айтыскер ақын Бауыржан Қалиолла осыдан екі жыл бұрын Орал қаласында өткен халықаралық айтыстың бас жүлдесін иеленіп, Батыс Қазақстан облысының әкімі Нұрғали Әшімов халықтың алдында үйсіз жүрген Қалиоллаға үш бөлмелі пәтердің кілтін беремін деп уәде етеді. Әкім уәдесінде тұрып ақын Бауыржан Қалиоллаға пәтер береді. Алайда, екі жылдан соң Бауыржан Қалиолланың аты-жөні мемлекеттік бағдарлама бойынша заңсыз пәтер алған 72 шенеуніктің тізіміне ілініп, президенттің алдынан бірақ шығады.

наурыз 28, 2007

Парламентте Казаткомдағы қақтығысқа қатысты пікірлер айтылды

Мәжіліс депутаттары Алматы маңында Маловодное ауылында болған қақтығыстың себебі жіті зерттелуі керек дейді.

наурыз 02, 2007

Парламентте «Ақиқат» депутаттық тобы құрылды

Парламентте Мәжіліс депутаты Болат Әбішовтің бастамасымен жаңадан «Ақиқат» тобы құрылды. Бұл топқа парламент мінберінде ойларын ашық айтып жүрген Тоқтар Әубәкіров, Амангелді Айталы, Амалбек Тшанов, Рауан Шаекин секілді депутаттар кіріп отыр. Көбінесе ешқандай партияға да, топтарға да кірмейтін депутаттардың бұлайша бірігіп жатқанына не себеп?

наурыз 01, 2007

Мәжіліс депутаты Мұхтар Шаханов Қазақстанның мемлекеттік тілін түсінбейтін журналистердің Парламенттен хабар таратуына тиым салуға шақырды

Бейсенбі күні Парламент Мәжілісінің жалпы отырысында депутат Мұхтар Шаханов парламент қабырғасында хабар тарататын бұқаралық ақпарат құралдары өкілдерін қайта тіркеуден өткізу мәселесін көтерді. Депутаттың айтуынша, мемлекеттік тіл - қазақ тілін түсінбейтін журналистер заң шығару мекемесінде жұмыс істемеуі керек.

ақпан 28, 2007

Қазақстан басшысы парламенттің құзыретін кеңейтуге уәде еткенімен, билік тізгіні президенттің қолында қала беретіндігін қадап айтты

Сәрсенбі күні Қазақстан басшысы Нұрсұлтан Назарбаев Қазақстан халқына дәстүрлі жолдауын жария етті. Бұл жолғы жолдауда алдағы он жылда атқарылар міндеттер белгіленген. Жолдаудың негізгі басым бөлігі әлеуметтік салаға арналған. Жолдауға сәйкес, жыл сайын кезеңмен зейнеткерлердің зейнетақысы, бюджеттік қызметкерлердің жалақысы және атаулы көмектер көбейіп отыратын болады. Ал саяси реформалар жөнінде басты жаңалық – президент Конституцияға өзгеріс енгізетіндігін және саяси партиялар тізімімен сайлаудың болатынын айтты. Дегенмен Жолдауды тыңдауға келген Қазақстанның демократиялық күштері «президент демократиялық қадамдарға әлі дайын еместігін көрсетті» деген баға беріп отыр.

ақпан 27, 2007

АҚШ Мемлекеттік хатшысының орынбасары Ричард Баучер Қазақстандағы демократияның дамуын қаржыландыруды өз елінің тоқтатпайтындығын жеткізді

Дүйсенбі күні Астанаға АҚШ Мемлекеттік хатшысының Оңтүстік және Орталық Азия істері жөніндегі орынбасары Ричард Баучер ресми сапармен келді. Ол Қазақстанның бірнеше лауазымды тұлғаларымен және демократиялық күштердің өкілдерімен кездесті. Ричард Баучер ресми тұлғалармен кездесу барысында сәрсенбі күнге белгіленген Қазақстан президентінің халыққа жолдауынан саяси реформаға қатысты көп үміт күтетіндігін жеткізді.

ақпан 14, 2007

Парламент мәжілісі ядролық сынақтарға жан-жақты тиым салу туралы келісімді ратификациялауды мақұлдады

Сәрсенбі күні Парламент Мәжілісінің жалпы отырысында депутаттар Қазақстан Республикасының Үкіметі мен Ядролық сынауларға жан-жақты тыйым салу туралы шартты қолдауға халықаралық мониторинг обьектілерінде, сертификаттаудан кейінгі іс-шараларды қоса алғанда, іс-шараларды өткізу жөніндегі келісімді ратификациялау туралы» заң жобасын мақұлдады.Бұл халықаралық шартқа Қазақстан 2004 жылы Вена қаласында қол қойған болатын.

ақпан 12, 2007

Қазақстанның азаматтық әуе тасымалы саласында бәсекелестік болмағаны кімге тиімді?

Қазақстандағы жалғыз ұлттық әуе компания – «Эйр Астананың» құрылғанына биыл бес жыл толды. Алайда осы уақыттан бері оның 49 пайыз акциясына иелік ететін британиялық «BAE System» компаниясы Қазақстанға бірде бір инвестиция құймаған деп сынға алынды.

қаңтар 31, 2007

Қазақстандық телерадиоларда мемлекеттік тілдегі хабарлардың көлемі қанша болуы керек?

Сәрсенбі күні өткен Парламент Мәжілісінің жалпы отырысында Мәжіліс депутаты Бекболат Тілеухан алдағы бес жылдың ішінде Қазақстандағы электронды ақпарат құралдары тәулігіне кемінде 90 пайыз мемлекеттік тілде хабар тарататындай дәрежеге жетуі керек деген мәселе қойды. Оның сөздеріне қарағанда, Қазақстаннан хабар тарататын радиостанциялар «Бұқаралық ақпарат құралдары туралы» заңдағы талапты орындап отырған жоқ. Ал Қазақстанның Мәдениет және ақпарат министрі Ермұхаммед Ертісбаев электронды ақпарат құралдары 90 пайыз мемлекеттік тілде ақпарат тарататын болса, Қазақстан авторитарлық саяси жүйеге айналуы мүмкін дейді. Есесіне, министрдің сөздеріне қарағанда, болашақта Қазақстанда тәулігіне 24 сағат тек мемлекеттік тілде хабар тарататын 3-4 телеарна жұмыс істемек.

қаңтар 29, 2007

Үкімет мемлекеттік рәміздерге ерекше көңіл бөлмекші

Дүйсенбі күні Парламент палаталарының бірлескен отырысында депутаттар «Қазақстан Республикасының мемлекеттік рәміздері туралы заңға өзгерістер мен толықтырулар енгізу туралы» заң жобасын бірінші оқылымда талқылады. Үкімет аталған заң жобасына Қазақстанның мемлекеттік рәміздерін насихаттау және тәрбие құралы ретінде пайдалану мақсатында өзгерістер енгізіп отырмыз дейді. Атап айтқанда, енді бұдан былай мемлекеттік рәміздерді кез-келген кәсіпорындар, баспаханалар арнайы лицензиясыз шығара алмайды және әнұранды қай жерде міндетті орындау қажеттігі жөнінде ресми көрсетілетін болады. Ал жекелеген депутаттар мемлекеттік рәміздерді лицензиясы барлар ғана шығара алады дегенмен келіспей отыр. Олар бұны кәсіпкерлікке қысым деп түсініп отыр.

қаңтар 24, 2007

Мәжіліс депутаттары «Жалақорлық үшін жауапкершілікті күшейту туралы заң жобасы» Қазақстандағы сөз бостандығына жасалынып отырған құрық дейді

Сәрсенбі күні Парламент Мәжілісінің жалпы отырысында «Қазақстанның кейбір заңнамалық актілеріне жалақорлық пен зорлық-зомбылық үшін жауаптылықты күшейту мәселелері бойынша өзгерістер мен толықтырулар енгізу туралы» заң жобасын депутаттар комитетке қайтарды. Аталған заң жобасы Мәжілістің қарауына ұсынылған кезде, елдегі халықаралық ұйымдар мен саяси партиялар жобадағы заң өзгертулері елдегі сөз бостандығына қысым келтіреді, журналистердің құқығын шектейді деп мәселе көтерген болатын. Алайда жобаны әзірлеген ішкі істер министрлігінің өкілі Қазақстанда саяси науқандар кезінде үміткерлерге қарсы жала жабу фактілері көбейіп отыр дегенді алға тартты.

қаңтар 22, 2007

Қазақстанда көші-қон саясаты өзгермекші

Дүйсенбі күні Қазақстанның Еңбек және әлеуметтік қорғау министрлігінде өткен алқа отырысында Үкімет басшысы Кәрім Мәсімов Еңбек министрі Гүлжан Қарағұсоваға көші-қон процесін оның ішінде шетелден келетін жұмыс күштер мәселесін реттеуді тапсырды. Кәрім Мәсімов Атыраудағы Теңіз кенішінде болған түріктер мен қазақтар арасындағы қақтығыс қайталанбауы керек дейді. Ал Еңбек министрлігі осы мәселеге қатысты «Қазақстанның кейбір заң актілеріне көші-қон мәселелері бойынша өзгерістер мен толықтырулар енгізу туралы» заң жобасын әзірлепті. Оны таяу арада Парламентке ұсынбақ. Сонымен бірге Қазақстанда көші-қон саясатының жаңа тұжырымдасы әзірленіп жатыр.

қаңтар 12, 2007

Президент Орталық сайлау комиссиясының төрағалығына Қуандық Тұрғанқұловтың кандидатурасын ұсынды

Орталық сайлау комиссиясының төрағасы қызметін атқарған Оңалсын Жұмабеков президенттің жарлығымен президент әкімшілігі басшысының орынбасары қызметіне тағайындалды. Енді алдағы сәрсенбіде Мәжіліс депутаттары Орталық сайлау комиссиясының жаңа төрағасына дауыс беретін болады. Ал жұма күні Мәжілістің сот-құқықтық реформалар жөніндегі комитеті Орталық сайлау комиссиясының төрағалығына президент ұсынған кандидатураны талқылады. Ол осыған дейін Орталық сайлау комиссиясының төраға орынбасары қызметін атқарып келген Қуандық Тұрғанқұлов.

қаңтар 11, 2007

Нұртай Әбіқаев Қазақстандағы екінші тұлғаның бірінші тұлғаға айналуын заман көрсетеді дейді

Бейсенбі күні Парламент Сенатына келген Қазақстан президенті Нұрсұлтан Назарбаев Сенат төрағасы болған Нұртай Әбіқаевтың өзінің өтінішімен отставкаға кетуіне байланысты оның орнына Сыртқы істер министрі болған Қасымжомарт Тоқаевты Конституцияға сәйкес, сенат депутаттығына ұсынды. Ал сенат депутаттары Қасымжомарт Кемелұлыны бір ауыздан Сенат төрағасы етіп сайлады. Бұқаралық ақпарат құралдарына сұхбат берген Нұртай Әбіқаев өзіне қатысты өзгерістердің былтырғы Алтынбек Сәрсенбайұлының өліміне байланысты өзіне тағылған алып-қашпа әңгімелерге еш қатысы жоқ екендігін айтты.

қаңтар 10, 2007

Парламент депутаттары Қазақстанның премьер-министрі қызметіне Кәрім Мәсімовтің тағайындалуын бірауыздан жақтап дауыс берді

Сәрсенбі күні Қазақстан Парламентінің бірлескен отырысында Мемлекет басшысы Нұрсұлтан Назарбаев Мәскеудің халықаралық университетінің және Бейжіннің тілдер институтының түлегі болған, осыған дейін Даниял Ахметовтің орынбасары қызметін атқарған Кәрім Қажымханұлы Мәсімовтің кандидатурасын ұсынды. Бұл ұсынысты парламенттің қос палатасының депутаттары бірауыздан қолдап, дауыс берді.

қаңтар 09, 2007

«Менің Қазақстаным» әнінің мемлекеттік әнұранға айналғанына бір жыл толды

Былтыр қаңтар айының 11-күні президент инаугурациясында «Менің Қазақстаным» әні тұңғыш рет гимн ретінде айтылған еді. Енді бұдан былай Шәмші Қалдаяқов атындағы халықаралық ән фестивалі Астана қаласында өткізілетін болады. Ал аталмыш фестивалді тұңғыш рет 1992 жылы Шымкент қаласында өткізген Мәжіліс депутаты Амалбек Тшан әнұранның авторларына «Халық қаһарманы» деген атақ берілу керек деп есептейді.

желтоқсан 27, 2006

Парламент депутаттары жаңа жылдан бастап министрлерге қатаң талап қоямыз деп отыр

Парламент Мәжілісінің депутаттары жаңа жылдан бастап Конституциялық құқықтарын пайдаланып өздеріне ұнамайтын министрлерге сенім білдіру туралы мәселе қойып, қызметтерінен кетіреміз деп отыр. Өйткені депутаттардың пікірлеріне қарағанда министрлер өздері әзірлеген заңдарды толық білмейді.